ROM NUNGER DANGI PAUL SHITI 7 - Ao Naga CL Bible - SQC Edition (BSI)

Kiyimba Nungi Tatishitsü

¹ Mesüra adianutem, kopiga nisung taküm alir, kechiaser ni ozüng metetertem dang jembir, papigaji ozüngi pa madak yimsü asür ta nenoki memetet no?

² Kechiyong kinungpu alir tetsür ka pei kinungpu dak alenloka lir, saka kinungpu süra kinungpu ozüng nungi la chioker.

³ Saka pei kinungpu taküm lia lai tangar kar dangi ora, la nüktapangtatsür ta ajatsü. Saka kinungpuji süadokra tangar tebur dangi aoyonga la nüktapangtatsür ta majatsü, kechiyong kinungpu ozüng kübok joko la mali.

⁴ Anungji kü adianutem, asenoki Tsüngrem nem tejang tangtsütsü asoshi nenoka tanga ka den alenloka kümdaktsü, shiba tasü nungi shia arudaktsü, oda Khrista temang ajanga ozüng nung südaktsüogo.

⁵ Kechiyong asenok alima yimya ama alidang ozüngi ajungmesodaktsüba asen temenen tejangrabatem jagi tasüba asoshi tejang tangdaktsütsü atema tenük telentem nung mapa inyaka liasü.

⁶ Saka tang asenok alar talenba nung yutsüsang dak asenokji süadok nung tangbo asenok ozüng nungi nüji küma chioka lir. Anungji asenoki tezüluba ozüng tejen nung masü saka tanela taküm tasen nung tenzüker.

Temenen aser Ozüng

⁷ Ajangla asenoki kechi ashitsü? Ozüngji temenen asü? Yamaji kodanga masü! Aji saka temenenji kechi ni memeteti liasü. Ozüng ajanga dang metet. Kechiyong, “Nai tenükshi,” ta ozüngi mashi asübo ni tenükshiba memetetla.

⁸ Saka temeneni ozüng ajak kü dak ajungmesodaktsü: kechiyong ozüng nungi pila-a temenenji tasü lir.

⁹ Aser ni khen ozüng nungi pila-a taküm liasü, saka ozüngji arudang temenenji shia aru aser ni asü.

¹⁰ Aser ozüng kobai ni taküm lenmangi anitsü tim liasü, iba jagi ni tasüba lenmangi ani.

¹¹ Kechiyong temeneni ozüng ajanga jembilen ngua, ni külakoktsü aser ozüng ajanga ni tepset.

¹² Anungji ozüngji temeshi aser temelabaji temeshi, ochi aser tajung.

¹³ Ajangla koba tajung, iba jagi kü dangi tasüba bener arutsü asü? Yamaji kodanga masü. Saka temenenji temenen ta sayutsü asoshi aser temenenji shitak majung ta kuli südaktsütsü asoshi tasüba arudaktsü.

Shi Aser Tanela Raraba

¹⁴ Kechiyong ozüngji temeshi ta asenoki metet, saka nibo masü, temenen dang yokadokba alar ka ama, ni nisung ka dang lir.

¹⁵ Kechiyong ni kechi inyaker aji ni mangateter, kechiyong ni kechi inyakner aji ni meinyaker, saka ni kechi sempar aji ni inyakadoker.

¹⁶ Saka ni kechi meinyaknür aji ni inyakra, oda ozüngji junger ta ni nangzükadoker.

¹⁷ Saka atangji ya ni inyaker masü, saka kü dak aliba temeneni ya inyaker.

¹⁸ Kechiyong kü dak ali shi taküm nung kecha tajung mali ta ni metet. Kechiyong koba shitak iba atema ni mulungtsü akok, saka ibaji ni inyaktsü makoker.

¹⁹ Kechiyong ni kechi tajung inyaktsü mulunger aji meinyaker, saka kechi tamajung inyaktsü ni memulunger aji ni inyaker.

²⁰ Saka ni kechi memulunger aji ni inyakra, ibaji ni masü saka kü dak aliba temeneni inyaker.

²¹ Anungji ni shibai tajung inyaktsü mulunger, kü den tamajungba dena lir ta iba ozüng ni angu.

²² Kechiyong kü temulungi Tsüngrem ozüng nung pelar,

²³ saka tanga ozüng ka kü tenük telen nung aliba temenen ozüng kübok ni tepuoker ka ama bener arur.

²⁴ Oh, ni koda timtem tejashiba nisung! Iba tasüba temang nungi shibai ni kümzüktsü?

²⁵ Asen Kibuba Yisu Khrista ajanga ni Tsüngrem tenüng asanger! Anungji ni kü sasa kü temulung agi Tsüngrem ozüng atangji tenzüker, saka shi agi temenen ozüng tenzüker.