ESTHER 1 - Ao Naga CL Bible - SQC Edition (BSI)

Ahasuerus Chubar Benjong

¹ Tang Ahasuerus tendak Ahasuerus chuba shibai India nungi Ethopia tashi province noklang ka ser metsür tenet nung yimsü süa liasü.

² Item anogo nung, kodang Ahasuerus chuba, Susa yimtiba nung aliba par yimli chuba menden nung amen,

³ pa chubaba küm asembuba nung, pai par tongtipur aser par tenzüker ajak asoshi benjong ka yanglu; Persia aser Media temeranger telok tanishirtem, aser province nung tamarener aser tongtipurtem pa madang liasü.

⁴ Idangji pai chuba yimli sentsüwangshi rongsen aser pa tamaren akhüm tulu tetushi anogo aika, oda anogo noklang ka ser tir sayua ali.

⁵ Aser kodang item anogo abensa, chubai Susa yimtibai arua alir tulu tila, nisung ajak asoshi, chubar ki tsüki kima nung anogo tenet benjong yanglu.

⁶ Teyindangba sü temesüng, tamak, aser mangia meremba sangzüa liasü, kümpa tanük sü aser nakrema meremba lisü agi taribi küri aser marbel tongshi nung sentaka liasü. Temangadaktsü mendentemji hon aser taribi, marbel lung temerem, aser temesüng, tenenya aser tanak agi alaba manung liasü.

⁷ Yiji parnoki hon marok nung anganüa agütsü, marok anata memesüktep balala liasü, aser chubar yi jenti akaba nungi chubai mulungsoa agütsü.

⁸ Aser tajembaji ozüng amato, khangtepa masü, kechiyong yamaji chubai par chuba ki ketdangpur ajak dang, oda nisung shiai mulungba ama parnoki inyaktsü mela.

⁹ Ano chubatsür Vasti-i, Ahasuerus chuba meyong kidang tetsür asoshi benjong ka yanglu.

Chubatsür Vasti-i Maksüdaktsüba

¹⁰ Anogo tenetbuba nung, chuba mulungjang yi agi sasapela-a alidang pai teyangluba nisung tenet, Ahasuerus chuba tsüngdang tenzükba, Mehuman, Biztha, Harbona, Bigtha aser Abagtha, Zethar aser Karkas,

¹¹ parnok dang nübur aser tongtipur dang chubatsür tobur ajungba sayutsü asoshi chuba madangi chubatsür Vasti la chuba korang semer anir arutsü mela, kechiyong la tereprangtsü tobur tajung liasü.

¹² Saka teyangluba nisung ajanga chubai melaba nung chubatsür Vasti-i manga, aji asünung chuba ain kanga adok, aser mi adoka rasa.

¹³ Idangji chubai tashi temeteter nisungtem, shirnoki mapangtem meteta liasü, parnok dang ashi, kechiyong yamaji ozüng aser obendang metetba ajak dang chuba yimsü liasü;

¹⁴ aser pa den atongba, shirnoki chuba tejak angu, aser chuba yimli nung menden temaba nung amen, item Karshena, Shethar, Admatha, Tarshis, Meres, Marsena, aser Memukan, Persia aser Media tongtipur tenet.

¹⁵ Pai ashi, “Ozüng agi asenoki chubatsür Vasti dang kechi inyaktsü?” Kechiaser teyangluba nisungtem ajanga chuba Ahasuerusi melaba lai meinyak.

¹⁶ Chuba aser tongtipur madang Memukani langzü, “Chubatsür Vasti-i chuba tsüngdang dang masü, saka ano tongtipur ajak dang aser Ahasuerus chubar province ajak nung aliba nübur ajak dang tai inyakogo.

¹⁷ Kechiyong Ahasuerus chubai chubatsür Vasti dang chuba tsüngdangi anir arutsü mela, saka lai maru, ta kodang osang agütsüdir, chubatsür iba mapa indang tetsür ajak dangi parnok nükdang parnok kinungpur sensadakja arutsü.

¹⁸ Tanü anogo nung Persia aser Media chubatsürtem shirnoki chubatsür mapaji angashi, parnoki tongtipur ajak dang yamaji ashitsü, aser yamaji sensamasaba aser terasaba bulua adoktsü.

¹⁹ Chubai ya mulunga bilemra, chuba ozüng pa nungi odakjang, aser aji Persia nunger aser Media nunger ozüng rongnung züludakjang, oda aji memelenshitettsüsa, oda joko Vasti Ahasuerus chuba madangi marutsü, aser la dang nungi tajungba tangar ka nem chubai maongka menden agütsüdakjang.

²⁰ Kodang chuba ozüng koba pa yimli ajak nung pai metetdaktsüdir, kechiyong aji tulu lir, kinungtsür ajaki parnok kinungpur, tulu aser tila anaprongla dang tetushi agütsütsü.”

²¹ Aji ashiba jagi chuba aser tongtipur peladaktsü; aser chubai Memukan o amaji inyak;

²² kechiyong chubai province ajaki, pei pei zülu nung, aser pei pei oshi nung province shia dangi, oda nisung shia pei kibong nung kibur asütsü, aser pei nübur oshi amato aji sangoktsütsü pai shiti yok.