LEVI 15 - Ao Naga CL Bible - SQC Edition (BSI)

Temang Memerüki Akümba

¹ Kibubai Mosa aser Aron dang ashi,

² “Israel nunger dang shiang kodang tebur kar pei oset nungi langka yima adokdir, iba ayimbaji memerük lir.

³ Pa tayimba memerükba ozüng ya: pa shi nungi yimaka, mesüra yima aliba nungi anenaka, aji pa dak memerüki lir.

⁴ Yipten koba nung pa mejangdir, memerüki alitsü.

⁵ Shibaisa pa yipten nung mendir, pai pei süoshi shitoktsüla aser tzü chigutsüla aser aonung tashi pa memerüki alitsü.

⁶ Aser yima aliba nisung amendak shibai iba manung mendir, pa süoshi shitoktsüla, aser pa sasa tzü chigutsüla, aser aonung tashi memerüki alitsü.

⁷ Yima aliba nisung dakji shibaisa kongshidir pei süoshi shitoker tzü chigutsüla, aser aonung tashi memerüki alitsü.

⁸ Yima aliba nisung jagi merüka alir kar dak metsü metsüloktsüra, pai pei süoshi shitoker tzü chigutsüla, aser aonung tashi memerüki alitsü.

⁹ “Talungtsü koba nungsa yima aliba nisungji mendir aji memerük alitsü.

¹⁰ Pa amenba dakji shibaisa kongshidir aonung tashi pa memerüki alitsü, pei süoshi shitoker tzü chigutsüla aser aonung tashi memerüki alitsü.

¹¹ Yima aliba nisung jagi pei teka meshitoki shiba dak kongshidir, iba nisung pei süoshi shitoker tzü chigutsüla, aser aonung tashi memerüki alitsü.

¹² “Alipo koba daksa yima aliba nisungi kongshidir, jakreptsüla. Süng agi yangluba osettsüset koba daksa pai kongshidir, aji shitoktsüla.

¹³ “Yima aliba nungi kodang pa anebdir, pai anogo tenet atatsüla, aser tzü temerük nung pei süoshi shitoka tzü chigutsüla aser pa merüka alitsü.

¹⁴ Tinübuba nung pai posü ana mesüra guduru ana sentep süki kiküm nung Kibuba dangi bener arua putir nem agütsütsü.

¹⁵ Putiri aji ka temenen tenla asoshi, aser ka tarongba tenla asoshi agütsütsü. Yamaji putiri pa merüktetba maparenji inyaktsü.

¹⁶ “Kodang tebur kar dak nungi tetzü yimtokdir, pa tzü chigutsüla, aser aonung tashi memerüki alitsü.

¹⁷ Süoshi süshia shiküp süshia kechi nungsa tetzüji lidir, tzü agi shitoktsüla, aser aji aonung tashi memerüki alitsü.

¹⁸ Kodang tebur aser tetsür medemdir, tenaprongla tzü chigutsüla, aser aonung tashi memerüki alitsü.

¹⁹ “Kodang tetsür kar ita shilem odir, la anogo tenet memerüki alitsü. Kari la dak kongshira aonung tashi memerüki alitsü.

²⁰ La ita shilem aoba mapang nung amenba mesüra ondakba itemji memerüki alitsü

²¹ La yipten nung shibaisa kongshidir pei süoshi shitoker tzü chigutsü, aser aonung tashi memerüki alitsü.

²² Lai amenba dak shibaisa kongshidir, pei süoshi shitoker tzü chigutsü, aser aonung tashi memerüki alitsü.

²³ Yipten süaka mesüra la kechi nung amener, shibaisa idakji kongshidir aonung tashi memerüki alitsü.

²⁴ La ita shilem aoba mapang tebur shibai la den medemdir, anogo tenetnü memerüki alitsü, aser yipten koba nung pa ondaker memerüki alitsü.

²⁵ “Tetsür kar ita shilem aoba dak alaka ano azü yimra aji manen tashi la memerüki alitsü, oda ita shilem aodang la memerüki aliba ama la alitsü.

²⁶ Yipten koba nung la ontaker aser iba langbang kechi nungsa la mendir memerüki alitsü.

²⁷ Kari item dakji kongshira, pei süoshi shitoker tzü chigutsüla, aser aonung tashi memerüki alitsü.

²⁸ La azü ayimbaji anener külen lai anogo tenet atatsüla, aser la merükteta alitsü.

²⁹ Tinübuba nung lai posü ana masüra guduru ana sentep süki kikümi Kibuba dangi tenla bener arua putir nem agütsütsü.

³⁰ Putiri ozüji ka temenen tenla asoshi agütsütsü, aser ka tarongba tenla asoshi agütsütsü, yamaji la meshitetba maparenji putiri inyaktsü.

³¹ “Parnok rongnung aliba kü tekülemdak süki parnoki parnok memerükba agi menenja parnok masütsü asoshi, Kibubai Mosa ajanga Israel chirtem nem item tekümdangtsü agütsü.”

³² Item ozüng ya tebur shiba dak nungi tetzü ayimer,

³³ aser tetsür shiba ita shilem aor, mesüra la memerüki aliba mapang tebur shibai la den medemer, item asoshi ozüng lir.