ROM NUNGER DANGI PAUL SHITI 10 - Ao Naga CL Bible - SQC Edition (BSI)

Israeli Ochi Lenmang Mebushitet

¹ Adianutem, kü mulung teyongyaba aser Tsüngrem dang Israel nübur asoshi kü sarasadembaji parnok tekümtet asoshi lir.

² Kechiyong Tsüngrem atema parnok dak tejangraba lir ta ni parnok dang kuli sütet. Parnok tejangrabaji tangatetba ama masü.

³ Kechiyong Tsüngrem nungi aruba temeshibaji parnoki memetet nung pei sasa ibaji angutsü bushia Tsüngrem temeshiba küboki parnok mai.

⁴ Kechiyong tamang akar shia metendaktsütsü asoshi Khristaji ozüng tatembang lir.

Ajak asoshi Tekümtet

⁵ Mosai ya zülu. “Oda shibai ozüng dak metaloker temeshibaji inyaker pai iba agi taküm alitsü.”

⁶ Saka tamang dak amendakba temeshibai yamai ashir “Shiba kotaki atutsü ta temulung nung teshi” tetezü Khrista anir alutsü atema,

⁷ mesüra, “Shiba bonglang makaba ongkeni alutsü?” Tetezü Khrista tasüba nungi anitettsü atema.

⁸ Saka iba jagi kechi ashir? Tsüngremer Osangtajungji na anasa, ne bang aser ne mulung nung lir. Oda onoki sayutsüngiba tamang o.

⁹ Kechiaser nai ne tebang agi Yisuji Khrista ta nangzükra, aser ne temulung nung Tsüngremi pa tasü nungi shia arudaktsü ta amangra, na kümzüktsü.

¹⁰ Kechiyong temeshiba akümtsü asoshi nisungi temulungjang telung nungi amanger, saka tekümtet angutsü asoshi tebang agi nangzüktsüla.

¹¹ Kechiyong Laishibai ashir, “Shibaisa pa dak amangdir pa makdaktsütsü.”

¹² Kechiyong Yihuda nunger aser Bendanger tsüngda nung kecha balala mali; kechiaser Kibuba kasaji ajak madak Kibuba lir. Aser pa dang ajabapur ajak dang pai moshia moatsür.

¹³ Kechiyong ‘Shibaisa Kibuba tenüng nung jadir kümzüktsü.’

¹⁴ Ajangla pa dak mamang nung pa dang parnoki koda ajatsü? Aser parnoki pa indang mangashi nung kodaser pa dak amangtsü? Aser sayutsüngir ka melira, parnoki koda angashitsü?

¹⁵ Aser parnokji meyokra kodaser parnoki sayutsüngitsü? Zülua aliba ama, “Osangtajung indang sayutsüngirtem tetsüngji koda tobur tajung!”

¹⁶ Saka osangtajungji parnok ajakibo magizük. Kechiyong Isaiai ashi, “Kibuba shibai onok osang amang?”

¹⁷ Anungji tamangji tangashiba nungi arur, aser tangashibaji Khrista indang sayutsüngiba nungi arur.

¹⁸ Saka ni asüngdangnür, parnoki mangashi asü? Hau, atangji parnoki angashiogo. Lai nung ashiba ama: “Parnok ola alima ajakleni ao, aser parnok osang alima tatem tonga ao.”

¹⁹ Saka ano ni ya ashir, Israel nungertemi mangatet asü? Tamasa Mosai ashi, “Koba kin mali, iba agi ni nenok tenük meremdaktsütsü. Shisa makaba kin agi ni nenok ain adokdaktsütsü.”

²⁰ Aser Isaiai kanga tasü ita ashir; “Shirnoki ni mebushi parnoki ni angu; aser shirnoki kü indang masüngdang parnok dang ni kü sasa jungkai adok.”

²¹ Saka Israel nungertem indang pai ya ashir, “Tashi mangaba aser tekong merangba pur dang anogo tepiyong ni kü teka songlaogo.”