ROM NUNGER DANGI PAUL SHITI 6 - Ao Naga CL Bible - SQC Edition (BSI)

Temenen Nung Asü Saka Khrista Dak Taküm Angu

¹ Ajangla asenoki kechi ashitsü? Taochi tali adokdaktsütsü asoshi asenoki temenen nung maneni alitsü asü?

² Yamaji kodanga masü! Asenok shir temenen nung asü, ano asenok idakji koda alitsü.

³ Mesüra asenok kwika Khrista nung baptitsü, asenok ajak pa tasüba nung baptitsü ta asenoki memetet no?

⁴ Anungji kechi koda Tebu sentsüwangshi ajanga Khrista tasü nungi shia arudaktsü, aji oda asenoka taküm tasen nung jajatsü asoshi asenok ajak baptiba ajanga tasüba nung pa den arem.

⁵ Kechiyong asenoki pa tasüba mesükba nung pa den lungjemra, asenok pa shia aruba mesükba nunga pa den lungjemtsü.

⁶ Aser temenen talenba nung asenok alar süa malitsü asoshi, saka temenen samatsü asoshi asen tejen nisung pa den kangki nung angenlok ta asenoki metet.

⁷ Kechiyong shiba süogo pa temenen nungi chioka lir.

⁸ Saka asenok Khrista den asü süra asenok ano pa den taküm alitsü ta asenoki amanger.

⁹ Kechiaser Khrista tasüba nungi shia arur joko kodanga masütsü. Tasübai pa dak yimsü masür ta asenoki metet.

¹⁰ Kechiyong koba tasüba agi asü, pai aji teti asoshi khen temenen nung asü, saka tang pa taküm alibaji pai aji Tsüngrem dak taküm alir.

¹¹ Yamaji nenoka nenok sasa temenen nung asü, aser Khrista Yisu nung Tsüngrem dak taküm alir ta züngshiang.

¹² Anungji nenok tasütsüba temang tejangrabatem dang nenoki tashi anga-a makümtsü asoshi joko nenok tasütsüba temang madak temenen nem yimsü tesüdaktsü.

¹³ Mesüra nenok tenük telentem tamajungba nok o nü ama temenen nem tagütsü; saka tasüba nungi taküm dangi shia aruba nisungtem ama nenok pei takümji aser nenok tenük telentemji temeshiba nok o nü ama Tsüngrem nem agüjang.

¹⁴ Kechiyong nenok madak temenen kibur makümtsü, kechiyong nenok ozüng kübok masü, saka taochi kübok lir.

Temeshiba Lartem

¹⁵ Ajangla kechi? Asenok ozüng kübok masü, saka taochi kübok alinung asenoki temenen inyaktsü asü? Yamaji kodanga masü!

¹⁶ Nenoki tashi anga-a shiba nem pei sasa alartem ama bendanga agütsür, oda tasüba dangi anisang temenen atema süshia mesüra temeshiba dangi anisang tashi angatsü atema süshia, nenoki shiba dang tashi angar pa purtem nenok lir ta memetet no?

¹⁷ Saka Tsüngrem nem tenüngsang agüjang, kechiyong nenok temenen lartem liasü, saka nenoki temulung ajak agi nenok nem agütsüba tesayuba nung tashi anga,

¹⁸ aser temenen nungi nüji kümer külen, nenok temeshiba lartem küma lir.

¹⁹ Nenok dak shi tashi maitbatem alinung nenok den nisung ama jembir. Kechiyong akhi mapang nung tamajung nükjidong asoshi nenoki kechi koda nenok tenük telentem memerükba nem bendanga agütsü, aji oda tang nenok tenük telentem temeshitettsü asoshi temeshiba lartem ama bendanga agüjang.

²⁰ Kechiyong kodang nenok temenen lartem liasü, nenok temeshiba kübok maliasü.

²¹ Ajangla tang nenoki koba mapatem atema aaker, item nungjagi nenoki kechi tajangzük tajung angu? Item mapa tatembangji tasüba lir.

²² Saka tang temenen nungi nenok nüji kümtetogo, aser nenoki meyipa anguba tajangzükji temeshitetba lir aser iba tatembangji teti taküm lir.

²³ Kechiyong temenen taaji tasüba lir, saka asen Kibuba Yisu Khrista nung Tsüngrem angati sempetji teti taküm lir.