LIPOK 1 - Ao Naga CL Bible - SQC Edition (BSI)

Tsüngremi Yanglubatem Indang

¹ Tetenzük nung Tsüngremi anüng aser alima poktetdaktsü.

² Alimaji kecha mekümtet aser tazüngla liasü. Ammang tzüyim manung liasü aser Tsüngrem Tanela tzüma nung liasü.

³ Aser Tsüngremi ashi, “Tesangwa adokang” aser tesangwa adok.

⁴ Tsüngremi tesangwaji junger ta ajitet aser pai tesangwaji ammang nungi sadang.

⁵ Tsüngremi tesangwa dang “Anogo” aser ammang dang “Aonung” ta aja. Aonung aser anepdang naji anogo mezüngbuba liasü.

⁶ Tsüngremi ashi, “Tzü nungi tzü sadangtsüsa tzüji nungtenang” aser yamaji liasü.

⁷ Anungji Tsüngremi tzü temalen aser tzü telunglen ta sadanga yanglu aser yamaji liasü.

⁸ Tsüngremi iba dangji “Anüng” ta aja. Aonung aser anepdang naji anogo tanabuba liasü.

⁹ Tsüngremi ashi, “Anüng kübok aliba tzü ajak tesem kati nungtenang, aser ali takong adokang,” aser yamaji liasü.

¹⁰ Tsüngremi ali takong dang “Alima” aser tzü nungtenba dang “Tzüyim” ta aja. Aser Tsüngremi aji junger ta ajitet.

¹¹ Tsüngremi ashi, “Alimai rem lanu tapu ajak, metsüjang atangba süngdonglidong tapu ajak, aser tejang atangba süngdong tapu ajak adokdakjang.” Aser yamaji liasü.

¹² Ali jagi rem o metsü tapu shia atangba süngolio aser tejang atangba süngdong tapu ajak adokdaktsü aser Tsüngremi aji junger ta ajitet.

¹³ Aonung aser anepdang naji anogo tasembuba liasü.

¹⁴ Tsüngremi ashi, “Anüngdang nungi aonung lemdangtsü asoshi anüng nung tesangwatem lidakjang aser itemji temaitsü asoshi, mapang, anogotem aser kümtem aser tsüngkhüm mongpu asoshi sang;

¹⁵ Parnoki anüng nung tesangwa ayaba jagi alima nung tesangwa agüjang.” Aser yamaji liasü.

¹⁶ Aser Tsüngremi tesangwa tulu ana yanglu; anüngdang asoshi anü, aonung asoshi ita; pai ano petinutema yanglu.

¹⁷ Alima sangwadaktsütsü atema pai tesangwaji anüng nung yutsü,

¹⁸ anüngdang aser aonung madak yimsü südaktsütsü, ammang nungi tesangwaji lemdangtsü asoshi liasü, aser Tsüngremi aji junger ta ajitet.

¹⁹ Aonung aser anepdang naji anogo pezübuba liasü.

²⁰ Tsüngremi ashi, “Tzüji taküm shiruru aika agi süngdakjang, aser ozütem ali temalen anüng tom nung yimzüdakjang.”

²¹ Tsüngremi tzüyim shiruru tulutem, tzü nung arakzüba taküm shiruru ajak, aser ozü tapu ajak yanglu. Aser Tsüngremi aji junger ta ajitet.

²² Pai item ajakji moaja ashi, “Tejang rena tangang aser tzüyim tzüji süngdakjang aser alima nung ozütem rendakjang.”

²³ Aonung aser anepdang naji anogo pungububa liasü.

²⁴ Tsüngremi ashi, “Alima nung shiruru tapu ajak, kiset shiruru arem shiruru tulu aser tila ajak adokdakjang” aser yamaji liasü.

²⁵ Tsüngremi alima nung shiruru tapu ajak yanglu, aser Pai aji junger ta ajitet.

Tsüngremi Meimchir Yangluba

²⁶ Idangji Tsüngremi ashi, “Tang asenoki asen ama asen mesükba nung meimchir yangludi; aser tzüyim ango madak, anüng ozütem aser shiruru tapu ajak; kiset aser arem shiruru tulu tila ajak madak parnok ketdangser kümdaktsüdi.”

²⁷ Anungji Tsüngremi nisung pa mesükba nung tebur aser tetsür yanglu.

²⁸ Tsüngremi parnokji moatsü aser ashi, “Soyapokya-ang aser jenti rena alimaji süngdakjang aser aji azüokang. Tzüyim ango madak, anüng ozütem aser alima nung aliba kechisarena madak ketdang sang.

²⁹ Aser Tsüngremi ashi, alima nung aliba tejang atangba, süngo-lio ajak aser süngjang atangba süngdonglidong ajak ni nenok nem agütsür; nenok asoshi itemji chiyungtsü alitsü.

³⁰ Aser alima nung aliba shiruru ajak nem aser anüng ozütem ajak, ali nung ayazüba ajak nem ni süngo-lio tajem chiyungtsü asoshi agütsür aser yamaji liasü.”

³¹ Tsüngremi pai yangluba ajak angu aser ajiang aji kanga tajung liasü. Aser aonung aser anepdang naji anogo trokbuba liasü.