ROM NUNGER DANGI PAUL SHITI 3 - Ao Naga CL Bible - SQC Edition (BSI)

¹ Ajangla Yihuda nungba asoshi kechi tajangzük aka? Mesüra mejeptokba tajangzük kechi?

² Lenmang aisü nung, mezüngbuba nung Yihuda nunger nem Tsüngrem O agütsü.

³ Saka kari mamangbaji kechi ali? Parnok mamangba jagi Tsüngrem temulung lemtetba ajemdaktsür asü?

⁴ Yamaji kodanga masü! Nisung shiaji yazür liaka, Tsüngrembo ochi lir ta metetang. Zülua aliba ama: “Ne o nung ochi ta metentsü asoshi, aser na obendangba nung takoker asütsü.”

⁵ Saka asenok majungba agi Tsüngrem temeshibaji shisanga sayura asenoki kechi ashitsü? Pa ain adokba alima nung adokdaktsüra, Tsüngrem majung ta asenoki ashitsü asü? (Nisung ka ama ni jembir)

⁶ Yamaji kodanga masü! Yamaji ka süra, Tsüngremi koda alima o bendangtsü?

⁷ Saka kü tiyazü o ajanga Tsüngrem ochishiba nem sentsüwangshi agütsüra ni ano menen pur ka ta aitsütsü asü?

⁸ Tajung arutsü asoshi tamajung inyaktsü asü? Yamaji asenoki jembir ta kari mezüngmeshia ashi. Parnokji aitsütsü tim dang lir.

Temeshiba shinga mali

⁹ Ajangla kechi? Bendangertem dang nungi asenok Yihuda nunger tia tajungba asü? Nunga, kodanga masü! Kechiyong Yihuda nungertem aser Grik nungertem anaprongla temenen ain kübok lir ta asenoki tejaklen aitsüogo.

¹⁰ Zülua aliba ama: “Shinga temeshiba mali, ka danga mali;

¹¹ Tangatetba shinga mali, Tsüngrem bushiba shinga mali.

¹² Parnok ajak mashileni ao; parnok külemi amajok aküm. Tajung inyakba shinga mali; ka danga mali.

¹³ Parnok terok lep lapokba ama lir, Parnoki parnok temeli agi tekülak o jembir. Parnok tebangmechi nung per mim lir.

¹⁴ Parnok tebang atakatem aser taku agi sünga lir.

¹⁵ Azü tokshitsü asoshi parnok tetsüng tekara.

¹⁶ Parnok lenmang nung teraksaba aser timtem toushi lir

¹⁷ Aser parnoki tesünep lenmang memetet.

¹⁸ Parnok jakdang Tsüngrem tsübuba mali.”

¹⁹ Tang tebang shia shibangtsü asoshi, aser alima nung alir ajak Tsüngrem madang obendangba küboki anir arutsü asoshi, itemji ozüng kübok alirtem dang ashir ta asenoki metet.

²⁰ Kechiaser ozüng mapatem agi pa jakdang shinga memetendaktsütsü. Kechiyong ozüng ajanga temenen meteta arur.

Tamang Ajanga Temeshiba

²¹ Saka tang ozüng medeni Tsüngremer temeshiba temeten jungkai adokogo. Ozüng aser ainkartemi atangji ya asoshi kuli agütsü.

²² Iba Tsüngremer temeshibaji Yisu Khrista dak tamang ajanga tamanger ajak asoshi lir. Kechiyong kecha telemsa mali.

²³ Kechiaser ajaki temenen mena aser Tsüngremer sentsüwangshi matong.

²⁴ Saka Khrista Yisu nung aliba talangzükba ajanga pa taochi agi angati sempet ka ama parnokji metendaktsür.

²⁵ Kechiyong Tsüngrem pa taremzükba agi tejaklen inyakba temenen mezüngshi nung tang temeshiba sayutsü asoshi, pai Khrista Yisu pa zü agi tamang ajanga agizüktsü, tekümtet tenla atema yok.

²⁶ Oda tang mapang nung Tsüngremi pei temeshibaji lir ta, aser Yisu dak amangbapur pai metendaktsür ta kuli agüja sayutsü asoshi liasü.

²⁷ Ajangla asükümba jenjang kong ali? Ibaji jentokogo. Kobala ozüng ajanga? Mapa inyakba ajanga asü? Masü, saka tamang ajanga.

²⁸ Anungji ozüng mapatem medeni nisung kaji tamang ajanga dang metendaktsür ta asenoki metet.

²⁹ Mesüra Tsüngremji Yihuda nunger Tsüngrem dang asü? Paji Bendangertem Tsüngrema masü no? Hau, Bendangertem Tsüngrema lir.

³⁰ Kechiaser Tsüngrem ka dang asü nung, pai temejeptokbatem aser memejeptokbatem anaprongla kasa tamang ajanga metendaktsütsü.

³¹ Ajangla tamang ajanga asenoki ozüngji amajok kümdaktsür asü? Yamaji kodanga masü! Saka asenoki ozüngji akangdaktsür.