MARK 16 - Ao Naga CL Bible - SQC Edition (BSI)

Yisu Shia Aruba Indang

¹ Amungnüji süir külen, Mari Magdalin, Yakob tetsü Mari, aser Salome parnoki pa dak teronem menemba totzü mezütsütsü asoshi itemji ali.

² Deobar anepdang yakta, anü adokli, parnoki leper jagi aru.

³ Parnoki jembitepa ashi, “Shibai asenok asoshi lungpakji leprungki kikümbang nungi lungdoktsütsü?”

⁴ Aser reprangketa yok nung, lungpakji lungdoker parnoki angu; kechiaser lungpakji kanga tulu liasü.

⁵ Aser leper jagi aidang asangur ka sü temesüng ka abener ajichilen parnoki mena angu; aser parnoki süngmang.

⁶ Pai parnok dang ashi, “Tesüngmang, kangki nung angenlokba Nazaret nunger Yisu nenoki bushir. Pa shia aruogo, pa yangi mali, parnoki pa ayudakji ajiang.

⁷ Saka oang, pa nütsüngtem aser Peter dang shiang; aser pa nenok dang tama Galili odagi; aser pai nenok dang shia aliba ama idakji nenoki pa angutsü.”

⁸ Aser parnoki ilunga tugua leper nungi ajen; kechiaser tatententsü aser taoksatsü parnok dak atong; aser parnoki shinga danga kecha mashi, kechiaser parnoki tsübu. MARKI ZÜLUBA MELEPZÜNG O TALANGBA

Mari Magdalin dangi Yisu Adokba

⁹ Tang Yisu kodang mezüng deobar anepdang yakta shia aru, pai tamasa Mari Magdalin, shiba dak nungi temenen tanela tenet aridoktsü, la dangi adoka sayu.

¹⁰ Lai or pa den alirtem dang, parnok mangyima jeba alidang ashi.

¹¹ Saka kodang pa taküm lir aser lai pa nguogo ta angazük, parnoki aji mamangtet.

Pa Nütsüng Ana Dangi Adokba

¹² Iba sülen ano parnok rongnung nütsüng ana yimtakleni oya alidang, tereprangtsü balaka agi pai parnok dangi adoka sayu.

¹³ Aser parnoki or aji tangar tanüngba danga ashi, saka parnoki tena danga mamang.

Nütsüngtem Tenyaba Indang

¹⁴ Ajisür külen terkaji chiyungdak mena alidang, pai parnok dang adoka sayu, parnoki mamangba aser temulung merangba asoshi pai parnok arütsü, kechiaser pa shia arur külen angurtem danga parnoki mamang.

¹⁵ Aser pai parnok dang ashi, “Nenoki alima ajakleni oang, aser teyanglubatem ajak dang osangtajung sayutsüngiang.

¹⁶ Shibai amanga baptidir, pa kümzüktsü; saka shibai mamanglir, pa aitsütsü.

¹⁷ Aser shirnoki amangdir, parnok asoshi temaitsü itemi alitsü: kü tenüng nung parnoki temenen tanelatem aridoktsü; aser oshi tasen agi jembitsü;

¹⁸ Parnoki pertem bena arutsü, aser parnoki tasütsü langka jemaka, iba jagi parnok teraka mekangshitsü; parnoki shirangertem dak teka agi nemettsü, aser parnok anebtsü.”

Yisu Kotaki Atuba

¹⁹ Yamaji parnok den jembir külen, Kibuba Yisu kotaki anir atu, aser Tsüngrem tajichilen amen.

²⁰ Aser Kibubai parnok den külemi inyakba, aser ochi temaitsütem agi kuli agüja, parnoki ajaklen oa sayutsüngi. (Laishiba kar nungbo iba kaket sülen iba oren tatsüba agi yamai temdakja angutsü) Saka parnok dang ashiba ama parnoki Peter aser pa den alirtem dang o tatsü agi metetdaktsü. Aser iba sülen, parnok ajanga anüdoklen nungi anüolen tashi, temeshi aser mesamatsüba teti tatem maka tekümtet proktsü Yisui parnok yok.