MIKA 1 - Ao Naga CL Bible - SQC Edition (BSI)

¹ Yihuda chubatem Yotham, Ahaz aser Hezekia tendak Moreshet nunger Mika dangi Kibuba O aru, mangdang nung Samaria aser Yirusalem indang pai angu.

Samaria Aser Yirusalem Anema Obendangba

² Angang, Oh kintem, nenok ajak! temulung tenang, Oh alima, aser yangji aliba ajak! Aser Kibuba pa pei temeshi tenla ki nungi nenok anema Kibuba Tsüngrem kuli südakjang.

³ Kechiyong ajiang, Kibuba pa talidak nungi adoker, aser pa alutsü aser alima takongtem dak ajemshitsü;

⁴ aser pa kübok tenemtem yimsa aotsü, aser mi madang nirep ama, lungren nungi tzü shizüka yok ama, lententemji sadangtsü.

⁵ Ya ajak Yakob ozüng raksaba, aser Israel kidong temenen yong lir. Yakob ozüng raksaba kechi? Aji Samaria masü no? Aser Yihuda temaba tesemji kechi? Aji Yirusalem masü no?

⁶ Anungji ni Samaria moapu nung nangtenba telong ka tsükmenatzü tsüki yangludak kümdaktsütsü, aser la lungnang ni lenteni meküpzüka yoktsü, aser iba kimung ni bushitettsü.

⁷ Aser la süngyanglu yangluba ajak anüka akusatsü, aser lar ayanger ajak mi agi rongtoktsü, aser la süngyanglu ajak ni azüngmeyaka yutsütsü; kechiyong jabujaria ayangba nungi lai itemji benden, aser jabujaria ayanger dangi itemji meyiptsü.

Yihuda Yimtitem Asoshi Taoksatsü

⁸ Iba asoshi ni mang yima ajebtsü aser asatsü, ne tetsüng tesa aser mangsa aotsü; shirong ama ni asatsü, aser ostrich ozü ama mang ayimtsü.

⁹ Kechiyong la zübu anebtsü makok, kechiyong aji Yihudaia aruogo; iba jagi kü nübur süngkhüm oda Yirusalem tongogo.

¹⁰ Gat nung aji teshi, teraka tejebma, Beth-leafra nung nenok sasa auyi nung longzüang.

¹¹ Shafir nunger, nenok mangsa aser maksü nung süia oang; Zaanan nunger, nenok tadok. Beth-ezel ajepba agi nenok nungi talidak agientsü.

¹² Kechiyong Marot nunger tajung asoshi yongyaseta atar; kechiaser Yirusalem süngkhüm tashi, Kibuba nungi tamajung alua lir.

¹³ Lakis nunger, kor tekara dak talungtsü sendaklokang; Zion jalatem asoshi temenen tetenzükji nenok liasü kechiyong Israel ozüng raksaba nenok dak angu.

¹⁴ Anungji tepilaba sempet Moreshetgat nem nai agütsütsü; Israel chubatem asoshi Akzib kidongji tekülakoktsür lir.

¹⁵ Maresha nunger, nenok madak tongbang akoker ka ni anir arutsü. Israel sentsüwangshi Adullam tashi arutsü.

¹⁶ Ne sasa lemtsü kümang aser ne ku südokang, nai meimba chirnur asoshi hogon mesüka ne sasa südokang, kechiyong parnok na nungi tepuokdaki ogo.