LEVI 21 - Ao Naga CL Bible - SQC Edition (BSI)

Putirtem Atema Ozüng

¹ Kibubai Mosa dang ashi, “Aron chirtem putirtem den jembiang aser shiang. Putir shingaia pei nübur mangzüdak munga pei sasa memerüki mekümdaktsütsüla.

² Oda pei kimang, tetsü mesüra tebu, pei jabaso mesüra jala, aser tedi-tenu dak alaka.

³ Mesüra kibong mekümi aliba adianu shiba kinungpu mali aser pa den semloka alir, la asoshi pai pei sasa menentsü akok.

⁴ Pai kibong akümba agi sosemba adianutem asüdanga idakji pa sasa memenentsüla.

⁵ “Putir shingai pei tenapa meketa ku mesüdoktsüla, mesüra bangsem o tatempanglak mesüdoktsüla, mesüra shi nung kecha memejeptoktsüla.

⁶ Parnok pei Tsüngrem tsüngdang meshiteta alitsü, aser pa tenüng memenentsütsüla. Kechiaser Kibuba dang mi agi tenlaba aser chiyungtsü tenla parnoki Tsüngrem dang tenlar, anungji parnok temeshi alitsüla.

⁷ Parnoki nüktapangtatsür, mesüra tetsür shiba tasüngtet masü, aser pei kinungpuri balaba tetsür magitsüla kechiaser putirji Tsüngrem madang temeshi lir.

⁸ Putirji temeshi ta nüburtemi züngshitsüla, kechiaser pai chiyungtsü tenla ajak kü nem agütsür. Ni Kibuba lir, ni temeshi.

⁹ Putir jala kar nüktapangtatsür kümra, lai tebu mezüngmeshir, la mi nung arongtsüla.

¹⁰ “Temaba putir shiba kolak nung temezütsüba totzü shilokja lir aser putir temeshi sobutsü, sobutsü shimteta lir, pai mangyim sayutsü atema pei kolak memesüi pei süoshi shisar mesayutsüla.

¹¹ Tasümang alidaki pa maotsüla, pai pei tsürabur tasümang alidaki oa pa sasa memenentsüla,

¹² mesüra tekülemdak nungi adoka pei Tsüngrem memenentsütsüla, kechiaser Tsüngremi totzü mezüja bendanga agütsüba pa madak kar. Ni Kibuba lir.

¹³ Pai tasüngtet aiür kibutsü agitsüla,

¹⁴ pai amitsür, mesüra balaba, mesüra nüktapangtatsür magitsüla, saka nübur nungi tasüngtet aiür pai kibutsü agitsüla.

¹⁵ “Yamaji mesüra pai pei chirtem shirnok temeshi alitsü tim parnok menendaktsütsü. Ni Kibuba lir. Aser ni pa temaba putir asoshi shimteta ayu.”

¹⁶ Kibubai Mosa dang ashi,

¹⁷ “Aron dang shiang, temang nung timtem aketba ne chir shiranga lira kü nem chiyungtsü tenla magütsütsüla,

¹⁸ Temang nung timtem aketba nisung shingaia tenlaji magütsütsüla, nükpoker, tsüngtsüker, mesüra tejak telemta;

¹⁹ Teperem tatsük mesüra teka tatsük;

²⁰ teperem tatsük mesüra rajang; tenük tashitak aketer mesüra anakra aketba, aser teyangluba nisung.

²¹ Aron putir semchirtem rongnung kar danga temang timtem lira pai kü nem chiyungtsü tenla magütsütsüla.

²² Yamala nisungi kü nem agütsüba chiyungtsü tenla aser temeshi chiyungtsü tenlaba ajak achitsü akok.

²³ Saka pa dak timtem alinung pai sentep süki temeshidak sabang tonga maotsüla, pai itemji memenendaktsütsüla, kechiaser ni Kibuba lir, aser ni itemji temeshi yanglu.”

²⁴ Anungji Mosai item ajak Aron aser par chirtem, aser Israel chir ajak dang ashi.