MATHI 17 - Ao Naga CL Bible - SQC Edition (BSI)

Yisu Sentsü Melenba

¹ Troknü lir külen Yisui Peter, Yakob aser tenu Yohan, parnok tenem talang kati anir pila-a atu.

² Idakji Yisu parnok tsüngdang sentsü melenadok. Aser pa tejak anü ama sangwa aser pa süoshi tesangwa ama mesünga aküm.

³ Aser ajiang, pa den jembitepa Mosa aser Elija parnok tsüngdangi adok.

⁴ Idangji Peteri Yisu dang ashi, “Kibuba, asenok yangi alitsü junger; nai mulungra, ni yangi semtu asem yangludi; na asoshi ka, Mosa asoshi ka, aser Elija asoshi ka.”

⁵ Pa jembia alidang sentsüprang mepet kati parnok süpang aser mepet nungi ola ka adoka ashi, “Ibai kü meimba jabaso, shiba dak ni temulung achir, nenoki pa dang angang!”

⁶ Aser kodang nütsüngtemi aji angashi, parnoki tejak ali nung rembanga apudak, aser kanga tsübu.

⁷ Idangji Yisui arua parnok dak kongshia ashi, “Noktakang aser tetsübu.”

⁸ Aser parnoki tenük saaka reprang nung Yisu kija dak alema tangar shinga mangu.

⁹ Parnok tenem nungi aludang Yisui parnok nem ozüng agütsüa ashi, “Nisung Chir tasü nungi shia maru tashi tangubaji shinga danga teshi.”

¹⁰ Nütsüngtemi pa dang asüngdang, “Ajangla kechiba Elija tama arutsüla ta tezülurtemi ashi?”

¹¹ Yisui langzü, “Atangji Elija tama arutsü aser pai ajak yanglushitsü.

¹² Saka ni nenok dang ashir, Elija aruogo, saka parnoki pa memetet aser parnok inyaknütsü pa dak inyak. Yamaji Nisung Chir parnok ket nung tuo ashitsü.”

¹³ Idangji Yohan Baptitsüba indang Yisui jembi ta pa nütsüngtemi angatet.

Nashira Aketba Tanur Ka Anebtsüba

¹⁴ Kodang parnok telok dangi aru, nisung ka pa dangi arua pa tsüngdang apudak,

¹⁵ aser ashi, “Kibuba, kü jabaso dang aochiang, kechiaser pa dak nashira keter aser pa kanga mejungi kangshidaktsür; kechiaser pai aiben mi aser tzü nung pungoker.

¹⁶ Ni pa ne nütsüngtem dangi anir aru saka parnoki manebtsütet.”

¹⁷ Yisui langzü, “Oh tamang makaba aser mashi jajaba putu, ni nenok den kopiga alitsü? Ni nenok dang kopiga aremzüka atatsü? Pa yangi kü dangi anir arung.”

¹⁸ Aser Yisui temenen tanelaji arütsü aser aji pa dak nungi tugu; aser tanurji idangyongji anebadok.

¹⁹ Idangji nütsüngtemi Yisu dangi tanemi arua ashi, “Kechiba onokibo aji maridokteter?”

²⁰ Yisui parnok dang ashi, “Nenok tamang tera dang asübayong; kechiaser züngpong ni nenok dang ashir, nenok tamang jibijang teka danga lira, nenoki iba tenem dang ashitsü, yang nungi ajagi oang; aser aji aotsü; aser nenok asoshi tamakoktsü kecha malitsü.

²¹ Saka ibai sarasadem aser lumiba ajanga dang aridokteter.”

Yisui Pa Asütsü Aser Shia Arutsü Indang Tanaben Ashir

²² Parnok Galil nung senzüya alidang Yisui parnok dang ashi, “Nisung Chir nisungtem ket nung bendanga agütsütsü.

²³ Parnoki pa tepsettsü, saka asemnübuba nung shia arutsü.” Idangji parnok kanga jashiadok.

Tenla Ki Temelen Agütsüba

²⁴ Aser kodang parnoki Kapernaumi aru, tenla ki temelen sarurtemi Peter dangi arua ashi, “Nenok tesayuri tenlaki temelen magütsür asü?”

²⁵ Pai ashi, “Hau agütsür.” Aser kidangi aitdang Yisui tamasa pa dang jembia ashi, “Simon, nai kechi bilemer? Alima chubatemi temelen shir nungi agir? Pei chirtem nungi asü, Bendangertem nungi?”

²⁶ “Bendangertem nungi” ta Peteri langzü. Yisui pa dang ashi, “Ajangla pei chirtembo nüji küma lir.

²⁷ Saka parnok memetsüdaktsü asoshi, na tzüyimi oang, aser boroki agi nai tamasa kechi ango mesütetdir aji bener arung. Aser iba tebang nung nai taribi sen ka angutsü; ibaji ni aser na asoshi parnok nem agüjang.”