MATHI 28 - Ao Naga CL Bible - SQC Edition (BSI)

Yisu Shia Aruba

¹ Amungnü süir külen, deobar anepungi Mari Magdalin aser tangar Mari leperji ajidangi aru.

² Aser ajiang, menoknok tulu anok, kechiaser Kibuba tenyar ka kotak nungi alu, aser arua lungji meküptok aser iba manungji amen.

³ Pa tereprangtsü tsüngpret ama aser pa sü rüjep ama temesüng liasü.

⁴ Pa tsüngken tsübuba agi tanükertemji atenten aser tasü ama aküm.

⁵ Aser kotak tenyar jagi tetsürtem dang ashi, “Nenoki tetsübu, kechiyong Yisu shiba kangki nung angenlok, nenoki pa bushir ta ni metet.

⁶ Pa yangi mali, kechiyong pai ashiba ama, pa shia aruogo; arung pa mejangdak ajiang.

⁷ Nenoki yakta oang aser pa nütsüngtem dang shiang, pa tasü nungi shia aruogo aser pa nenok dang tama Galil-i aotsü, aser idakji nenoki pa angutsü. Ajiang, ni nenok dang shiogo.”

⁸ Tetsübu aser tepela tulu nung parnoki leper nungi ilunga oadok, aser pa nütsüngtem dang sangoktsütsü asoshi asema ao.

⁹ Aser ajongbena Yisui parnok ajurua ashi, “Junga liang.” Parnoki arua pa tetsüng nung sota külem.

¹⁰ Idangji Yisui parnok dang ashi, “Tetsübu, oang, aser kü adianutem dang Galil-i oang ta shiang aser idakji parnoki ni angutsü.”

Tanüker Osang

¹¹ Tetsürtemji oya alidang, ajiang, tanüker kari yimti jagi ao aser kechisa atalok aji puti-ungertem dang sangoktsü.

¹² Parnoki tamburtem aniten aser jembiteper külen, parnoki temerangertem nem sen aika agüja ashi,

¹³ “Onok mejanga alidang pa nütsüngtem aru aser pa mang bener oadok ta nenoki shiang.

¹⁴ Aser ibai governori angashira, onoki pa mesüzüktsü aser nenok lendong nungi kümzüktsü.”

¹⁵ Anungji parnoki senji agizük aser parnok dang ashiba ama inyak. Iba osang ya Yihuda nunger rongnung ayimsünga prokshia ao aser tanü tashi parnoki aji oda jembia arur.

Nütsüngtem Tenyaba

¹⁶ Saka nütsüng terkaji Galil nung aliba, Yisui parnok dang ashiba tenemi ao.

¹⁷ Aser parnoki kodang pa angu, parnoki pa külem, saka karibo atsüa-ayonga liasü.

¹⁸ Yisui arua parnok den jembia ashi, “Kotak nung aser alima nung tashi-ain ajak kü nem agütsüogo.

¹⁹ Anungji nenoki oang aser kin ajak nütsüng kümdakjang, Tebu, Techir aser Tanela Temeshi tenüng nung parnok baptijang.

²⁰ Aser ni nenok dang kechisa mela, item ajak benshitsü parnok dang sayuang; aser ajiang alima tatem tashi ni nenok den teti alitsü.”