MATHI 27 - Ao Naga CL Bible - SQC Edition (BSI)

Yisu Pilat Tsüngdang

¹ Tang anepdang akümdang putiungertem aser nübur tamburtem ajak Yisu südaktsütsü asoshi pa anema parnoki jembitep,

² aser parnoki pa alena anir oa, Pilat governor ket nung bendanga agütsü.

Yihuda Iskariot Asüba

³ Idangji Yihuda, shibai Yisu bendanga agütsü, pai Yisu aitsüba ngua, pei sasa temulung meyip, aser puti-ungertem aser tamburtem dangi taribi sen semerji meyipa bener arua ashi,

⁴ “Tai maketba nisung bendanga agütsüba ajanga ni temenen benshiogo.” Saka parnoki ashi, “Onoki aji agi kechi asütsü? Aji ne tebilemtsü sang.”

⁵ Idangji pai tenla kidang senji pataka toktsür ao, aser pai oa pei sasa soseta asü.

⁶ Puti-ungertemi senji bena arua ashi, “Ya azü alang asünung, yabo temeshi tenla senbong nung ayutsü tim masü.”

⁷ Yamaji parnoki jembitep, aser iba sen jagi Bendangertem mang aremtsü asoshi poteper li ali.

⁸ Anungji iba li dangji tanü tashi “Azü li” ta ajar.

⁹ Anungji Yerimia ainkari jembizüka yutsüba o ya oda atalok, “Israel chirtem kari shiba indang jenjang atet, iba jenjang atetba nisung talang sen semerji parnoki bena aru,

¹⁰ aser Kibubai kü dang ashiba ama parnoki aji poteper li asoshi agütsü.”

Pilati Yisu Dang Asüngdangba

¹¹ Tang Yisu governor tsüngdang noktakdaktsü aser governori pa dang asüngdang, “Na Yihuda nunger Chubaji asü?” Yisui langzü, “Nai yamaji ashir.”

¹² Puti-ungertem aser nübur tamburtemi pa aitsüdang, pai kecha melangzü.

¹³ Idangji Pilati pa dang ashi, “Parnoki na anema kuli kwika agütsür aji nai mangashir no?”

¹⁴ Saka pai o kata melangzü, aji asünung governorji kanga süngmang.

Yisu Asütsü O Bendangba

¹⁵ Iba benjong nungji teloki mulungba ama tepuokdak alir ka parnok dangi chioktsüji governor yimsü liasü.

¹⁶ Iba mapang nungji Baraba ta sür nüngtugu ka tepuokdak yua liasü.

¹⁷ Anungji parnok külemi sentepa alidang, Pilati parnok dang ashi, “Nenok dangi shiba chioktsü nenoki mulunger? Baraba asü mesüra Khrista ta ajaba Yisu?”

¹⁸ Kechiaser mokokaji agi parnoki Yisu bendanga agütsü ta pai metet.

¹⁹ Tang Pilat obendangba menden nung mena alidang, pa tebutsüi pa dangi osang ka yoka ashi, “Iba tai maketba nisung asoshi nai kecha teinyak; kechiaser tanü ni pungmang nung pa atema kanga timtemogo.”

²⁰ Saka Yisu südakjang aser Baraba meshizükang ta puti ungertemi aser nübur tamburtemi telok mesüzük.

²¹ Pilati parnok dang langzü, “Item ana rongnung nenok dangi ni shiba chiokdaktsünür?” Parnoki ashi, “Baraba.”

²² Pilati parnok dang ashi, “Ajangla, Yisu shiba dang Khrista ta ajar, pa dang ni kechi inyaktsü?”

²³ Parnok ajaki langzü, “Pa kangki nung angenlokang!” Aser pai ashi, “Kechiba? Pai kechi tai inyak?” Saka parnoki kanga ayimtena ashi “Pa kangki nung angenlokang.”

²⁴ Anungji kodang Pilati pa o matalokba angu, aser telok rongrongshishi adokba ngua pai tzü bena aru aser telok madang teka metsüka ashi, “Iba temeshi nisung azü atema kü dak tai maket, aji nenok sasa sang.”

²⁵ Idangji telok ajaki langzü, “Pa zü onok madak aser onok chirtem madak kaoang.”

²⁶ Idangji pai Baraba parnok dangi chiok, saka pai Yisu dak merang ayi aketba lisü agi repdaktsü aser kangki nung angenloktsü bendanga agütsü.

Temerangertemi Yisu Menütsüba

²⁷ Idangji temerangertemi Yisu Governor kidangi anir ai aser temeranger telok ajaki pa dangi sentep.

²⁸ Parnoki pa süoshi shizük aser nakrema meremba sü ka pa nem abendaktsü.

²⁹ Aser parnoki ai mesena yangluba chuba korang ka pa tekolak nung semoktsü aser pa teka tajichilen tzütok ka amoktsü; aser parnoki pa madang apudaker pa atala ashi, “Yihuda nunger Chuba, sangang!”

³⁰ Aser parnoki pa dak metsü metsüloktsü aser tzütokji agizüker pa tekolak nung azük.

³¹ Aser parnoki pa sensatsür külen, pa nungi nakrema meremba süji agizük, aser pa nem pei süoshi abendaktsü, aser pa kangki nung metaloktsü anir ao.

