ROM NUNGER DANGI PAUL SHITI 11 - Ao Naga CL Bible - SQC Edition (BSI)

Israel Tanüngbapur

¹ Ajangla ni ya asüngdangnür, Tsüngremi pei nübur jentok asü? Yamaji kodanga masü! Kechiyong nia Israel nunger ka. Abraham semchir aser Benjamin kidong nungi lir.

² Tsüngremi pei nübur mejentok. Alemli nungi parnokji pa meyong ta pai metet. Elijai Israel anema Tsüngrem dang mepishiba indang Laishiba nung ashiba nai memetet no?

³ “Kibuba, parnoki ne ainkartem tepsetogo, kü kija anünga lir, parnoki ne tenla sabangtem raksatsüogo; aser kü taküm a bushir.”

⁴ Saka Tsüngremi langzübaji kechi liasü? “Ni asoshi Baal tsüngrem madang mapudakba nisung meyirijang tenet anünga yua lir.”

⁵ Yamaji tang mapang nunga taochi agi shimtetba yari tanüngba pur lir.

⁶ Saka ibaji taochi agi süra, ibaji mapa agi masü, aji mesüra taochiji joko taochi masü.

⁷ Ajangla kechi? Israeli kechi bushi aji mangu, saka teshimtetba puri aji angu, aser tanüngbatem temulung merangdaktsü.

⁸ Zülua aliba ama, “Tsüngremi parnok nem anüalemba tanela, mangutsüba tenük, aser mangashitsüba tenarong agütsü,” aser tanü tashi yamaji lir.

⁹ Aser Dawidi ashir: “Parnok chiyungba langbang parnok asoshi, sang aser lungnen aser temetsüdak dak, aser temerenshi ama südakjang.

¹⁰ Parnoki mangutsüsa tenük mangdakjang, aser parnok teperem teti mokremdakjang.”

Bendangertem Tekümtet

¹¹ Ajangla ni ashir, parnok samatsütsü asoshi parnok tetsüng metsü asü? Yamaji kodanga masü. Saka parnok tenük meremdaktsütsüsa parnok laoba agi Bendangertem dangi tekümtet aru.

¹² Tang parnok laoba jagi meimchir takar kümra, aser parnok samaba jagi Bendangertem takar kümra, ajangla Israel nunger kümzükra, Bendangertem koda tali takar akümtsü!

¹³ Saka tang nenok Bendanger-tem dang ni shinür. Ni Bendangertem asoshi tenyar ka asü nung ni kü tenzükba nung tetushi agütsür;

¹⁴ kü nübur tenük merema kümdaktsüdisü aser parnok kar danga kümzükdisü ta imlaa inyaker.

¹⁵ Kechiyong parnok jentokbaji meimchir ajonga Tsüngrem den putepdaktsütsü atema süra, parnok agizükbaji tasüba asoshi taküm masü ama?

¹⁶ Aser mezüngbuba süngjangji temeshi süra, tanga ajakji yamaji lir. Aser süngdong teraji temeshi süra, kongsangtema yamaji lir.

¹⁷ Saka kongsang kar raksara, aser na arem oliv totzü süng asünung, parnok rongnung alenlok aser parnok den denra, ajangla nai oliv süngdong aser tera nungi na taküm alir.

¹⁸ Saka nai kongsangtem asoshi ulua tebilem, teraji nai mesür masü, saka, tera-i na mesür.

¹⁹ Idangji nai ashitsü, “Ni amenloktsü asoshi kongsangtem raksa.”

²⁰ Hau, parnoki mamangba agi parnok raksa, aser nai ne tamang agi noktaker. Anungji temulung ulua teli, saka tsübua liang.

²¹ Kechiyong Tsüngremi kongsangtem metangloktsüra, nenoka metangloktsütsü.

²² Anungji Tsüngrem kümli tajung aser sashibaji ajiang; telaortem tsütsü tesashi, saka nai Tsüngrem kümli tajung nung maneni lira, ne tsütsü pa kümli tajung alitsü. Aji oda mesüra pai na-a leptoktsü.

²³ Aser parnoki mamangba nung joko melira parnok amenloktsü, kechiyong parnok tanaben amenloktsütsü Tsüngremi koka lir.

²⁴ Kechiyong na arem oliv totzü süng, süngdong tajung nung amenloktsüra, idangji kongsangtem, pei oliv totzü süng nung koda tali amenloktsütsü.

Israel-pur Kümzükba

²⁵ Kechiyong adianutem, nenok mashiokdaktsütsü asoshi iba miim o indang ni nenok nem memeteti melidaktsünür. Bendangertem tanaben tabensaba küma maru tashi Israel pur tesadang ka shi temulung meranga akümtsü.

²⁶ Aji oda Israel pur ajak kümzüktsü. Zülua aliba ama: “Tekümzükbaji Zion nungi adoktsü. Pai Yakob nungi memeshiba endoktsütsü.

²⁷ Aser ni kodang parnok temenen agiendir, parnok den kü tezüngzüktepba ibai alitsü.”

²⁸ Osangtajung sayutsüngiba len nungi parnok ne tsükchirtem, saka Tsüngremi tetsü-teboutem shimtetbaren nungi parnokji temeimbatem aküm.

²⁹ Tsüngremi agütsüba sempet pai meyipa magir, aser shimtetba indang temulung memelenshir.

³⁰ Kechiyong nenoki akhidang Tsüngrem dang tashi manga, saka tang parnok tashi mangaba agi nenoki yimlibilem angu.

³¹ Yamaji nenok dang sayuba yimlibilem agi tang parnok yimlibilem angutsü asoshi tang parnok tashi mangai lir.

³² Kechiyong Tsüngremi ajak dang yimlibilem sayutsü asoshi ajak tashi mangaba nung shibanga ayu.

Tsüngrem Tenüng Sangang

³³ Tsüngrem shisatsü aser temetetba koda tarok! Pa o bendangba bushitettsü aser lenmang tsüngsü aputsü koda tamakoktsü?

³⁴ “Kechiyong shibai Kibuba temulung metet? Mesüra shiba pa kübok teshisadanger aküm?

³⁵ Mesüra shibai tamasa pa nem agütsü? Aser pa nem tanaben meyipa agütsüla?”

³⁶ Kechiyong ajak pa dak nungi, aser pa ajanga, aser pa atema lir. Pa dang teti sentsüwangshi sang! Amen.