MATHI 18 - Ao Naga CL Bible - SQC Edition (BSI)

Kotak Yimli Nung Shiba Tulutiba?

¹ Iba mapang nungji nütsüngtem Yisu dangi arua asüngdang, “Kotak Yimli nung shiba tulutiba?”

² Idangji Yisui tila tanur ka pa dangi jar pa parnok rongnung yutsütsü;

³ aser ashi, “Ni nenok dang züngpong ashir, nenoki meyipa tila tanurtem ama mekümra; nenoki kotak yimli-i kodanga maitsü.

⁴ Anungji shibai iba tila tanur ama pei sasa ajemaludir, pa kotak yimli nung tulutiba.

⁵ Kü nüng nung shibai ibala tila tanur ka agizükdir, pai ni agizüker.

Temetsüdaktsü

⁶ “Saka kü dak amangba item tilatem rongnung ka danga shibai metsüdaktsüdir, pa asoshi temenüngba lungpak tulu ka tekong nung iloker tzüyim tarok nung angema asü tajungba.

⁷ Temetsüdaktsü adokdaktsüba asoshi alima atema aiatai! Kechiaser temetsüdaktsü arutsüla; saka shiba ajanga temetsüdaktsüji arudir pa asoshi aiatai!

⁸ Ne ket mesüra ne tsüng agi na metsüdaktsüra, aji na nungi leptokang. Teka ana mesüra tetsüng ana tener teti tatem makai arongba mi nung puok dangbo lemtar mesüra tetsüng tsüker takümdaki ai na asoshi tajungba.

⁹ Ne tenük agi na metsüdaktsüra, aji na nungi aroktokang. Tenük ana tener teti ronga aliba mi nung puok dangbo, tenük ka tener taküm daki ai na asoshi tajungba.

¹⁰ “Kümdangang, item tilatem rongnung ka danga nenoki mezüngmeshi tesü; kechiaser ni nenok dang ashir, kotak nung parnok tenyartemi kotak nung aliba kü Bu tejak teti repranger.

¹¹ Kechiaser Nisung Chir sama-a aliba kümzüktsü aru.

Temadokba San Agi O-entepba

¹² “Nenoki koda bilemer? Nisung ka san noklang ka kara, aser item rongnung ka mashileni ora, pai tukur tukuji toktsür mashileni aoba san kaji bushitsü tenemi maor ama?

¹³ Aser pai aji ngura, ni nenok dang züngpong ashir, mashi mejajaba tukur tuku dang nungibo iba dang pai tali pelar.

¹⁴ Anungji item tilatem rongnung ka danga samatsü kotak nung aliba nenok Tebui memulunger.

Adianu Kati Tai Menaba

¹⁵ “Aser ne adianui tai menara, oang, nena tsüngda nung dang taiji sayuang. Pai ne dang angara, nai ne adianu ajangzükogo.

¹⁶ Saka pai ne dang mangara, mapa ajak kuli ana mesüra asem bang agi renemtsü asoshi, ne den tangar ka mesüra ana anir oang.

¹⁷ Aser pai parnok dang mangara, ibaji arogo dang shiang. Aser pai arogo danga mangara, pa ne tsüngdang Bendanger mesüra alimelen sarur ama lidakjang.

¹⁸ “Ni nenok dang züngpong ashir, nenoki kechisa alima nung alendir aji kotak nunga alentsü, aser nenoki kechisa alima nung saladir, aji kotak nung salatsü.

¹⁹ Ano ni nenok dang ashir, alima nung nenoki mepishiba langka atema nenok nisung ana temulung ka dang süra, aji kotak nung aliba kü Bui nenok asoshi inyaktsü.

²⁰ Kechiaser kong ana mesüra asem kü nüng nung lungjema lir, yangji ni parnok rongnung lir.”

Tatok Magütsüba Kilir Agi O-entepba

²¹ Idangji Peter aru aser Yisu dang ashi, “Kü adianui ni anema tai menara, ni pa dang kwiben tai atoktsü? Tenetben tashi asü?”

²² Yisui pa dang ashi, “Tenetben tashi ta ni ne dang meshili, saka neterben tenet tashi.

²³ Kechiaser kotak yimli chuba kati pei kilirtem den sentsü züngdangtepba mesüker.

²⁴ Aser pai züngdangtsü tenzükdang, sen mori meyi ter atsüba nisung ka pa dangi aru.

²⁵ Saka tagütsütsü kecha maka nung, pa aser pa kinungtsü, aser techirtem aser pa akaba ajak ayoktsü aser sentsüji aotsü pa kiburi ozüng agütsü.

²⁶ Anungji kiliri apudaker mepishia ashi, ‘Kibuba, kü dang azüzükang, ni sentsü ajak aodi.’

²⁷ Anungji kibur jagi aochia bilemer pa chiok aser pa dang sentsüji atok.

²⁸ Saka iba kilirji kimai ao, aser pa dang tatsük tenem shi sentsü atsüba medemer, kilir ka ajuru; aser pai pa dak tekong nung leneta ashi, ‘Nai tagütsütsü alibato kua.’

²⁹ Anungji pa medemer kiliri apudaker pa dang mepishia ashi, ‘Kü dang azüzükang, aser ni ne nem agütsüdi.’

³⁰ Saka temepishibaji pai manga aser pai tagütsütsü alibaji meküpdang tashi tepuokdak ayu.

³¹ “Anungji pa medemer kilirtemi ya inyakba ngua kanga jashi, aser parnok kibur dangi arua, pai inyakba ajak indang ashi.

³² Idangji kiburi pa ja-a pa dang ashi, ‘Tamajung kilir, nai kü dang mepishi nung, sentsü ajakto ni ne dang tokogo.

³³ Ajangla ni ne dang koda aochi, yamaji naia ne medemer kilir dang aochitsü tim masü no?’

³⁴ Idangji pa kibur ain adoka, tagütsütsü aliba ajak pai meküpdang tashi tekangshir ket nung bendanga agütsü.

³⁵ Anungji nenok nisung shiai pei adianu dang temulungjang nungi tai metokra, ajangla kotak nung aliba kü Buia yamaji nenok dang benshitsü.”