LEVI 11 - Ao Naga CL Bible - SQC Edition (BSI)

Temerük Aser Memerükba Shiruru

¹ Kibubai Mosa dang ashi,

² “Israel nungertem dang shiang, alima nung taküm shirurutem rongnung nenoki itemi achitsü akok:

³ shiruru koba temesüla rangma aser rem shilu mejaker itemji achitsü akok.

⁴ Rem shilu mejakba aser temesüla rangmaba rongnungi itemi machitsüla: ut, rem shilu mejaker, saka temesüla merangma, anungji ya memerükba shiruru lir.

⁵ Shisen, rem shilu mejaker saka temesüla merangma, anungji nenok asoshi aji memerükba shiruru lir.

⁶ Ano azümongshi, kechiaser iba yagi rem shilu mejaker, saka temesüla merangma, nenok asoshi aji memerükba shiruru lir.

⁷ Nenoki ak shi machitsüla. Parnok temesüla rangma lir, saka rem shilu memejaker, aji nenok asoshi memerükba shiruru lir.

⁸ Item shiruruji nenoki machitsüla mesüra parnok tasü mang daka nenoki tekongshi, kechiaser itemji nenok asoshi memerük.

⁹ “Ango rongnung tashikangjok aser tip keta aliba chiang,

¹⁰ saka tashikangjok aser tip maliba ango nenoki machitsüla.

¹¹ Itemji memeshibatem lir. Itemji nenoki machitsüla, mesüra parnok tasü mang daka nenoki mekongshitsüla.

¹² Tzü nung aliba shiruru tashikongjok aser tip maliba kecha nenoki machitsüla.

¹³ “Ozü rongnung nenoki itemi machitsüla. Orija, hogon aser pokpo.

¹⁴ Tzü ozü aser ibala mesükba ozütem,

¹⁵ waro tapu ajak,

¹⁶ ostrich, tzüyim nung aliba mongzü tapu balala ajak,

¹⁷ pokpo tila aser tulu, aser komorant ozü;

¹⁸ molu padak, ango achiba pelican ozü,

¹⁹ stork ozü, heron ozü tapu balala, ungerkentenbung, aser lah.

²⁰ “Tashikang atenba shiruru tila kobai ali nung ayazür, itemji memerüki alitsü.

²¹ Saka ali nung joka aobatembo nenoki achitsü akok.

²² Nenoki süngku, kijok aser sürapong itemji achitsü akok.

²³ Saka tashikang atenba shiruru ano kobai ali nung ayazür, itemji memerüki alitsü.

²⁴ “Shibaisa item shiruru tasü mang dak kongshidir aonung tashi memerüki alitsü.

²⁵ Shibaisa item tasü mangji bena arudir, pei süoshi shitoktsüla aser aonung tashi memerüki alitsü.

²⁶ Shiruru kobasa temesüla rangsa-a lir, saka jungjunga mepakma aser rem shilu memejaker, itemji nenok asoshi temenen alitsü, aser shibaisa idakji kongshidir memerüki alitsü.

²⁷ Tetsüng pezüi jajaba shiruru rongnung temebu agi jajaba shirurutemji nenok asoshi memerük lir; shibaisa item tasümang dak kongshidir aonung tashi memerüki alitsü.

²⁸ Shibai item tasü mang abener, pei süoshi shitoktsüla aser aonung tashi memerüki alitsü. Nenok madang itemji memerüki alitsü.

²⁹ “Ali nung senzüba rongnung nenok atema memerükbaji itemi lir: süsang aser koya, tzürang tapu balala,

³⁰ kitsüngtetsü aser tokong tzürang, sangken, lisem sangken aser sangken arasentsür.

³¹ Shibai item tasü mang dak kongshidir aonung tashi memerüki alitsü.

³² Item tasü mangtemji langka nung danga atalokra, süng agi yangluba oset dak süshia, süoshi mesüra juli dak mesüra koba oset südir saka aji memerüki alitsü.

³³ Ali po dak item tasü mang tsükra, idakji aliba ajakji memerüki alitsü, aser ali poji raksatsüla.

³⁴ Chiyungtsü kar iba po nungi tzü agitettsü yanglura, aji memerük alitsü aser tajemtsü asoshi langka idakji lira aji memerük alitsü.

³⁵ Item tasü mangtemji langka dak danga tsükra aji memerüki alitsü, amtsük awangba saka po saka anüka raksatsüla; kechiaser itemji nenok asoshi memerük alitsü.

³⁶ Saka tzüpokdak mesüra tzü taa ayuba ajibo merüka alitsü.

³⁷ Item rongnung kar dang teproktsü metsüjang dak tsükra, metsüjangji temerük alitsü.

³⁸ Saka metsüjangji tzü nung metena alidang tasü mangji iba manung tsükra, metsüjangji memerük alitsü.

³⁹ “Aser nenoki achiba shiruru kar süra, shibai tasü mang dak kongshidir, aonung tashi memerük alitsü,

⁴⁰ shibaisa iba tasü mang chidir, pai pei süoshi shitoktsüla, aser aonung tashi memerük alitsü; ano shibai iba tasü mang abener pai pei süoshi shitoktsüla, aser nikongdang tashi memerük alitsü.

⁴¹ “Ali nung senzüba shiruru tila kecha nenoki machitsüla.

⁴² Jua aoba saka tetsüng pezü agi jajaba saka, tetsüng aika agi jajaba saka itemji memerük lir.

⁴³ Itemji achiba agi nesasa memerüki teküm.

⁴⁴ Kechiyong ni Kibuba nenok Tsüngrem, nenok sasa temeshi liang, aser nenok temeshi liang, kechiyong ni temeshi. Ali jakdang nungzüa ayazüba kecha shiruru agia nenok memenentsüla.

⁴⁵ Ni nenok Tsüngrem, asütsü asoshi nenok meshiteta liang kechiaser ni temeshi lir.”

⁴⁶ Shiruru aser ozü sangnu, tzü nung arakzüba taküm shiruru ajak asoshi iba ozüng,

⁴⁷ temerük aser memerük bendanga metettsü, aser shiruru rongnung tachila aser tamachila itemji nenoki bendanga metettsü asoshi item ozüngtem ya lir.