LEVI 22 - Ao Naga CL Bible - SQC Edition (BSI)

Tenlatem Atema Ozüng

¹ Kibubai Mosa dang ashi,

² “Aron aser par chirtem dang shiang, nenoki kü temeshi tenüng mezüngmeshi tesü, anungji Israel purtemi kü nem bendanga agütsüba tenlaji akhümtsübua benshiang. Ni Kibuba lir.

³ Parnok dang shiang, nenok chirtem rongnung kari memerükteti Israel nungertem kü nem bendanga agütsüba anasa tenladaki arura, iba nisungji kü jakdang nungi jentoktsüla. Iba putir ajak asoshi nenok atema ozüng alitsü. Ni Kibuba lir.

⁴ “Aron chir rongnung kar dak zütsüra keta lira mesüra langka ayimba agi kangshia lira, pai pa merükteta maküm tashi temeshi tenlatemji achitsü makok, mesüra putir kari tasü mang dak kongshiba agi memerüki kümdaktsütsü, mesüra yima aliba nisung ka dak kongshiba agi,

⁵ mesüra memerükba shiruru dak mesüra nisung dak kongshiba agi pa memerüki kümdaktsütsü.

⁶ Putir shiba memerüki akümer, pa aonung tashi memerüki alitsü, ano pa tzü mechigu tashi temeshidak tenlaba chiyungtsü kecha achitsü makok.

⁷ Anü yir külen nisungji merükteta alitsü, iba sülen temeshi tenlatem koba pa chiyungtsü lir aji achitsü akok.

⁸ Pai pei sasa asüba mesüra tanga shirurui tepsetba shiruru kecha machitsüla. Iba yagi pa memerüki kümdaktsür, Ni Kibuba lir.

⁹ “Putir ajaki ni agütsüba ozüngtemji benshitsüla. Yamaji mesüra parnoki temeshi ozüngtemji mebenshira parnoki temenen aser iba yongji parnok asütsü, parnok temeshi nung yangluba Tsüngrem Ni Kibuba lir.

¹⁰ “Putir dak alaka tangar shinga oda putir den semloka alir mesüra ayanger shingaia tenlaji machitsüla.

¹¹ Saka pai alar kar pa sen agi alia lira, mesüra par kidang asobatemi putiri agizükba tenlatemji achitsü akok.

¹² Putir jala saka tanga inyaker kati agira temeshi tenlabatemji lai achitsü makok.

¹³ Saka putir jala kar amia lira mesüra tanur mesoi palar la tebu dangi meyipa arua lira, tebui agizükba temeshi tenlatemji lai achitsü akok. Putir kinünger dak alaka tangar shingaia aji achitsü makok.

¹⁴ “Nisung kari aibelena temeshi tenlaji chira, pai iba nungi shilem pungu enoker putir nem agütsütsü.

¹⁵ Israel nungertem Kibuba nem agütsüba tenlaji putiri memenentsütsüla.

¹⁶ Temeshi tenla den parnok nem chidaktsüba agi parnok dangi temerenshi, marudaktsütsüla. Itemji temeshi yangluba Ni Kibuba lir.”

Magizüktetba Tenlatem

¹⁷ Kibubai Mosa dang ashi,

¹⁸ “Aron aser pa jabasotem aser Israel chirtem dang oda ya shiang: Israel kidongi saka Israel rongnung alir bendanger saka, kodang tarongba tenla süshia, temulungtetba tenla süshia agütsüdir tarak maketba shiruru tenlatsüla.

¹⁹ Tenlaji agizüktettsüsa nashi pungchi san mesüra nabong tepung tarak maket agi tenlatsüla.

²⁰ Saka tarak aketba shiruru kecha nenoki metenlatsüla: kechiyong aji nenok asoshi magizüktsü.

²¹ Kodang nisung kari Kibuba nem yimjung tenlatem parnok tatemzükba tenla mesüra temulungtetba atema agütsüdir, ibaji agizüktettsüsa tarak mesüra pungmen maket, asütsüla.

²² Tenük tapok, telemta aketba yamala komo keta aliba tenladak chiyungtsü tenla asoshi Kibuba dang metenlatsüla.

²³ “Nashi mesüra san süshia rajang mesüra telemta temulungtetba tenla asoshi agütsütsü akok: saka tatemzükba tenla asoshi aji magizüktsü.

²⁴ Shiruru tepung kobasa tejang ajemrepa mesüra menüngrepa, mesüra raksa-a lidir, yamalaji Kibuba dang metenlatsüla. Nenok lima nung ibala meinyaktsüla.

²⁵ Nenoki yamala shiruruji Tsüngrem nem chiyungtsü tenla agütsütsü asoshi bendanger ket nungi magizüktsüla.”

²⁶ Kibubai Mosa dang ashi,

²⁷ “Kodang nashi, san, mesüra nabong tepung mepudir, aji anogo tenet tetsü den alitsü. Anogo tinübuba nungi ibaji Kibuba nem mi agi tenlaba asoshi agizüktsütsü.

²⁸ Nashi süshia san süshia nabong süshia, tetsü aser techanu künüyongi metenlatsüla.

²⁹ Kodang nenoki Kibuba nem tenüngsang tenla agütsüdir, aji agizüktettsü nenoki tenlatsüla.

³⁰ Panüjisa aji achitsüla, aser anepdang tashi nenoki aji anünga mayutsüla.

³¹ “Kü temelabatem nenoki benshiang, ni Kibuba lir.

³² Nenoki kü temeshi tenüng temenentsü, Israel nunger ajongai ni temeshi ta metetang. Nenok temeshi yangluba ni Kibuba lir:

³³ aser Ni nenok Tsüngrem asütsü asoshi Ijip lima nungi nenok anitet, Ni Kibuba lir.”