RUTH 3 - Ao Naga CL Bible - SQC Edition (BSI)

Ruthi Boazer Motsüngnemi Aluba

¹ Aser Naomi-i la jabaso kibutsü dang ashi, “Kü jala ne temulung süa alitsüsa ni na asoshi tejenokdak ki ka mebushitsü ama?”

² Tang Boaz shiba kilitsürtem den na liasü pa asen sosem masü no? Ajiang, taonung motsüngnem nung pai barley tsük aseptsü.

³ Anungji ne sasa merükmejur totzü lokang aser ne sobutsü tajungtiba sobur, motsüngnem jagi na luang; saka pa chiyunga mejemzük tashi nai ne sasa nisungba nemji temetetdaktsü.

⁴ Aser kodang pa mejangdir nai pa mejangdak ajioka yuang, aser na yiang aser pa tetsüng lupokang aser mejangang; aser nai kechi inyaktsü aji pai ne dang ashitsü.

⁵ Aser lai la dang langzü, “Nai ashiba ajak ni inyaktsü.”

⁶ Aser lai motsüngnem jagi alu aser la kinungpu tetsüi ashiba amato ajak inyak.

⁷ Aser kodang Boaz chiyunga ajem aser pa pela-a liasü, pai tsük tanang tatembang tsüngdang mejangtsü ao; idangji Ruth tanemi arua pa sü lupok aser la pa tetsünglen mejang.

⁸ Aser ayatrem nung nisungbaji aoksa aser pa sasa meyip aser ajiang, pa tsüngdang tetsür ka mejanga liasü.

⁹ Pai asüngdang, “Na shiba?” Lai langzü, “Ni ne kilitsür Ruth lir. Ne süji ne kilitsür dak emlokjang, kechiaser na kü sosem senmang anasatibaji lir.”

¹⁰ Aser pai ashi, “Kü jala, Kibubai na moajang; sensaker saka takar saka nai asangurtem sülen manitakba ajanga tetenzük dang nungi tatemlenang nai kü dang taochi tali sayuogo.

¹¹ Aser tang, kü jala, na tetsübu; nai ashiba ajak ni ne dang inyaktsü; kechiyong kü nübur yimti nung alir ajaki na tetemsü tetsür ka ta metet.

¹² Aser sosem ta asübaji shitak, sakasa kü dang nungi tanaba sosem ka lir.

¹³ Taonungbo ata-ang, anepdangang ya metettsü; pai ne dang kinunger ka teinyaktsü mapa inyakra junger, pa nem sosem shilem mapa inyakdakjang; saka pai ne dang sosem shilem mapa meinyakra, Kibuba alinungji, ni ne dang iba sosem shilem inyaktsü. Anepdang maru tashi yangi mejangang.”

¹⁴ Anungji lai anepdang tashi pa tsüngdang mejang aser ano züngia alidang lai shishi, kechiaser pai ashi, “Iba tetsür motsüngnem jagi aru ta shinga nema memetetdaktsütsüla.”

¹⁵ Aser pai ashi, “Nai abena aliba sepoksü bener arung aser idakji ametang, aser lai aji amet aser barley tsük tatak trok ataka la nem yangji enoktsü; aser lai yimti-i ao.

¹⁶ Aser kodang lai la kinungpu tetsü dangi aru, lai ashi, “Kü jala, na koda asü? Aser lai la dang nisungba jagi la dang inyakba ajak ashi.”

¹⁷ Aser lai ashi, “Barley tsük tatak trok ya pai kü nem agütsü, kechiyong pai ashi, ne kinungpu tetsü dangi ne teka tazüng maotsüla.”

¹⁸ Idangji lai ashi, “Tebilemba koma ataloktsü aji nai meteta maru tashi ajem ajema liang, kechiaser mapaji tanüsa mekümtet tashi nisungbaji odangbo malitsü.”