MATHI 21 - Ao Naga CL Bible - SQC Edition (BSI)

Yirusalemi Takok Ngua Aiba

¹ Kodang parnoki Yirusalem anasa arua Oliv tenem nung aliba Bethfage atong, Yisui nütsüng ana yoka,

² parnok dang ashi, “Nenok jakdang aliba yim jagi iang aser idangyongji gado ka sentaka aliba aser iba den techanu ka nenoki angutsü. Parnok salar kü dangi anir arung.

³ Aser kari nenok dang langka shira, nenoki yamai shiang, ‘Kibuba asoshi parnok tenüngdaktsü lir;’ aser idangyongji pai parnok yoktsü.”

⁴ Ainkar ajanga kechi jembizüka aka aji ataloktsü asoshi ya ataloker:

⁵ “Zion jala dang shiang, ajiang, ne Chuba ajemalua gado dak sanger, oda gado chanu ka dak sanger, ne dangi arur.”

⁶ Anungji nütsüngtemi ao, aser Yisui parnok dang melaba ama inyak.

⁷ Parnoki gado aser techanuji anir aru aser parnoki pei sü parnok madak lemtsü aser Yisui iba ma nungji amen.

⁸ Aser telok tulu kati pei sü lenmang nung lemtsü aser tangartemi süngdong nungi kongsangtem lepzüker itemji lenmang nungji lemtsü.

⁹ Pa tejaklen aser tesülen aoba teloktemi ayimtena ashi, “Dawid Chir dang Hosanna sang! Kibuba tenüng nung shiba arur pa sangang. Tematiba nung Hosanna sang!”

¹⁰ Pa kodang Yirusalemi ai, yimti ajak nüngnüngtepa ashi, “Ya shiba?”

¹¹ Teloktemi ashi, “Ibai Galil nungi aruba Nazaret nunger, ainkar Yisu.”

Tenla Ki Meshitetba

¹² Aser Yisui tenla kidangi atu, aser ki telung nung tayoker aser talirtem langbang, aser guduru ayokertem menden meküpdoktsü.

¹³ Aser pai parnok dang ashi. “Ya zülua lir, kü ki dang sarasademba ki ta ajatsü, saka nenoki aji rakzükraktemer leprungki kümdaktsür.”

¹⁴ Aser nükpokertem aser tsüngtsükertem tenla kidangi pa dangi aru aser pai parnok anebtsü.

¹⁵ Saka kodang Yisui tesüngmangtsü mapatem inyakba, aser tila tanurtemi tenla kidang, “Dawid Chir dang Hosanna sang” ta ayimtenba angu, puti-ungertem aser tezülurtemi ain adok.

¹⁶ Aser parnoki pa dang asüngdang, “Parnoki kechi ashir nai aji angashir südi?” Yisui parnok dang langzü, “Hau, kinütem aser mamayongertem bang nungi tenüngsang peridaktsüogo ta nenoki mezüngdang no?”

¹⁷ Idangji Yisui parnok toktsü, aser yimti nungi adoka Bethani yimtaki ai aser idakji ali.

Mungudong Atakatemba

¹⁸ Tang anepdang yimti jagi meyipa arudang pa ya-adok.

¹⁹ Aser lenmang tezülen mungudong ka ngua pai iba anasa arua, tuo dak alema kecha mangu. Anungji Yisui iba dang ashi, “Tang nungi na teti tejang tetang.” Idangyongjisa mungudongji azüladok.

²⁰ Aser nütsüngtemi aji angudang süngmanga ashi, “Kechi koda tang yongi mungudongji azüladok?”

²¹ Yisui parnok dang ashi, “Atangji ni nenok dang ashir, nenoki matidaki amangra, mungudong dak kechi inyak, aji dang masü, saka nenoki iba tenem danga, Na ajungketang aser tzüyim nung ajungokang ta ashi nunga aji ataloktsü.

²² Amanga sarasademba agi nenoki kechisa meshidir ajak nenoki angutsü.”

Yisu Tashi-ain Indang Asüngdangba

²³ Kodang pai tenla kidangi ai aser pai sayutsüngia alidang, putiungertem aser nübur tamburtem pa dangi arua ashi, “Kechi tashi agi nai itemi inyaker? Shibai ne nem iba tashi agütsü?”

