MARK 13 - Ao Naga CL Bible - SQC Edition (BSI)

Tenla Ki Raksatsü Indang Shinba

¹ Pa tenla kidang nungi adokdang pa nütsüngtem rongnung kati pa dang ashi, “Tesayur, ajiang, kechi amala tesüngmangtsü lung aser kechi amala kitem,”

² Yisui pa dang langzü, “Item ki tulu nai nguali ma? Melokshidaktsüi idaki lung ka manung lung ka anünga malitsü.”

Timtem Toushi Tenzükba

³ Oliv tenem nung tenla ki jakdang pai mena alidang, Peter, Yakob, Yohan aser Andria nungeri pa dang miima asüngdang,

⁴ “Itemi kodang ataloktsü, aser item ajak ataloktsü mapang aitdang temaitsü kechi asütsü, onok dang shiangma.”

⁵ Yisui parnok dang ashitsü tenzük, “Shingaia nenok mashileni manidaktsütsü kümdangangma.

⁶ Kechiaser aikati ‘Ni paji lir’ ta kü tenüng nung jembia arutsü aser parnoki aika mashileni anitsü.

⁷ Aser kodang nenoki raraba indang aser rara adoktsüba osang angashidir; nenok taoksama; item ya ataloktsüla, saka tatem ano masü.

⁸ Kechiyong kini kin anema aser yimli-i yimli anema aramesotsü, tesem tesem nung menoknok anoktsü aser ayawara alitsü. Item ya tekangshitsü tetenzüker asütsü.

⁹ Saka nenoki pei sasa kümdangangma; kechiyong parnoki nenok mungdang nem bendanga agütsütsü, sinagog nung nenok dak azüktsü aser yimsüsür tulur o chubatem madak ni asoshi nenoki parnok tsüngdang kuli asütsü.

¹⁰ Aser Osangtajungji kin ajak dang tamasa sangoktsütsüla.

¹¹ Kodang parnoki nenok o bendangdaki anir arudir, nenoki kechi jembitsü mapang matongdang kecha teratama, saka iba mapang nung nenok nem kechisa agütsüdir aji jembiang, kechiyong tejembirtemji nenok masü, saka Tanela Temeshi asütsü.

¹² Saka adianui adianu aser tebui techir südaktsütsü asoshi bendanga agütsütsü; aser techiri tsüraburtem anema apusotsü aser parnok südaktsütsü.

¹³ Aser kü nüng atema nisung ajaki nenok sempatsü; saka shibai tatem tashi aremdir pa kümzüktsü.

Timtem Tekangshi Tulu

¹⁴ “Saka nenoki kodang tesempatsü tesamaba nisung, Tsüngrem temeshi kidang, kong pa noktaka alitsü metemsü, idakji noktaka ngudir (shibai azünger pai angatetang), idangji Yihuda lima nung alirtem tenemleni jenang.

¹⁵ Aser shiba par kilem manung ali pa par kidang nungi kecha abentsü telu, mesüra tei;

¹⁶ aser shiba alu nung ali pa pei sü abentsü meyipa tetugu.

¹⁷ Saka iba tensa nung temang mazüngertem aser mama yongdaktsürtem asoshi aiatai!

¹⁸ Aser aji tsüngkhüm nung masütsü nenoki sarasadema liang.

¹⁹ Kechiyong item anogo nungji timtem tekangshi tulu alitsü, Tsüngremi alima yangluba tenzükli nungi tang tashi iba ama maliasü, aser kodanga malitsü.

²⁰ Saka Kibubai item anogo mesüktoktsü asübo, nisung shinga mekümzüki lila; saka teshimtetpur, shir pai shimtet, parnok asoshi pai anogoji süktoktsü.

²¹ Anungji nisung kari nenok dang, ‘Ajiang, Khrista yangi lir!’ mesüra ‘Ajiang, pa yangji lir’ ta shira aji tamangma.

²² Kechiyong tiyazü Khristatem aser tiyazü ainkartem adoktsü aser takoktsü süra, teshimtetba purtem mashileni anitsü asoshi temaitsü aser tesüngmangtsü sayutsü.

²³ Saka nenok kümdangangma; ajiang, ni nenok dang tamasayongi ajak shiogo.

Nisung Chir Aruba

²⁴ “Saka item anogo nungji, iba timtem tekangshi süir külen, anü mangadoktsü aser itai pei tesangwa magütsütsü.

²⁵ Aser anüng nungi petinutem tsüktsü aser anüng nung aliba aintem anokshitsü.

²⁶ Aser idangji Nisung Chir ain aser sentsüwangshi tulu den mepet nung aruba parnoki angutsü.

²⁷ Idangji pai kotak tenyartem yoktsü aser ali tatem külen nungi kotak tatem külen tashi, kinük pezü sülen nungi, pei teshimtetba purtem anitentsü.

Mungudong Nungi Tangazüktsü

²⁸ Mungudong nungi o-entepbaji angazükang; kodang pa kongsang lanu küma to adokdir mei anasa lir ta nenoki metet.

²⁹ Anungji nenokia itemi ataloka aruba angudang, pa ana nung, oda kishizüng nung lir ta metetang

³⁰ Atangji ni nenok dang ashir, item ajak matalok tashi iba putu süia maotsü.

³¹ Anüng aser ali süitemtsü, saka kü o mesüitemtsü.

Memetetba Anogo aser Mapang

³² “Saka iba anogo mesüra mapang indang, Tebu alema kotak tenyartemia, mesüra, techiria mesüra shingaia memetet.

³³ Nenoki kümdanga liang, saksalemang aser sarasademang; kechiaser mapangji kodangar nenoki memetet.

³⁴ Ya tanga linüki aeni aoba nisung ka mesüker, shibai pei kilirtem nem tashi agütsür, nisung shia nem pei pei mapa nungloktsür kinüker dang saksalema liang ta ozüng agütsür pei ki toktsür bendang limai talangi aeni ao.

³⁵ Anungji saksalemang, kechiaser ki kiburji nikongtsütsü asü, ayatrem nung asü, an kongbang nung asü, anepdang asü, kodang arutsüar nenoki memetet.

³⁶ Aji mesüra pa aoksa arutsü aser pai nenok mejanga angutsü.

³⁷ Aser ni nenok dang kechi ashir, aji nenok ajak dang ashir saksalema liang.”