Yisu Kangki Nung Angenlokba

³² Parnok adokdang, Cyrene nunger nisung ka tenüng agi Simon parnoki ajurua, pa nem Yisu kangki kangshia apudaktsü.

³³ Kodang parnoki Golgotha, tetezü “Tekolak-ret” ta ajaba tesem kati aru,

³⁴ parnoki Yisu nem taku den meyokteper yi tajemtsü agütsü; aser pai aji menakdanger magizük.

³⁵ Aser parnoki Yisu kangki nung angenloker, an-tokdanga pa süoshi parnok rongnung lemsa agi.

³⁶ Idangji parnoki idakji mener pa nüka ali.

³⁷ Aser parnoki pa aitsüba kuliji, “IBAI YIHUDA NUNGER CHUBA YISU” ta zülur pa tekolak manung neploktsü.

³⁸ Iba mapang nung ashi-auür ana, ka tajichilen, ka tabelen ta angenloka yutsü.

³⁹ Anasa süisübongertemi pei tekolak angemlokja pa sensatsü.

⁴⁰ Aser ashi, “Tenla ki raksar aji asemnü nung yanglutsüba na, ne sasa kümzükang. Na Tsüngrem Chir süra kangki nungi alung.”

⁴¹ Yamaji putiungertem, tezülurtem aser nübur tamburtem ajaki pa atala ashi,

⁴² “Pai tangarbo kümzük, peibo mekümzükteter! Pa Israel nunger Chuba! Tang pa kangki nungi aludakjang; idangji onoki pa dak amangtsü.

⁴³ Pai Tsüngrem dak temulung alem; Tsüngremi pa dang pelar süra, tang pai pa kümzükdakjang, kechiaser pai ashi, ‘Ni Tsüngrem Chir.’ ”

⁴⁴ Pa den kangki nung angenlokba ashiauürtemia yamajisa pa atala.

Yisu Asüba

⁴⁵ Tang terana baji nungi asem baji tashi alima ajonga mangadok.

⁴⁶ Aser asem baji shi nung Yisui ola tulu agi ayimtena ashi, “Eloi, Eloi lama sabakthani?” Iba tetezü, “Kü Tsüngrem, kü Tsüngrem, kechiba nai ni toktsür?”

⁴⁷ Idakji noktaka alirtem kari aji angashidang ashi, “Pai Elija jadagi.”

⁴⁸ Idangyongji parnok rongnung kati asema oa renrajeb bener arua aji tasentzü agi süngdaktsür, rangdong ka nung ataloker pa nem tajemtsü agütsü.

⁴⁹ Tangar kari ashi, “Oda tokjang! Elija pa kümzüktsü arudisü marulir asenoki reprangdi.”

⁵⁰ Aser Yisui tanaben ola tulu agi ayimten, aser pei tanela odaktsü.

⁵¹ Aser ajiang, tenla ki teyindangba sü temalen nungi ali tonga ana küma shima, aser menoknok anok, aser lungtem jakma.

⁵² Idangji lepertem lapok, aser mejanga aoba temeshipur temang aika shia arudaktsü.

⁵³ Aser pa shia arur külen leper nungi adoka parnoki Temeshi Yimti-i ia aika nem ngudaktsü.

⁵⁴ Kodang noklang madak tanishiba aser pa den Yisu nüka alirtemi menoknok aser tatalokbatem angu, parnoki kanga tsübua ashi, “Atangji ibai Tsüngrem Chir liasü.”

⁵⁵ Aser Galil nungi Yisu yarir, pa sülen anitaker tetsür jenti-i oji nungi ajia liasü.

⁵⁶ Parnok rongnung Mari Magdalin, Yakob aser Yosef tetsü Mari, aser Zebedi chirtem tetsü dena liasü.

Yisu Aremba

⁵⁷ Kodang nikongtsütsü aküm, Arimathia nunger takar nisung ka shiba Yisu nütsüng ka kümer liasü; pa tenüngji Yosef liasü.

⁵⁸ Iba nisungji Pilat dangi ao, aser Yisu temang meshi. Idangji Pilati aji agüjang ta mela.

⁵⁹ Anungji Yosefi Yisu temang meshizük aser sü temerük aser tanük agi mei.

⁶⁰ Aser pai lung angenpoka aliba, pei leper tasen nung aji ayu, aser pai leper kishi nung lung tulu ka meküploka toktsür ao.

⁶¹ Mari Magdalin aser tangar Mari leper kümbang nung mena liasü.

Leper Nung Tanüker

⁶² Tananü, aji terenemba anogo sülenji liasü, puti-ungertem aser Farisitem Pilat dangi külemi sentep,

⁶³ aser ashi, “Tulur, iba ashikülakbai pa taküm alidang ashi, ‘Asemnü lir ni shia arutsü,’ ibai onoki bilemteter.

⁶⁴ Anungji asemnübuba tashi leperji anüktsü ozüng agüjangma. Aji ta mesüra nütsüngtem arutsü aser pa mangji auyar aotsü aser nüburtem dang pa tasü nungi shia aruogo ta ashitsü. Idangjibo mezüng tai dang nungi tesü taiji tamajungba asütsü.”

⁶⁵ Pilati parnok dang ashi, “Nenok tanükertem kar. Nenoki oang aser aji nenoki akok tashi nükdakjang.”

⁶⁶ Anungji parnoki ao aser parnok den tanükerji dena lung nungji temaitsü ajena, leperji nükdaktsü.