NAHUM 1 - Ao Naga CL Bible - SQC Edition (BSI)

¹ Nineve indang shinba, Elkos nunger Nahum mangdang kaket.

² Kibuba tenükmiba Tsüngrem aser mang ayanger; Kibubai mang ayanger aser terasaba agi sünga lir, Kibubai pa anemertem dak mang ayanger, aser pa tsükchirtem asoshi pai terasaba ayur.

³ Kibuba ain adoktsü mekara, aser tashi tulu, aser Kibubai taipurji kodakanga tai maka ta masütsü. Tsüngrem mopung nung aser yipru nung Kibuba pei lenmang lir, aser mepettemji pa tetsüng auyi lir.

⁴ Pai tzüyim arütsür, aji kongdaktsür, aser ayong ajak pai kongdaktsür. Bashan aser Karmel akonger aser Lebanon Tobur ajung azülar.

⁵ Pa madang tenemtemi anokshir, aser ungsemtem yimsar; aser pa tsüngdang alima teraksa akümer, alima aser yangji alir ajak.

⁶ Pa ain aitba madang shibai noktaktettsü? Aser pa ain sashia adokdang shibai aremtsü? Pa mit mi ama tokzüker aser lungtemji pai ajasatsür.

⁷ Kibubaji tajung lir, timtem anogo nung tashi tait mitsa ka; aser shirnoki pa dak jenoker pai kümzüker.

⁸ Saka moshia ayimba tzümetsüng agi pa anemertem temshia tatembang kümdaktsütsü, aser tammang tashi pa tsükchirtem arishitsü.

⁹ Kibuba anema nenoki kechi tasa asar? Pai temshia tatem kümdaktsütsü; pai tsükchirtem dak anaben tashi mang ayangtsü.

¹⁰ Yilongpur ama parnok mesepa lir, ayi tebenja ama parnok liaka, motembang takong ama parnok khenyongi raksatsü.

¹¹ Kibuba anema tamajung shisar, tamajung mapa tasa asar ka na nungi adoka lir.

Yihuda Asoshi Osangtajung

¹² Yamai Kibubai ashir, “Parnok tashi tait aser jenti saka, parnok leptokadoktsü aser süia oadoktsü. Ni na timtemdakja, ni joko na tim metemdaktsütsü.

¹³ Aser tang ni na nungi süngra raksatsütsü aser ne talenba tokdangtsütsü.”

¹⁴ Kibubai ne indang temelaba agütsüogo. “Joko ne tenüng meproktsü, ne tsüngremtem kidang nungi chitetba noksa aser temulutetba noksa ni leptoktsü, ni ne leper yanglutsü, kechiyong na metemsüi lir.”

¹⁵ Shibai tenem manung osangtajung bener arur aser yimjung sangoktsür, pa tetsüngji ajiang! Ne benjongbentsü mungang. Oh Yihuda, ne tatemzükba inyakang, kechiyong na ajanga tamajunger mesüitsü, paji khenyongi leptokadokogo.