LEVI 5 - Ao Naga CL Bible - SQC Edition (BSI)

Temenen Tenla Asoshi Ozüngtem

¹ “Aser kari temenen menara, aser azüngashiba ola angashir, aji pai ngur mesüra meteter kuli süa lira, aser pai ola madokra, idangji pa tai pai abentsü.

² Mesüra kari memerükba oset kar dak kongshira, memerükba shiruru tasü mang dak süshia, memerükba kiset shiruru tasü mang dak süshia, mesüra memerükba ayazüba shiruru tasü mang dak süshia, aser aji pa nungi nembanga lira, pa memerüki akümtsü aser pa tai alitsü;

³ mesüra nisung memerükba dak pai kongshira, memerükba kechi agisa nisung menendaktsüdir, aser aji pa nungi nembanga lira, kodang pai aji metetdir, idangji pa tai alitsü

⁴ Kari züpazüpa-a tamajung inyaktsü, mesüra tajung inyaktsü pei tebang nungi azüngashira, kechisa nisungi züpazüpa-a azüngashia jembidir, aser aji pa nungi nembanga lira, kodang pai aji metetdir, idangji ibala ajak nung pa tai alitsü.

⁵ Aser kodang item rongnung ka nung tanga tai lidir, kechi nung pai tai mena, iba atema pai tai nangzüktsü,

⁶ aser pai menaba temenen asoshi Kibuba dangi pa tai tenla, san telok nungi tsüla ka, san chanu ka, mesüra nabong ka, temenen tenla, asoshi pai bener arutsü, aser pa temenen indang putiri temenen pungitsü pa asoshi yanglutsü.

⁷ Aser pai san chanu agi tenlatsü mokokra, idangji pai pa tai tenla, kechi nung pai tai mena iba asoshi, guduru ana, mesüra posü chanu ana, Kibuba dangi bener arutsü; ka temenen tenla asoshi, aser ka tarongba tenla asoshi.

⁸ Aser pai itemji putir dangi bener arutsü, aser koba temenen tenla lir, tamasa pai aji tenlatsü, aser pa tekong nungi tekolak mesentsü, saka aji mesadangtsü;

⁹ aser temenen tenlaba züji kar pai tenladak züngdang rükshitsü; aser tanüngba züji tenladang züngdang külentzü nung yimdaktsütsü, ibai temenen tenla lir.

¹⁰ Aser tanabubaji pai tarongba tenla asoshi yimsü amato agütsütsü, aser pai temenen menaba indang putiri pa asoshi temenen pungitsü yanglutsü, aser pa tai atoktsü.

¹¹ “Saka pai guduru ana, mesüra posü chanu ana agütsütsü mokokra, idangji pai kechi nung temenen mena iba asoshi tenla, amzü tanük efa ter shilem nung ka temenen tenla asoshi bener arutsü, pai iba nung totzü süshia mesüra liangmesen süshia meshioktsüla, kechiaser ibai temenen tenla lir.

¹² Aser aji pai putir dangi bener arutsü, aser aji putiri pa tekabu ka sünga tebilemtettsü asoshi agitsü, aser Kibuba dang mi agi tenlaba manung, tenladak aji arongtsü, ibai temenen tenla lir.

¹³ Aser item mapa kar pai menaba pa temenen indang pa asoshi putiri temenen pungitsü inyaktsüla, aser pa tai atoktsü; aser chiyungtsü tenla amato, tanüngbaji putir meyong alitsü.”

¹⁴ Aser Kibubai Mosa dang ashi,

¹⁵ “Kibuba temeshi oset nung kari meshiteti tai benshira, idangji pai pa tai tenla, san telok nungi tarak maket san tepung chanu ka bener Kibuba dangi arutsüla, aji tai tenla asoshi temeshidak aliba shekel agi nai taribi odangba yari agütsütsü;

¹⁶ aser temeshi oset nung pai aibelenba asoshi pai temelen agütsütsüla, aser shilem pungusübuba yangji enoker aji putir nem agütsütsüla; aser putir jagi pa asoshi san tepung chanu agi tai tenla pa menen pungitsü atema inyaktsü, aser pa tai atoktsü.

¹⁷ “Aser kari temenen menara, aser Kibubai teinyak ta ashiba kar inyakra, pai aji memetetaka, pei tai pai abentsü.

¹⁸ Aser san telok nungi san tepung chanu tarak maket ka, ne shitet agi tai tenla asoshi putir dangi bener arutsüla: aser aibelenba koba pai meshiteti inyak pa asoshi putiri temenen pungitsü inyaktsü.

¹⁹ Ibai tai tenla lir, atangji Kibuba tsüngdang pa tai lir.”