²⁴ Yisui parnok dang langzü, “Nia nenok dang o ka asüngdangdi, nenoki kü dang aji shira kechi tashi agi ni item mapa inyaker ni nenok dang shidi,

²⁵ Yohan Baptitsüba kong nungi? Kotak nungi asü? Nisung nungi?” Parnoki parnok rongnung jembitepa ashi, “Kotak nungi ta asenoki shira, ajangla kechiba nenoki pa dang mamang ta pai asenok dang ashitsü.

²⁶ Saka ano asenoki nisung nungi, ta shira asenoki telok tsübur; kechiaser ajaki Yohanji ainkar ka ta agizüker.”

²⁷ Anungji parnoki Yisu dang langzü, “Onoki memetet.” Yisuia parnok dang ashi, “Ajangla ni kechi tashi agi item mapa inyaker aji nenok dang meshili.

Jabaso Ana agi O-entepba

²⁸ “Saka nenoki kechi bilemer? Nisung ka jabaso ana liasü. Aser pai mezüngbuba dangi arua ashi, ‘Tebu, oang aser tanü tsükmenatzü lu nung inyakang’

²⁹ Aser pai langzü, ‘Ni maotsü’ Saka tesü pa pei sasa temulung meyip, aser ao.

³⁰ Ano pai tanabuba dangi arua aji odasa ashi, idangji pai langzü, ‘Tamarener, ni odi’ saka pai mao.

³¹ Iba ana rongnung tebui mulungba shibai inyak?” Parnoki ashi, “Mezüngbubai.” Yisui parnok dang ashi, “Atangji ni nenok dang ashir, alimelen sarurtem aser nüktapangta tsürtem nenok dang tama Tsüngrem yimli-i air.

³² Kechiaser Yohani temeshiba lenmang nung nenok dangi aru, aser nenoki pa dang mamang; saka alimelen sarurtem aser nüktapangtatsürtemi pa dang amang; aser aji nenoki nguaka, tesülen nenok sasa temulung memeyip aser mamang.”

Tsükmenatzü Lu Aser Aluyimertem

³³ Yisui ashi, “Ano tanga o-entepba ka angang, Kibur nisung ka liasü, shibai tsükmenatzü lu ayim; aser pai aji meketa atsü atsü, temenüngdak atu aser mitsa ka yanglu, aser pai aji aluyimertem ket nung nungloka toktsür alinük tanga kati ao.

³⁴ Kodang süngjang aongtsü mapang anasa atong pai pei shilem süngjang angutsü asoshi aluyimertem dangi pei kilirtem yok.

³⁵ Aser aluyimertemi par kilirtem apu aser ka dak azük; aser tangar ka tepset, aser tangar ka lung agi onset.

³⁶ Tanaben pai mezüng dang nungi timba tanga kilirtem yok; aser parnoki yamajisa parnok dak inyak.

³⁷ Saka tesülen pai pei chir yok aser ashi, ‘Parnoki kü chir dangbo akhüm tsübutsü.’

³⁸ Saka aluyimertemi techirji angudang, parnok rongnung jembitepa ashi, ‘Ibai senmangerji lir. Arung, asenoki pa tepsetdi aser pa senmangji agidi.’

³⁹ Parnoki pa apu aser tsükmenatzü lu nungi aridok aser pa tepset.

⁴⁰ Anungji kodang alu kiburji arudir, pai item aluyimertem dang kechi inyaktsü?”

⁴¹ Parnoki pa dang ashi, “Pai tamajungertemji taochi makai samatsütsü aser mapang tatong nung aluyimer shiri pa nem süngjang agütsütettsü ibala aluyimer nem pai tsükmenatzü luji yimdaktsü.”

⁴² Yisui parnok dang ashi, “Nenoki ya laishiba nung kodanga mezüngdang asü? ‘Kisürtemi koba lung magi, aji kinük nung tongtiba aküm; IbaiKibuba i inyakba liasü, aser aji asen nükdang tesüngmangtsü lir.’

⁴³ “Anungji ni nenok dang ashir, nenok nungi Tsüngrem yimli bener aotsü aser iba nungjagi süngjang tangtsüba kin ka nem agütsütsü.

⁴⁴ Iba lungma nung shiba tsükdir pa anüka raksatsü; saka shiba dak ibai tsükdir, iba jagi pa auyi küma menüngsatsü”

⁴⁵ Puti-unger aser Farisitemi pa o-entepba angashidang, pai parnok indang jembir ta parnoki angatet.

⁴⁶ Anungji parnoki pa aputsü bushi, saka parnoki telok tsübu, kechiaser parnoki pa ainkar ka ta züngshi.