MATHI 25 - Ao Naga CL Bible - SQC Edition (BSI)

Aiür Ter Agi O-entepba

¹ “Idangji Kotak Yimliji tasüngtet aiür ter milen bener kiyimsang ajurutsü aoba mesüka alitsü.

² Parnok rongnung pungu tamashi aser pungu shisa taka liasü.

³ Kechiyong tamashi pungu jagi parnok milen aben saka totzü maben;

⁴ Saka shisa akartemi pei milen den tagi nung totzü aben.

⁵ Saka kiyimsangji mapang talangka menua liasü aser parnok anünüa amua oadok.

⁶ “Saka ayatrem nung ayimtenba ola adok, ‘Kiyimsang ajiang! Pa den ajuruteptsü arung.’

⁷ Idangji item tasüngtet aiür ajakji arameso aser pei pei milen renem.

⁸ Aser tamashirtem jagi shisa akartem dangji ashi, ‘Nenok totzü nungjagi onok nema tera kua, kechiaser onok milen sepdagi.’

⁹ Saka shisa akartem jagi ashi, ‘Ashiko onok aser nenok asoshibo totzü jagi mepiritsü akok; anungji nenoki tayokertem dangiang oang, aser nenok asoshi aliang.’

¹⁰ Parnok talitsü oya alidang kiyimsang aru aser shirnok renema liasü parnok pa den benjong jagi ao; aser kishiji shibangadok.

¹¹ “Tesülen tanüngba tasüngtet aiürtemji arua ashi, ‘Kibuba, Kibuba, onok nem kishi lapokjang.’

¹² Saka pai langzü, ‘atangji ni nenok dang ashir, ni nenok memetet.’

¹³ Anungji saksalema liang, kechiaser anogoji mesüra mapangji kodangar nenoki memetet.

Sen Mori Agi O-entepba

¹⁴ “Kechiaser ibai nisung kati pei kilirtem ja-a arua, pei oset parnok nem bendanga agütsür linük tanga kati aoba mesüker.

¹⁵ Pai ka nem sen mori pungu; ka nem mori ana aser ka nem mori ka, ta nisung shia nem pei akokba yari agütsü aser pa aeni ao.

¹⁶ Idangji sen mori pungu agizükbai oa aji agi shishia, ano sen mori pungu tali ajangzük.

¹⁷ Aji oda mori ana agizükbaia ano mori ana tali ajangzük.

¹⁸ Saka shibai sen mori ka agizük, pai oagi ali tur pei kibur sen miima ayu.

¹⁹ “Tang mapang talangka lir külen item kilir kibur aru aser parnok den senji züngdangtep.

²⁰ Idangji mori pungu agizükbai ano talila mori pungu bener arua ashi, ‘Kibur, nai kü nem mori pungu agütsü; ajiang ni ano mori pungu talila ajangzüktsüogo.’

²¹ Pa kiburi pa dang ashi, ‘Lanlia, tajung aser temulung lemtetba kilir, oset ishika madak ne dak temulung lemteta liasü, ni na oset aika madak yutsüdi; na ne kibur tepela daki iang.’

²² Ano mori ana agizükbaia arua ashi, ‘Kibur, nai kü nem mori ana agütsü, ajiang ni ano mori ana tali ajangzüktsüogo.’

²³ Pa kiburi pa dang ashi, ‘Lanlia, tajung aser temulung lemtetba kilir; oset ishika madak ne dak temulung lemteta liasü, ni na oset aika madak yutsüdi. Na ne kibur tepela daki iang.’

²⁴ Aser mori ka agizükbaia arua ashi, ‘Kibur, na tetokdak nisung, aser kong nai maten angji arur, aser kong nai meprok angji bendener ta ni metet.

²⁵ Aser ni tsübua liasü, anungji ni oagi ne sen mori ali nung miima ayu; ajiang ne meyong kechi aji nai angur.’

²⁶ Saka pa kiburi langzüa ashi, ‘Tamajung aser azümesen kilir, ni kechi nung maten yangji arur, aser ni kechi nung meprok yangji bendener ta nai metet.

²⁷ Anungji sen rizünger ket nung nai kü sen yutsütsü tim liasü, aser ni arudang kü meyong dak tetemlok keter ni meyipa ngula.

²⁸ Anungji nenoki pa nungi sen moriji bener oang, aser aji mori ter akaba nem agüjang.

²⁹ Kechiaser shibasa aka pa nem tali agütsütsü saka shiba maka, pa kechi aka, ajia pa nungi bener aotsü.

³⁰ Aser nenoki tagidak makaba kilirji kimalen tammang dakji endokang. Yangji tajepba aser tepu shitepba alitsü.’

Kintem Obendangba

³¹ “Saka kodang Nisung Chir pei sentsüwangshi nung aser pa den tenyartem ajak arudir, idangji pa pei sentsüwangshi chuba menden nung amentsü,

³² aser kintem ajak pa tsüngdang anitentsü, aser nabongtem nungi santem sannüker kati sadangba ama, parnok pai ka nungi ka sadangtsü;

³³ aser pai santem pa tajichilen, aser nabongtem tabelen ta ayutsü.

³⁴ Idangji Chubai pa tajichilen alirtem dang ashitsü, ‘Arung, kü Bui moatsürtem, nenok asoshi alima yangludang nungi renema akaba Yimli senmang amangang.

³⁵ Kechiyong ni ya-a liasü, aser nenoki kü nem chiyungtsü agütsü, ni tzüra-a liasü, aser nenoki kü nem jemdaktsü; ni aenersa liasü, aser nenoki ni aniok;

³⁶ mangsa alidang nenoki kü nem abendaktsü; ni shiranga liasü, aser nenoki ni semdang ni tepuokdak liasü, aser nenoki kü dangi aru.’

³⁷ “Idangji temeshipur jagi pa dang langzütsü. ‘Kibuba, kodang onoki na ya-a ngua chiyungdaktsü, mesüra tzüradang, ne nem jemdaktsü?

³⁸ Kodang onoki na aenersa ngua na aniok, mesüra mangsa alidang na abendaktsü?

³⁹ Kodang onoki na shiranga, mesüra tepuokdak ngua, ne dangi aru?’

⁴⁰ Idangji Chubai parnok dang langzütsü, ‘Atangji ni nenok dang ashir, item kü adianu tilatiba rongnung ka dang tanga nenoki kechi inyak aji nenoki kü dang inyak.’

⁴¹ “Idangji pai tabelen alirtem dang ashitsü, ‘Nenok atakatem kaortem, kü dang nungi aenshia, mojing aser pa tenyartem asoshi tatem makaba mi renema aliba jagi iang.

⁴² Kechiaser ni ya-a liasü, aser nenoki chiyungtsü magütsü; ni tzüra-a liasü aser nenoki kü nem tajemtsü magütsü;

⁴³ Ni aenersa liasü, aser nenoki ni maniok; ni mangsa liasü aser nenoki kü nem mabendaktsü; shiranga aser tepuokdak liasü aser nenoki ni mesemdang.’

⁴⁴ Idangji parnoki langzüa ashitsü, ‘Kibuba, na ayadang mesüra tzüradang, mesüra aenersa alidang, mesüra mangsa alidang, mesüra shiranga alidang, mesüra tepuokdak alidang, onoki kodang na ngua meyari?’

⁴⁵ Idangji pai parnok dang langzüa ashitsü ‘Atangji ni nenok dang shidi, item tilatem rongnung ka dang nenoki kechi meinyak, aji nenoki kü dang meinyak.’

⁴⁶ Itemji tatem makaba temerenshi daki aitsü, saka temeshipur teti taküm daki aitsü.”