LEVI 7 - Ao Naga CL Bible - SQC Edition (BSI)

Tai Temelen Tenla

¹ “Item ya tai tenla asoshi ozüng lir, koba kanga temeshi lir.

² Kodang iba atema shiruru tepsetdir aji tenladak septsülen kong tarongba tenla asoshi shirurutem tepseter idakji tepsettsüla, aser iba azüji tenladak meketa rükloktsüla.

³ Iba temo ajakji tenlatsüla, teben poknüng nembangba temo,

⁴ tezüngjang aser iba temo aser temesen shilem tajungdak.

⁵ Putiri aji Kibuba dang chiyungtsü tenla ama temo ajakji arongtsüla.Ya tai temelen tenla lir.

⁶ Putir rongnung tebur shiai ya achitsü akok, aser aji temeshidak achitsüla, kechiaser ya kanga temeshi lir.

⁷ “Temenen tenla aser tai tenla asoshi ozüng ya lir: putir shibai temenen aser tai pungitsü inyaker, shiji pa meyong alitsü.

⁸ Shiruru koba tarongba tenla asoshi agütsüdir, aser putir shibai tarongba tenlaji agütsüdir; shiruru teküpji pa meyong alitsü.

⁹ Chiyungtsü tenla asoshi koba amtsük susa nung, mesüra amtsük asangba po nung yangludir, aser putir shibai tenlaji agütsüdir, amtsükji pa meyong alitsü.

¹⁰ Saka koba chiyungtsü totzü den meyoktepba süaka takong süaka lir, aji Aron jabasotem ajak sakusa lemsatsüla.

¹¹ “Kibuba dang tenlatsü asoshi ibai telungjem tenla ozüng lir.

¹² Kari tenüngsang tenla agütsüra, pai abenba shiruru den piyazü meinokba amtsük temelem totzü den meyokteper, mesüra amtsük tanük totzü den meyokteper agütsütsüla.

¹³ Iba den ano piyazü enoka yangluba amtsük agi tenlatsüla.

¹⁴ Iba nungi tapu shia ka ka pai Kibuba dang tenla balaka ama agütsütsüla, aser putir shibai shiruru züji tenladak rükloktsüdir, aji pa meyong alitsü.

¹⁵ Shiji tenla agütsüba anogo nungsa chimadoktsüla, mesüra pai aji anepdang tashi kecha anünga mayutsüla.

¹⁶ “Nisung kari pai azüngashiba atalokba tenla, mesüra temulunger tenla ama telungjem tenla benra, iba shiji tenla agütsüba anogo nung dang masü, saka anogo tanga nunga achitsü akok.

¹⁷ Anogo asemnübuba tashi shiji anüngra aji mi nung arongtsüla.

¹⁸ Iba shiji anogo asemnübuba tashi chira, Tsüngremi nisungba tenlaji magizüktsü. Tenlaji temeshi ta mezüngshitsü, saka aji memerükba ama kümdaktsütsü, aser shibai aji chidir pai iba taiji abentsü.

¹⁹ “Shi jagi memerükba oset kar dak kongshira, idangji shiji machitsüla, saka mi nung arongtsüla. Shibasa merükteta lir pai shiji achitsü akok,

²⁰ saka memerüki nisung kari aji chira, iba nisung Tsüngrem nübur rongnungi jentoktsü.

²¹ Ano kari memerükba oset kar dak, nisung mesüra shiruru dak kongshir külen shiji chira, iba nisung Tsüngrem nübur rongnungi jentoktsüla.

Temo Aser Azü Machitsü Noktangba

²² Kibubai Mosa dang ashi,

²³ “Israel nunger dang shiang, nenoki nashi, san mesüra nabong temo machitsüla.

²⁴ Shiruru tasü mesüra arem shirurui ngusetba item temoji machitsüla, saka tanga nüngdak asoshi amshitsü akok.

²⁵ Kibuba nem chiyungtsü tenla asoshi agütsüba temo kari chira, iba nisung Tsüngrem nüburtem rongnungi jentoktsüla.

²⁶ Israel nungertem kongsa lidir liaka, parnoki ozü mesüra shiruru zü parnok chiyungtsü asoshi merenemtsüla.

²⁷ Kari iba ozüng raksara iba nisung Tsüngrem nüburtem rongnungi jentoktsüla.”

Putir Shilem

²⁸ Kibubai Mosa dang ashi,

²⁹ “Israel chirtem dang shiang, shibai telungjem tenla bendir, pai Kibuba dangi sempet balaka ama shilem kar bener arutsüla.

³⁰ Chiyungtsü tenla ama aji pei teka nung bener arutsüla. Kibuba ajak dang ayipshitsüla tenla ama shiruru mamalong agi ayipshitsüla, temo den mamalongji pai bener arutsüla.

³¹ Putiri temoji tenladak arongtsü, saka mamalongji putir meyong alitsü.

³² Telungjem tenla asoshi tepsetba shiruru tepi tajichi tenla balaka ama agütsütsüla.

³³ Aron jabasotem shibai telungjem tenla azü aser temoji tenladir, tajichi tepi pa shilem asütsü.

³⁴ Shiruru mamalong aser tajichi tepi aji sempet balaka aser tesarutetba nungi tenla ama Kibuba Israel nungertem nungi agiteta putir nem agütsüogo. Israel nungertemi putu ajak nung putir nem aji agütsütsüla.

³⁵ “Kibubai parnok putir mapa tenzüktsü shimtetba anogo nung Kibuba nem agütsüba chiyungtsü nungi ibai Aron aser par jabasotem nem agütsüba lir.

³⁶ Iba anogo nung Kibubai Israel nungertem dang iba shilemji parnok nem agütsütsü mela. Iba temelaba ozüng ya Israel nungertemi putu ajak nung benshitsüla.”

³⁷ Tarongba tenla, chiyungtsü tenla, temenen tenla, tai tenla, bendanga agütsüba indang, yimjung tenla, item asoshi iba temelaba ozüng lir.

³⁸ Sinai tenem lisem lima kodang Mosai Israel nungertem dang parnoki tenla agütsütsü indang ashi, iba anogo nung Kibubai Mosa nem iba ozüng ya agütsü.