MATHI 24 - Ao Naga CL Bible - SQC Edition (BSI)

Tenla Ki Raksatsü Indang Shinba

¹ Yisui tenla ki nungi adoker oya alidang, pa nütsüngtemi pa dang tenla ki yanglubaji sayutsü asoshi pa dangi aru.

² Saka pai parnok dang langzü, “Nenoki item ajak angur, aji oda masü ama? Atangji ni nenok dang ashir, yangi lung ka manung lung ka melokshidaktsüi anünga malitsü.”

Timtem Tekangshi Tenzükba

³ Pa Oliv tenem nung mena alidang, nütsüngtemi kija pa dangi arua ashi, “Itemi kodang ataloktsü, aser na aruba, aser alima tatem temaitsü kechi alitsü onok dang shiang?”

⁴ Yisui parnok dang ashi, “Shingaia nenok mashileni manidaktsütsü kümdangang.

⁵ Kechiaser kü nüng nung aikati, Ni Khrista, ta jembia arutsü, aser aika mashileni anitsü.

⁶ Nenoki raraba otsü aser rara adoktsüba osangtem angashitsü. Nenok maoksatsü kümdangang. Kechiaser itemi ataloktsüla, saka tatem ano masü.

⁷ Kechiaser kini kin anema aser yimli-i yimli anema apusotsü, aser tesem tesem nung ayawara aser menoknok alitsü.

⁸ Saka item ajak tekangshitsü tetenzüker.

⁹ “Idangji parnoki nenok timtem tekangshi ngudaktsütsü bendanga agütsütsü aser nenok tepsetsü; aser kü nüng atema kin ajaki nenok sempatsü.

¹⁰ Idangji aikati metsüdaktsü, aser kati ka bendanga agütsüteptsü aser kati ka sempatsü.

¹¹ Aser tiyazü ainkar aika adoktsü, aser aika mashileni anitsü.

¹² Aser ozüng raksar onsara nungji, nisung jenti temeim mokonga akümtsü.

¹³ Saka shibai tatem tashi aremdir pa kümzüktsü,

¹⁴ aser iba Kotak Yimli Osangtajung alima ajonga nung kin ajak dang kuli asütsü asoshi sayutsüngitsü, aser idangji tatem arutsü.

Timtem Tekangshi Tulu

¹⁵ “Anungji Daniel ainkar ajanga jembiba tesempatsü tesamaba kodang nenoki temeshidak noktaka ngudir (Shibai azünger pai angatetang);

¹⁶ idangji Yihuda lima nung shir ali parnok tenemi jenang.

¹⁷ Shiba kilem manung ali pa par kidang aliba osettem abentsü teluma.

¹⁸ Aser shiba alu nung ali pa pei sü abentsü meyipa tuoma.

¹⁹ Saka iba tensa nung temang mazüngi alirtem aser mama yongdaktsürtem aiatai!

²⁰ Nenok ajenba asükwa mesüra amungnü masütsü sarasademang.

²¹ Kechiaser idangji timtem tekangshi tulu alitsü, lipok nungi tang tashi nung iba ama mali, aser ano malitsü.

²² Item anogo mesüktoktsü asübo, nisung shinga mekümzüki lila; saka teshimtetpur asoshi item anogoji süktoktsütsü.

²³ “Idangji nenok dang kari, ‘Ajiang, Khrista yangi lir mesüra yangji lir’ ta shira aji tamangma.

²⁴ Kechiaser tiyazü Khristatem aser tiyazü ainkartem adoktsü aser kokra teshimtetba pura mashileni anitsü asoshi temaitsütem aser tesüngmangtsü sayatenya tulu alitsü.

²⁵ Ajiang, ni nenok dang tamasa yongi shiogo.

²⁶ Anungji nenok dang kari yamai shira, pa arem nung lir, tuoma: ajiang pa taktang telungba nung lir, aji tamangma.

²⁷ Kechiyong anüdoklen nungi koda tsüngpret adoka anüolen tashia angur, yamaji Nisung Chir aruba alitsü.

²⁸ Kongsa tasümang lidir, yangji hogontem külemi sentepa alitsü.

Nisung Chir Aruba

²⁹ “Saka item timtem tekangshi anogotem temli, anü mangadoktsü, aser itai pei tesangwa magütsütsü, aser anüng tashitem anokshitsü.

³⁰ Idangji anüng nung Nisung Chir temaitsü adoktsü, aser idangji alima kin ajaki teku nung tsünga ajebtsü, aser parnoki Nisung Chir anüng mepet nung ain aser sentsüwangshi tulu nung aruba angutsü.

³¹ Aser jangzü ola tulu agi pai pei tenyartem yoktsü aser parnoki anüng tatem külen nungi külen tashi kinük pezü sülen nungi pei teshimtet purtem anitentsü.

Mungudong Nungi Tatishitsü

³² “Tang mungudong nungi o-entepba ka angazükang, kodang pa kongsang lanu küma to adoker, mei anasa lir ta nenoki metet.

³³ Anungji nenokia item ajak angudang, Nisung Chir ana nung, oda kishizüng nung lir ta metetang.

³⁴ Atangji ni nenok dang ashir, item ajak matalok tashi, iba putu süia maotsü.

³⁵ Anüng aser ali süitemtsü, saka kü O mesüitemtsü.

Memetetba Anogo Aser Mapang

³⁶ “Saka iba anogo aser mapang indang Tebu alema kotak tenyartemia, mesüra shingaia memetet.

³⁷ Noa tensa koma liasü, yamaji Nisung Chir aruba alitsü.

³⁸ Kechiaser Tzümetsüng matongdang, aser Noa rongi matu tashi parnoki koda chiyunga aser jema, anioka aser kiba kiyi yoka liasü;

³⁹ aser tzümetsüng arur parnok ajak okshia bener mao tashi, parnoki memetet, yamaji Nisung Chir aruba alitsü.

⁴⁰ Idangji nisung ana alu nung alitsü, ka anitsü aser ka toktsütsü.

⁴¹ Tetsür ana semki ka nung tsük sena alitsü, ka anitsü aser ka toktsütsü.

⁴² “Anungji saksalema liang, kechiaser kechi anogo nung nenok Kibuba arutsü nenoki memetet.

⁴³ Saka ya metetang, ki kiburi koba mapang nung auür arutsü aji metet asübo, pai nüka lila, aser pai pei ki merakpokdaktsüla.

⁴⁴ Anungji nenoka renema liang, kechiaser nenoki mebilemba mapang ka nung Nisung Chir arutsü.

Temulung Lemtetba Kilir Aser Tamajung Kilir

⁴⁵ “Ajangla kiburi pei kilirtem nem mapang shitak nung chiyungtsü asoshi parnok madak ketdang südaktsüba temulung lemtetba aser shisa taka kilirji shiba?

⁴⁶ Pa pei kibur arudang kilir shiba yamaji inyaka ngudir, pa tepelatsü.

⁴⁷ Atangji ni nenok dang ashir, pa akaba ajak madak pai pei kilirji ketdang südaktsütsü.

⁴⁸ Saka iba tamajung kiliri kü kibur menua alir, ta pai pei temulung nung shira,

⁴⁹ aser medemer kilir dak azüktsü tenzükra, aser yi pur den chiyunga jemra;

⁵⁰ iba kilir kiburji pai meimlaba anogo ka nung aser pai memetetba mapang ka nung arutsü.

⁵¹ Aser pa anüka lepsatsü aser pa shilem anemsüba purtem den lemzüktsütsü. Idakji tajepba aser tepu shitepba alitsü.