MATHI 20 - Ao Naga CL Bible - SQC Edition (BSI)

Tsükmenatzü Lu Nung Inyakertem

¹ “Kechiaser Kotak Yimliji kibur shibai pei tsükmenatzü lu asoshi anepungi nübu ayimi ao ibala mesüker.

² Pai teinyakertem den anogo nung adholi kaka agütsütsü nangzükteper pei tsükmenatzü lui parnok yok.

³ Tuku baji meta nung pai ao aser nisung kar teinyaktsü kecha makai shishidak noktaka angu.

⁴ Anungji pai parnok dang ashi, ‘Nenoka tsükmenatzü lui oang, aser kechi langdir ni nenok nem agütsütsü.’ Aser parnoki ao,

⁵ ano pai terana baji aser asem baji meta nung oa yamajisa inyak.

⁶ Aser pai pungu baji meta nung oa tangar kar noktaka ngur, parnok dang ashi, ‘Nenoki kechiba yangi anogo munga kecha meinyaki noktaker?’

⁷ Parnoki pa dang langzü, ‘Kechiaser nisung shingaia onok maa.’ Pai parnok dang ashi, ‘Nenoka tsükmenatzü lui oang.’

⁸ “Aser nikongdang akümdang tsükmenatzü lu kiburi pei ketdangbuba dang ashi, ‘Inyakertem jaang, aser parnok tesübuba nungi tenzüka tamabuba tashi nem pei taa agüjang.’

⁹ Aser pungu baji meta nung yokbatem arudang parnok nisung shiai adholi kaka angu.

¹⁰ Aser tamasa inyakertem arudang, parnoki tali angutsü ta bilem, saka parnoka yamaji nisung shiai adholi kaka angu.

¹¹ Aser kodang parnoki aji angu, parnoki kibur anema nemnema ashi,

¹² ‘Item tesüpuri ghonda ka dang mapa inyak, saka onok shiri anogomung belema anüpu arema inyak, nai parnok onok den saku kümdaktsü?’

¹³ Saka pai langzüa parnok dang ashi, ‘Temba, nai kechi taa asoshi inyak aji shitak angur. Nai kü den adholi ka asoshi menangzüktep no?

¹⁴ Kechi ne meyong aji agiang aser oang. Iba tesübuba nem ne den saku agütsütsü kü mulung lir.

¹⁵ Kü meyong sen agi ni mulungba inyaktsü tim masü no? Mesüra ni tajung inyak nung nai tenükmeremer asü?’

¹⁶ Yamaji tesüpur tama akümtsü aser tamapur tesü akümtsü.”

Yisui Pa Asütsü aser Shia Arutsü Indang Tasembenbuba Shiner

¹⁷ Yisui Yirusalemi atudang, pai nütsüng teranaji pa den külemi anir ao, aser lenmang nung pai parnok dang ashi,

¹⁸ ajiang, asenok Yirusalemi atur, aser Nisung Chir puti-unger aser tezülurtem ket nung bendanga agütsütsü; aser parnoki pa nem tai agüja pa südaktsütsü.

¹⁹ Aser pa sensatsütsü, azüktsü, aser kangki nung angenloktsü asoshi parnoki pa Bendanger ket nung bendanga agütsütsü aser pa asemnübuba nung shia arudaktsütsü.

Yakob o Yohan na Temepishiba

²⁰ Idangji Zebedi chirtem tetsü, pei chirtem den pa dangi arua pa madang apudaka lai pa dang langka asüngdang.

²¹ Pai la dang asüngdang, “Nai kechi aginür?” Lai pa dang langzü, “Item kü chir ana, ne Yimli nung ne tajichilen ka aser ne tabelen ka ta amentsü mela-ang.”

²² Saka pai parnok dang ashi, “Nenoki kechi meshir aji nenoki memetet. Ni koba marok nung jemdi ta lir iba marok nungji nenoki jemteta lir ma?” Parnoki pa dang langzü “Onoki koker.”

²³ Yisui parnok dang ashi, “Atangji nenoki kü marok nung ajemtsü, saka kü tajichilen aser kü tabelen amentsüji ni agütsütsü masü, saka kü Bui aji shir atema renem parnok asoshi lir.”

²⁴ Kodang nütsüng ter jagi aji angashi, parnoki adianu ana dangji ain adok.

²⁵ Saka Yisui parnok ajak külemi pa dangi aja aser ashi, “Bendanger yimsüsürtemi parnok madak kibur akümer aser parnok tulurtemi parnok madak tashi amshir ta nenoki metet.

²⁶ Nenok rongnung kodanga yamaji masütsü; saka shibai tulu kümnür pa nenok lar asütsü,

²⁷ aser shibai tazüngba kümnür pa nenok lar asütsü.

²⁸ Yamaji Nisung Chir-a tenzükdaktsütsü masü, saka tenzüktsü aser aika alang pei taküm agütsütsü aru.”

Nükpoker Ana Anebtsüba

²⁹ Aser parnok Yeriko nungi tugudang, telok tulu ka pa sülen anitak.

³⁰ Aser ajiang, lenmang tezülen mena aliba nükpoker anati Yisu süiba angashia ayimtena ashi, “Oh Kibuba Dawid Chir, onok dang aochiang.”

³¹ Aser parnokji mokorai liang ta teloki parnok arütsü. Saka parnoki taliang ayimtena ashi, “Oh Kibuba, Dawid Chir, onok dang aochiang.”

³² Anungji Yisui ajem ajema noktaker parnok ja-a ashi, “Ni nenok asoshi kechi inyakdaktsünür.”

³³ Parnoki pa dang ashi, Kibuba, onok tenük lapokdaktsünür

³⁴ Idangji Yisui aria bilema parnok tenük nung kongshi, aser idangyongji parnoki angu, aser pa sülen anitak.