MARK 7 - Ao Naga CL Bible - SQC Edition (BSI)

Tsüraburtem Yimsü-yimbong

¹ Yirusalem nungi aruba Farisitem aser tezülur kar pa dangi külemi sentep.

² Idangji Yisu nütsüngtem kar teka memetsüki chi chiyungba parnoki angu,

³ (kechiyong Farisitem aser Yihuda nunger ajaki tsüraburtem yimsü-yimbong benshia teka memetsükibo mechiyunger;

⁴ aser kodang shishidak nungi arudir, parnoki tzü mechigubo mechiyunger, aser marok-enrok aser chipo-anpo aser yongmenyin su shitokba yamala yimsüyimbong jenti amshi).

⁵ Farisitem aser tezülurtemi pa dang asüngdang, “Kechiba ne nütsüngtemi yimsüyim-bong nung mejajai teka memetsüki chiyunger?”

⁶ Pai parnok dang ashi, “Nenok anemsübatem indang Isaiai jungjunga shinogo, yamai zülua lir, ‘Iba puri parnok tebang agi ni akhüm tsübur, saka parnok mulungjang ni nungi talangka pila-a lir.

⁷ Parnoki amajok nung ni külemer, nisunger ozüngtemji tesayubatem ama sayur.’

⁸ Nenoki Tsüngrem ozüng toktsür, aser meimchir yimsü-yimbong benshir.”

⁹ Pai parnok dang ashi, “Nenoki nenok yimsü-yimbong benshitsü asoshi, Tsüngrem ozüng agiena ayur!

¹⁰ Kechiyong Mosai ashi, ‘Nebu aser netsü akhüm tsübuang, aser shibai tebu mesüra tetsü indang tamajung jembidir, pa atangji asütsü;’

¹¹ Saka nenoki ashi, ‘Oda nisung kati pei tebu aser, tetsü dang ashir, teyari kechi nenoki ni nungi ngula, aji Korban’ (tetezü, Tsüngrem nem kü tenla ama agütsüogo).

¹² Nenoki joko pa tebu mesüra tetsü asoshi pa nem kecha meinyakdaktsür.

¹³ Aji oda nenoki benshia aruba tsüraburtem yimsü ajanga Tsüngrem o amajok kümdaktsür, aser ibala mesükba mapa aika nenoki inyaker.”

Nisung Ka Memerüki Kümdaktsüba

¹⁴ Pai tanaben telokji pa dangi jar ashi, “Nenok ajaki kü dang angang aser angatetang;

¹⁵ Tema nungi nisung daki ia memenendaktsür, saka nisung dak nungi kechi adoker, aji agi nisung menentsür.

¹⁶ Nisung shiba tangashitsü tenarong tena ali, pai angang.”

¹⁷ Pai kodang telokti toktsür kidangi ai, pa nütsüngtemi pa dang o-entepba indangji asüngdang.

¹⁸ Pai parnok dang ashi, “Nenokia yamai mangateter no? Tema nungi nisung daki kechisa air, aji agi nisung menentsütsü makok, aji nenoki meshitet no?

¹⁹ Kechiaser aji temulungjangi mair, saka tepoki ia, metsü-meshidaki aor.” (Iba jagi chiyungtsü ajak temeshi ta pai sayur).

²⁰ Pai ashi, “Nisung dak nungi kechi adoker, aji agi nisung menentsür.

²¹ Kechiyong telunglen, nisung mulungjang nungi, shisatsü tamajung, jabujari, auyaba, nisung tepsetba,

²² nüktapangta, merumeruba, jakla tamajung, tekülak, teseplep, tenükmeremba, Tsüngrem atalaba, asüküm, tamachi,

²³ item tamajung ajak telunglen nungi adoker, aser item yagi nisung menentsür.”

Sirofonikatsür Ka Anebtsüba

²⁴ Pa yang nungjagi apuso aser Tair o Sidon linüki pila ao. Pai ki kati ai aser shinga nema aji memetetdaktsünü, saka pa miima melitet.

²⁵ Saka idangyongji tetsür ka shiba jala dak temenen tanela aket, lai Yisu indang angazüka, arua pa tsüngdang apudak.

²⁶ Tetsürji Grik tsür, Sirofoinika kin nungi liasü; aser temenen tanelaji la dak nungi aridokjang ta lai pa dang mepishi.

²⁷ Saka pai la dang ashi, “Techirtem tamasa tip temdakjangma, kechiyong tanurtem chiyungtsü bena arur azü madang endoktsü tim masü.”

²⁸ Lai pa dang ashi, “Atangji, Kibuba, saka langbang tugu nung aliba tanük-taribo azüia achir.”

²⁹ Pai la dang ashi, “Iba o ashibayong na oang, temenen tanelaji ne jala dak nungi oadokogo.”

³⁰ Lai pei kidangi ao aser aiür chanuji yipten nung mejanga temenen tanelaji oadoker angu.

Tenarong Tajak Nisung Ka Anebtsüba

³¹ Tanaben Tair linük nungi pa meyip aser Sidon lenmangi Dekapoli linük ajanga Galil tzüyim tonga aru.

³² Idangji tenarong tajak aser o mejembitetba nisung ka parnoki pa dangi anir aru, aser pa dak teka agi nemetang ta pa dang mepishi.

³³ Telok nungi pai pa kija dang anien aser nisungba tenarong nungji pa temeyong asenokja; pai metzü metsür, pa temeli nungji kongshi;

³⁴ aser anünglen repranga pai nünga pa dang ashi, “Effatha” (tetezü “lapokang”).

³⁵ Idangyongjisa pa tenarong lapok aser pa temeli sala, aser pai leptet lepteta jembi.

³⁶ Ibai shinga danga teshi ta pai parnok dang sashisashia nemtem, saka pai kodaka sashia ashi, yamaji taliang parnoki ayimsünga prokshi.

³⁷ Parnoki kanga süngmanga ashi, “Pai ajak jungjunga inyakogo; pai narongjaker nema angashidaktsür, aser temeli tatsükia jembidaktsür!”