YOEL 1 - Ao Naga CL Bible - SQC Edition (BSI)

¹ Pethuel jabaso Yoel dangi aruba Kibuba O:

Linük Raksaba Asoshi Mangyimba

² Nenok tamburtem, ya angang, aser linük nung alir ajak, nenok tenarong tenang. Nenok tendak mesüra nenok tsürabur tendak iba amai ataloker ma?

³ Iba indang nenok chirnur dang shiang, aser nenok chirnuri par chirnur dang shidakjang, aser par chirnuri taruba putu dang shidakjang.

⁴ Tejendokba süngkui kechi anüng, süngku teloki achi, süngku teloki kechi anüng, joka aoba süngkui achi; joka aoba süngkui kechi anüng, temeyokba süngkui achi.

⁵ Nenok yi agi mesepertem, sakang aser jebang; yi lanu asoshi nenok yijemer ajak ayimtenang, kechiaser aji nebang nungi endoktsüogo.

⁶ Kechiyong kü lima anema tashi tait aser mezüngdangtetba kin ka adoka lir; iba tepu molusongzü tepu lir; molusongzü tulu shilempu pa dak lir.

⁷ Pai kü tsükmenatzü raksa-a yutsüogo, aser kü munguzünu dong raksatsüogo; pai iba teküp khenyongi ajakdok aser aji endokadok; pa kongsangtem mesünga kümogo.

⁸ Aiüri anem sü agi teperem sü agir la aiwa kinungpu asoshi ajeb ama mang yimang

⁹ Kibuba ki nungi chiyungtsü tenla aser tajemtsü tenla endokadokogo; putirtem, Kibuba tenzükertemi mang ayimer.

¹⁰ Alu endoka lir, ali-i mang ayimer; kechiyong tsük raksa-a lir, yi kongadokogo, aser totzü roseper.

¹¹ Wheat aser barley tsük asoshi aluyimertemi aksetang, tsükmenatzü lu ayimtertemi ayimtenang; kechiyong aluruba samaogo.

¹² Tsükmenatzü dong azülar, munguzünu dong kongsüka lir; jarem dong, asang dong, aser metoklashi dong, oda moapu nung süngdong ajak azülaogo; kechiyong nisung chirtem nungi tepela jenogo.

Temulung Meyipa Sarasademtsü Ajaba

¹³ Nenok putirtem, nenok anem sü abenang aser mang yimang; nenok tenladak tenzükertem, ayimtenang arung, nenok kü Tsüngrem tenzükertem, ammang tepiyong anem sü abener mejanga liang; kechiyong chiyungtsü tenla aser tajemtsü tenla nenok Tsüngrem kidang nungi sotadokogo.

¹⁴ Meshiteta lumiang, temeshi sentep ka jatepang, tamburtem aser linük nung alir ajak Kibuba nenok Tsüngrem kidang sentepdakjang, aser Kibuba dang ayimtenang.

¹⁵ Tejashitsü anogo ya! Kechiyong Kibuba anogo anasa lir, aser ajak Takoksang nungi tesamatsü ama aji arulanglang.

¹⁶ Asen nükdang nungi chiyungtsü, hau, Kibuba kidang nungi tepelatsü aser tepelaba pilar masü no?

¹⁷ Metsütemji ali telung nung shizüka aor, tsük bendendak azüngmeyaka tokja lir; jentem raksaogo, kechiyong tsük madok.

¹⁸ Parnok chiyimdak maka nung shirurutemi koda asateper aser nashi telok ratamatar! Hau, san telok azüngmeyaka lir.

¹⁹ Kibuba, ni ne dang ayimtener; kechiyong mi agi arem chiyimdak meyokogo, aser milaki moapu süngdong ajak merukogo.

²⁰ Hau, moapu shirurutemi na asoshi kanga merua tzürar, kechiyong ayongtem kongogo, aser mi agi arem chiyimdak meyokogo.