HOSEA 1 - Ao Naga CL Bible - SQC Edition (BSI)

¹ Yihuda chubatem Uzzia, Yotham, Ahaz, aser Hezekia aser Israel Yoas jabaso Yeroboam tendak, Beeri jabaso Hosea dangi aruba Kibuba O:

Hosea Kibong

² Kodang Kibubai tamasa Hosea den jembi, Kibubai Hosea dang ashi, “Oang, aser na atema nüktapangtaba kinungtsü ka agiang, aser nüktapangtaba chirtem soang; kechiyong Kibuba nungi pila-a oa linüki nüktapangta tulu benshiogo.”

³ Anungji pai oa Diblaim jala Gomer agi; aser la mashisa aküm, aser jabaso ka pa nem sotsü.

⁴ Aser Kibubai pa dang ashi, “Pa tenüng Yezreel jaang, kechiyong kenpiga dang lir, Yihu kibong madak Yezreel zü asoshi ni mang ayangtsü, aser Israel kidong yimli ni anendaktsütsü.

⁵ Aser iba anogo nung ya ataloktsü, oda Yezreel lenten nung ni Israel lijak raksatsütsü.”

⁶ La tanaben mashisa aküm aser tetsür chanu ka aso, aser Kibubai pa dang ashi, “La tenüng Lo-ruhama jaang, kechiyong ni Israel kidong madak teraka tatok magütsütsüsa joko temeim malitsü.

⁷ “Saka Yihuda kidong madak ni yimlibilem akatsü, aser Kibuba parnok Tsüngremi parnok kümzüktsü, saka lijak agi, mesüra nok agi, mesüra tongbang agi, mesüra kor aser kor temerangertemi parnok mekümzüktsü.”

⁸ Tang Lo-ruhama mama toker külen, la mashisa aküm, aser jabaso ka aso.

⁹ Aser Kibubai ashi, “Pa tenüng Lo-ami jaang; kechiyong nenok kü nübur masü, aser ni nenok Tsüngrem masütsü.”

Israel Tia Yanglushitsü

¹⁰ “Aji saka Israel chirtem yongsük, masadangtetba aser mezüngdangtetba molu lisem ama alitsü; aser ya ataloktsü, nenok kü nübur masü,” ta ashitsü melena, “Nenok taküm Tsüngrem chirtem ta ajatsü.

¹¹ Aser Yihuda o Israel chirtem külemi senteptsü, aser parnoki tanishir ka shimtsü, aser linük nungi atutsü, kechiyong Yezreel anogo tulu alitsü.”