EFESA 1 - Ao Naga CL Bible - SQC Edition (BSI)

Salem O

¹ Paul, Tsüngremi mulungba ajanga Khrista Yisu tenyar ka, Efesa nung aliba temeshipurtem aser Khrista nung temulung lemtetba purtem dangi:

² asen Tebu Tsüngrem aser Kibuba Yisu Khrista nungi nenok dangi taochi aser tesünep sang.

Khrista Nung Tanela Temoatsü

³ Asen Kibuba Yisu Khrista Tebu Tsüngrem, shibai kotak talidak nung tanela temoatsü ajak agi Khrista nung asenok moatsüogo, pa tenüng sangang.

⁴ Asenok pa tsüngdang temeim nung temeshi aser tai makai alitsü asoshi, alima meyangludang pai asenok Khrista nung shimtet.

⁵ Aser pai mulungba nükjidong amato Yisu Khrista ajanga temeim nung pai asenok pa chirtem akümtsüsa tiazüktsü.

⁶ Pa temeimba Chir ajanga pai asenok nem angati agütsüba yong asenoki pa sentsüwangshi taochi Tsüngrem nem tenüngsang agütsüdi.

⁷ Aser Khrista taochi rongsen koba pai asenok madak talubosa meküplokja aliba amato,

⁸ pa dak asenok pa zü ajanga talangzükba aser asen tai temenen tatokbaji kar.

⁹ Kechiaser kotak nung aliba osettem aser alima nung aliba osettem ajakji pa dak lungjemdaktsütsü asoshi pa tabensaba mapang sentong amato,

¹⁰ Khrista nung pai pei nükjidong ayuba amato, pai mulungba tesüngmangtsü taroktem aser shisatsü ajak nung pai asenok nem metetdakja lir.

¹¹ Aser shibai pai mulungba ama ajak inyaker, pa nükjidong amato asenok mezüngyongi shimtet nung, asenok Khrista ajanga senmanger aküm.

¹² Aji asünung asenok shiri tamasa Khrista dak imla, pa nem sentsüwangshi agütsütsüla.

¹³ Aser nenokia ochi oji, oda nenoki tekümtet osangtajung angashi nung, aser nenoki Khrista dak amang nung Tanela Temeshi temaitsü nenok dak ajen.

¹⁴ Aser Tsüngrem sentsüwangshi tushitsü asoshi pa pei takabaji malangzük tashi, Tanela Temeshiji asen senmang mezüng agütsübaji lir.

Paul Sarasadem

¹⁵ Aji asünung ni ano Khrista Yisu dak nenok tamang indang aser temeshipur ajak asoshi temeim indang angashi nung,

¹⁶ ni kü sarasadem nung nenok tenüng tetshia nenok indang maneni tenüngsang agütsür.

¹⁷ Aser asen Kibuba Yisu Khrista Tsüngrem, sentsüwangshi Tebui pa indang metetba shisatsü aser jungkai adokba tanelaji nenok nem agütsütsü ta ni sarasademer.

¹⁸ Aser pai nenok ajaba nung kechi teimla lir aser temeshipur nem pa senmang sentsüwangshi aser rongsen kechi,

¹⁹ aser nenok amangbapur dang pa ain koda kanga tulu, itemji nenoki metettsü asoshi nenok temulung tenük sangwadaktsütsü ni sarasademer.

²⁰ Kodang Tsüngremi Khrista tasü nungi shia arudaktsü aser kodang yimsüsüba ajak aser bangdak ajak aser ain ajak aser yimli ajak madak,

²¹ aser tang mapang nung masü, saka tarutsü mapang nung tenüng ajak madak pa tetushiba asütsü, kotak talidak nung Tebui pei tajichilen Khrista mendaktsü; iba tashi inyakba agi Tsüngrem ain koda tulu aji jungkai adok.

²² Aser pai Khrista tetsüng kübok ajak ayu, aser arogo asoshi ajak madak pa tekolak kümdaktsü.

²³ Arogoji pa temang aser shibai ajak nung ajak süngdaktsür pa tabensabaji arogo.