YIHUDA 1 - Ao Naga CL Bible - SQC Edition (BSI)

Okila

¹ Yisu Khrista tenzüker aser Yakob tenu Yihuda nungi, Tebu Tsüngrem nungi temeimbatem aser Yisu Khrista nem nungloka yutsüba tajabatem dangi.

² Nenok dangi yimlibilem, tesünep aser temeim jenti sang.

Tiyazü Tesayurtem

³ Temeimbatem, ni nenok dangi asenok külem tekümtet indang kanga zülunüa alidang, koba tamang khenyongi temeshipur nem agütsür liasü, iba tamang asoshi nenoki kanga merangtsü ni nenok dangi ajungshia zülutsüsa aküm.

⁴ Kechiyong nisung kar shirnoki alemli nungi iba taitsüba angutsü tamasa atemzüka liasü, aser shirnoki asen Tsüngrem taochi jabujariba kümdakja, aser asen Chuba aser Kibur ka dang, oda Yisu Khrista menangzüki memeshiba nisungtem lir, parnok miima aitogo.

⁵ Tang, nenoki khenyongi ajak metetaka, Kibubai Ijip lima nungi nüburtem kümzüker, tesülen shirnoki mamang, parnok samadaktsü ta ni nenok nem bilemtetdaktsünür.

⁶ Aser koba kotak tenyartem pei yimli nung meli-i pei tim talidak toktsü, pai parnok o bendangba anogo tulu matong tashiji tammang nung tatem makaba talenba nung ayu.

⁷ Yamaji Sodom aser Gomora aser temeket nung aliba yimtitem, kobai parnok ama pei sasa nüktapangta nem agütsü, aser tim masüba shi mapai ai, item jagi tatem maka mi temerenshi anguba tatishitsü sayur.

⁸ Aji saka itema pei pungmang nung, aji odasa pei temang memerük kümdaktsür, aser yimsüsüba mezüngmeshir aser tazüngpur atalar.

⁹ Saka kotak tenyar tuluba Mikaeli mojing den raradang, Mosa temang indang bangsentep, pai pa anema o bendang tulu abentsü tasü mait, saka ashi, “Tsüngremi na arüjang.”

¹⁰ Saka item nisungi kechisa memetet, item anema parnoki atalar, aser shisa makaba shirurutem ama, kechisarena parnoki samatsür.

¹¹ Parnok asoshi aiatai! Kechiyong parnoki Kain lenmang nung jaja, aser taa asoshi Balam tai nung talubosa asema ao, aser Kora ama anema adokba nung sama.

¹² Kodang parnoki nenok den benjong chiyungteper, nenok temeim benjong nung itemji miima aliba lung lir. Parnok sannükeri metsübui pei sasa mesür. Tzü medeni mopung agi bener aoba mepet, tejang matangba tsüngkhüm süngdong, anaben asüba, tera den atsütetba süngdong,

¹³ tzüyim tzüsem tesashiba, pei maksü jungkai adoka sayuba, oli aruli petinu, shirnok asoshi teptepa ammang teti tatem makai rizünga yuja lir.

¹⁴ Aser Adam nungi tenetbuba putu nung aliba Enoki shina ashi, “Ajiang, ajak madak o bendangtsü aser memeshi pur ajak pei memeshiba mapa koba parnoki memeshi-i inyak,

¹⁵ aser pa anema koba o tasak agi memeshiba temenen puri jembi, aji asoshi tai agütsütsü Kibubai pei temeshi pur meyi ter den aru.

¹⁶ Parnokji nemnemertem, temulung machi o jembirtem, pei azüabung arishir aser parnok tebang agi asüküm o tulu jembir. Aser tajangzük angutsü asoshi parnoki nisung asanger.”

Tekümdangtsü Aser Tajungshiba

¹⁷ Saka temeimbatem, tatembang mapang nung tatalartem pei memeshiba azüabung nung jaja alitsü ta,

¹⁸ nenoki asen Kibuba Yisu Khrista tenyartemi nenok dang koba o akhidang jembi, aji bilemtetang.

¹⁹ Item nisungtemi telemsa adokdaktsür, tanela maitertem aser alima nisung dang.

²⁰ Saka nenok temeimbatem, nenok temeshiba tamang manungji nenok sasa yanglulokang, aser Tanela Temeshi nung sarasadema,

²¹ asen Kibuba Yisu Khrista yimlibilem ata-a, Tsüngrem temeim nung nenok sasa liang.

²² Arentaka alirtem angatetdakjang;

²³ kar mi nungi atsüteta kümzükang; aser kar shi agi menena kümdaktsüba süoshijia sempa-a tetsübu agi parnok dang yimlibilem sayuang.

Tatem Sarasadem

²⁴ Tang shibai nenok tetsüng memetsüi lidaktsütsü akok, aser nenok tarak meketi tepela tulu agi pa sentsüwangshi madang yutsütsü akok,

²⁵ iba asen Kümtetdakba Tsüngrem ka dang atema, asen Kibuba Yisu Khrista, ajanga mapang ajak dang tama, aser tang aser teti, tatem makai, sentsüwangshi, ain, bangdak, aser tashi sang. Amen.