IBRI 1 - Ao Naga CL Bible - SQC Edition (BSI)

Tsüngremi Pei Chir Ajanga Jembiogo

¹ Alemli lenmang tapu aisü nung ainkartem ajanga asen tetsüteboutem den Tsüngremi jembir külen,

² item tatembang anogo nung Techir, shiba ajanga Tsüngremi anüng-ali ajongaji yanglu aser kechisarena senmanger asütsü paji shimtet, iba Techir ajanga asenok den jembiogo.

³ Techirji Tsüngrem sentsüwangshi sentsüprangba tesangwaji aser pa chichiba Tsüngrem noksa, shibai anüng-ali ajongaji pa O ain agi taküm lidakja sota ayur, temenen asoshi kodang pai meshitetbaji renem, pai kotak temaba nung tamarenba tajichilen amen;

⁴ aser kotak tenyar tenüngtem dang nungi kanga tajungtiba tenüng pai senmang amang nung, pa patakaji kotak tenyartem dang nungia kanga agi temaba lir.

Techirji Kotak Tenyartem Dang Nungi Taoba

⁵ Kechiaser Tsüngremi kotak tenyartem shinga danga kodanga ya shia mali: “Na kü Jabaso, Tanü ni na aso.” Mesüra ano yamai shia mali, “Ni pa Tebu asütsü, Pa kü chir asütsü.”

⁶ Aser ano kodang pai pei mezüng asobaji alima dangi anir aru, pai ashir, “Tsüngremer kotak tenyartem ajaki paji külemdakjang.”

⁷ Aser kotak tenyartem indang jembidang pai ashi, “Shibai pei tenyartem mopung ama, aser pei tenzükertem milak ama yanglu.”

⁸ Saka Jabaso indang jembidangbo pai ashi, “Oh Tsüngrem, ne Chuba menden teti tatem makai alir, Temeshiba Yimsüsübaji ne Chuba Yimli yimsüsübalir.

⁹ Nai temeshibaji meimer aser memeshibaji sempar, anungji Tsüngrem, oda ne Tsüngremi, ne medemertem dang nungi alia tepela totzü agi na mezüja shimtetogo.”

¹⁰ Aser pai ashi, “Kibuba, tetenzük nung nai alima kimungji yangerteta ayu, aser anüngtemji ne teka mapa lir.

¹¹ Parnokji samatsü, saka na maneni alir, aser parnokji süjen ama tejen akümtsü.

¹² Tamokbangba sü ama nai parnokji atsütena ayutsü, süoshi ama parnok melentsü, saka na kasa dang alitsü, aser ne arishi kümtem tatem makatsü.”

¹³ Tsüngremi pei kotak tenyartem shinga danga yamai shia mali, “Ni ne tsükchirtem netsüng kübok mayu tashi, Na kü tajichilen menang.”

¹⁴ Ajangla kotak tenyartemji ajak tekümtet senmang amangtsüpurtem tenzüktsü yokbatem, parnokji tenzükba tanelatem dang masü no?