MARK 8 - Ao Naga CL Bible - SQC Edition (BSI)

Meyi Pezü Chiyungdaktsüba

¹ Item anogo nungji tanaben yangji telok tulu ka liasü; aser parnok tachitsü kecha maliasü, aser pai pei nütsüngtemji aja aser parnok dang ashi,

² “Ni telok asoshi aochir kechiaser parnok anogo asemnü kü den munga arudagi saka parnok kecha tachitsü maka;

³ aser parnok yaseta pei kidangi ni yokra, parnok lenmang nung lulatsü; aser parnok karbo lenmang talang nungi aru.”

⁴ Pa nütsüngtemi pa dang langzü, “Lisem lima azüngmeyak dak yangi shibai kechi nungi item nisungtem chiyungtsü agi tip temdaktsütsü.”

⁵ Pai parnok dang asüngdang, “Nenok amtsük kwika aka?” Parnoki langzü, “Tenet”.

⁶ Pai telokji ali nung amentsü mela, pai amtsük tenetji am aser temoatsü agütsür aji sangsa-a aser parnok rongnung anganütsü pa nütsüngtem nem agütsü, aser aji parnoki telok rongnung anganü.

⁷ Parnok ket nung ango tila-a tera liasü. Itemji moatsür, anganüang ta ashi.

⁸ Parnoki itemji chir tip atem, aser tanüngba tanük-tari agi molok tenet sünga benden.

⁹ Parnok meyi pezü shi liasü, aser pai parnok yokadok;

¹⁰ Idangyongji pai pei nütsüngtem den rong kati ai, aser Dalmanutha limai aru.

Temaitsü Ka Meshiba

¹¹ Farisitem kar aru aser pa den ashishitepa tokteptsü tenzük. Parnoki pa atitanga kotak nungi temaitsü ka pa dang meshi.

¹² Idangji pai pa mulung nung bilema ashi, “Iba putui kechiba temaitsü meshir? Atangji ni nenok dang shidi, iba putu nem temaitsü kecha magütsütsü.”

¹³ Aser pai parnok toktsür rongi ia tanaben tzüküm küleni ao.

Farisitem aser Herod Telok Piyazü

¹⁴ Parnoki amtsük abentsü amadok; aser rong nungji parnok den amtsük ka dak alaka kata maliasü.

¹⁵ Pai parnok kümdangdakja ashi, “Ajiang, Farisitem aser Herod telok piyazü asoshi nenok kümdangang.”

¹⁶ Nütsüngtemi parnok o parnok na jembitepa ashi, “Asenok ket nung amtsük maka.”

¹⁷ Ya meteta Yisui parnok dang ashi, “Nenok mulung merangadoker asü? Amtsük maka ta kechiba jembiteper? Nenoki tang tonga memeteter no, mesüra tangateta mangateter no?

¹⁸ Tenük tener, nenoki mangur no? Aser tenarong tener nenoki mangashir no? Aser nenoki mebilemteter no?

¹⁹ Ni amtsük pungu agi meyi pungu rongnung sangsadang nenoki tanük-tari molok kwika shiten?” Parnoki pa dang langzü, “Terana.”

²⁰ “Meyi pezü rongnung tenet-to sangsadang nenoki tanüktari molok kwika sünga shiten?” Parnoki pa dang langzü, “Tenet”

²¹ Aser pai parnok dang ashi, “Nenoki ano mangateter no?”

Bethsaida Nung Nükpoker Ka Anebtsüba

²² Parnoki Bethsaidai aru aser pai kongshia anebtsütsü asoshi parnoki pa dangi nükpoker ka anir arua pa dang mepishi.

²³ Pai nükpokba teka nung amer yimtak nungi pila-a anir ao, aser pai pa tenük nung metzü nüloktsür, pa teka agi pa dak nemeter pa dang asüngdang, “Nai langka nguali ma?”

²⁴ Pai rangshia aji aser langzü, “Ni nisung angur; saka ni parnok süngdong jajar ama angur.”

²⁵ Idangji pai tanaben pa ket agi pa tenük nung nemet; pai rangshia reprang aser anebadok; aser pai ajak jangjaa angu.

²⁶ Aser pai pa par kidangi yoka ashi, “Yimtaki tanaben meyipa teima.”

Yisu Indang Peteri Nangzükba

²⁷ Yisu aser pa nütsüngtem Kaisaria lima nung aliba Filipi-i aru, aser pai lendang pei nütsüngtem dang asüngdang, “Nisungtemi ni shiba-a ta ashir?”

²⁸ Parnoki pa dang ashi, “Yohan Baptitsüba ta;” kari ashir, “Elia ta,” aser ano tangar kari ashir, “Ainkar rongnung ka.”

²⁹ Pai parnok dang asüngdang, “Saka nenokia ni shiba-a ta ashir?” Peteri pa dang langzü, “Na Khristaji lir.”

³⁰ Aser pai pa indang shinga danga teshi ta parnok dang ozüng agütsü.

Yisui Pa Asütsü aser Shia Arutsü Indang Shinba

³¹ Nisung Chir kanga tuo ashitsüla aser tamburtem, puti ungertem tezülurtemi pa sentoktsü, saka anogo asemnü lir pa shia arutsü ta pai parnok dang sayutsü tenzük.

³² Pai aji odi odia ashi. Idangji Peteri pa aniena pa arütsütsü tenzük.

³³ Saka pai meyiper pa nütsüngtem dak ranglok aser Peter arüja ashi, “Kü sülen atsüngzükang, Satan, kechiaser na Tsüngrem tsütsü masü, saka nai nisunger mapa indang bilemer”

³⁴ Pai pa dangi pei nütsüngtem den telok jar parnok dang ashi, “Kari kü sülen arunüra, pai pei sasa azüokang aser pei kangki apur kü sülen anitakang,

³⁵ kechiaser shibai pei taküm kümzüknür aji samatsü, aser shibai ni atema aser Osangtajung atema pei taküm samadir aji angutsü.

³⁶ Kechiaser nisungi alima ajak ajangzüker, pei taküm samara, kechi ajangzüktsü?

³⁷ Mesüra nisungi pei taküm melen kechi agütsütsü?

³⁸ Kechiyong iba jabujari aser temenen putu nung, shibai ni aser kü otem atema nüma metanglir, Nisung Chir-a pei Tebu sentsüwangshi nung kotak tenyartem den arudang, pai pa asoshi nüma matangtsü.”