LEVI 2 - Ao Naga CL Bible - SQC Edition (BSI)

Chiyungtsü Tenla

¹ “Kodang kari tenla atema Kibuba dangi chiyungtsü tenla agütsüdir, pai aji amzü tanük küma menüngsatsüla. Iba manungji pai totzü aser liangmesen enoktsüla,

² aser aji Aron jabasotemi, putirtem dangi bener arutsüla. Putiri amzü tekabu ka, totzü aser liangmesen ajakji agiteta tenladak bilemteta Kibuba madang tarongba tenla asoshi arongtsüla. Iba chiyungtsü tenlaba teronemji Kibuba madang tajung lir.

³ Tenla agütsür tanüngbaji Aron aser par jabasotem meyong alitsü, ibai Kibuba nem agütsüba chiyungtsü nungi agitet nungji ya kanga temeshitiba alitsü.

⁴ “Aser kodang nai am yangluba su nung amtsük sanga chiyungtsü tenla agütsüdir, ibaji piyazü meinokba amzü tanük totzü den meyokteper mesüra piyazü meinokba amtsük tapak totzü mezür asütsüla.

⁵ “Ne tenlaji amtsük yangluba susa nungi süra, aji piyazü meinokba amzü tanük totzü den meyoktepba alitsüla.

⁶ Nai aji anüka raksar, iba manung totzü shiloktsütsüla; ibai chiyungtsü tenla lir.

⁷ “Tenlaji po nung asangba amtsük süra, aji amzü tanük aser totzü agi yangluba asütsüla.

⁸ Aser item oset agi yangluba chiyungtsü tenla nai Kibuba dangi bener arutsüla; aser aji putir nem agütsütsü, aser pai aji tenladaki bener arutsü.

⁹ Aser putir jagi chiyungtsü tenla nungi tebilemtettsü asoshi kar agiteta, tenladak manung arongtsü, aji Kibuba dang teronem tajung, mi agi tenlaba lir.

¹⁰ Aser chiyungtsü tenla agütsüba nungi tanüngbaji Aron aser par jabasotem asoshi alitsü ya temeshi oset lir.

¹¹ “Chiyungtsü tenla, koba nenoki Kibuba dang tenladir, aji piyazü agi meyanglutsüla; kechiaser mi agi Kibuba dang tenlaba nung nenoki piyazü mesüra ninang mojitzü marongtsüla.

¹² Item nai mezüng süngjang tenla atema Kibuba dang tenlatsü akok: saka itemji teronem tajung asoshi tenladak madak mayutsüla.

¹³ Aser chiyungtsü tenlaba shia nung nai metsü enoktsüla; ne Tsüngrem tezüngzükba metsüji ne chiyungtsü tenla nung medeni malitsüla, ne tenla ajak nung nai metsü agütsütsüla.

¹⁴ “Aser nai mezüng chiyungtsü tenla ka Kibuba tang tenlara, tsük mi nung rur, asentsük kongnüng agi nai tenlatsüla.

¹⁵ Aser iba nung nai totzü enoker, iba manung liangmesen, enoktsüla ibai chiyungtsü tenla lir.

¹⁶ Tebilemtettsü tenla amato, tsük temenüngsa aser totzü, aser liangmesen ajakji, putiri arongtsü, ya Kibuba dang mi agi tenlaba.