DANIEL 7 - Ao Naga CL Bible - SQC Edition (BSI)

Daniel Mangdang

¹ Babilon chuba Belshazzar mezüngbuba küm nung Danieli pa yipten nung pungmang ka pungmang aser mangdang angu, idangji pai pungmang indang onük tongtibangji zülu.

² Danieli ashi, “Aonung kü mangdang nung ni anüng mopung pezüi tzüyim tulu manung aonba angu.

³ Idangji tzüyim nungi shiruru balala pezü adok.

⁴ Mezüngbuba molusongzü mesüka liasü, aser mungzü tashikang tena liasü. Aser ni repranga telidak nung tashikangtemji pettok, aser aji alima nungi ajungket, aser nisung ama tetsüng ana agi noktakdaktsü, aser iba nem nisung mulungjang agütsü.

⁵ Aser ajiang, tanabuba shiruruji, shirem ka ama. Külen tsütsü pa ajungketa liasü, aser pa tebang nung tepu tsüngda nung tesaret asem liasü; aser pa dang ashi, “Shishiang, shi jenti meyokang.”

⁶ Iba sülen ni reprang, aser ajiang, tanga shiruru merok keyi ka, terongdong nung ozü tashikang pezü liasü, ano shiruru dakji tekolak pezü liasü; aser pa nem yimsüsütsü tashi agütsü.”

⁷ Ajiser, aonung mangdang nung ni reprang, aser ajiang, pezübuba shiruru, tetsübutsü ka aser taoksatsü ka aser onsara tashi tait, aser iba dak merang tepu tulu liasü, iba jagi meyok aser anüka shisatsü aser tanüngbaji tetsüng agi ajemshi. Aser tejaklen shiruru ajak dang nungjagi ya balaka liasü; aser iba nung tezü ter keta liasü.

⁸ Ni tezütemji repranga alidang, ajiang, item rongnung tezü tanga tila ka adok, koba tsüngdang mezüng tezü asemji tera dena loktokadok; aser ajiang, iba tezü nung nisung tenükjang amai, aser o asüküma jembiba tebang ka liasü.

Tatem Makai Alisang Obendangba

⁹ Ni ajia alidang, chuba mendentem ayu, aser tambur ka amen; pa süoshi rüjep ama temesüng, aser pa tekolak ku tezüng temeja ama temesüng liasü; pa chuba menden milak ama aser iba talungtsü tetsüng milak adokba mi ama liasü.

¹⁰ Aser mi ayong ka adok aser pa madang nungi ayim, meyirijangsa meyirijangi pa tenzük, aser meyirijang terben meyirijang ter agi pa madang noktak, o bendangtsü renem, aser kakettem lapok.

¹¹ Tezü jagi asüküm o jembi nungji ni repranga ali. Aser ni tereprangdak nung shiruruji tepset aser samadaktsü, aser paji mi agi arongtsü agütsü.

¹² Tanüngba shirurutemjibo, parnok yimsüsüba bener oadok, saka parnok mapang tatsüka asoshi taküm toktsü.

¹³ Idangji aonung mangdang nung ni reprang, aser ajiang, anüng mepet nung nisung chir ka mesüka aru, aser pai akhipur dangi aru, aser pa madang pa anir arua toktsü.

¹⁴ Aser nüburtem, kintem, aser oshi ajaki pa tenzüktsü pa nem yimsüsütsü, aser sentsüwangshi, aser chuba yimli agütsü; pa yimsüsübaji teti tatem maka, kodanga süitema maotsü, aser pa yimliji samatsü makok.

Mangdang Tetezü

¹⁵ Ni Danielbo, kü dak kü tanela timtema liasü, aser kü kolak nung mangdang agi ni aoksadaktsü.

¹⁶ Anasa noktaka alir ka dangi ni anasa ao, aser iba ajak indang asüngdang. Anungji pai kü dang ashi, aser item tetezü kü nem metetdaktsü.

¹⁷ Item shiruru tulu pezüji, alima nung adoktsüba chuba pezü lir.

¹⁸ Saka Tematibar temeshi purtemi yimliji agizüktsü, aser teti asoshi yimliji agitsü, oda teti tatem makai.

¹⁹ Idangji shiruru pezübuba, koba parnok ajak dang nungi balaka liasü, onsara tetsübutsü, shiba tepu merang aser temezüng yongmenyin liasü, kobai meyoka, anüka raksatsü, aser pa tanüngbatem pa tetsüng agi ajemshi, iba indang atangji metetnüa ni asüngdang;

²⁰ aser pa tekolak nung tezü ter aliba indang, aser tezü tanga ka adokba koba madang asemji tsükdok, tenük atenba tezü, aser asüküma jembiba tebang, koba tereprangtsü tangar dang nungi tuluba liasü, iba indang asüngdang.

²¹ Aser ni repranga alidang iba tezü agi temeshi pur den rara aser parnokji akok;

²² saka akhipur arua, Tematibar temeshi purtem asoshi o bendang aser temeshipurtemi yimli agitsü mapang atong.

²³ Pai yamai ashi, shiruru pezübubaji alima nung chuba yimli pezübuba alitsü; ibai yimli ajak dang nungi balaka alitsü, aser iba jagi alima rangben meyoktsü aser aji ajemzüka yoktsü, aser aji anüka raksatsütsü.

²⁴ Tezü ter indangji yamai, iba yimli nungi chuba ter adoktsü; aser parnok sülen tanga ka adoktsü, aser mezüng pur dang nungi pa balaka asütsü, aser pai chuba asem ludaktsütsü.

²⁵ Aser Tematiba anema pai o jembitsü, aser Tematiba temeshi purtem pai kangshitsü, aser pai mapang aser ozüng melentsü tasa asatsü, aser parnokji pa nem mapang ka, mapang ana, aser mapang tesadang asoshi agütsütsü.

²⁶ Saka obendangba alitsü, aser pa yimsüsüba bener oadoktsü, samatsütsü aser tatem tashi raksatsütsü.

²⁷ Aser chuba yimli, aser yimsüsüba, aser anüng kübok alima rangben yimlitem tamarenji, Tematibar temeshi pur nem agütsütsü; parnok yimliji teti tatem maka yimli, aser yimsüsüba ajaki pa dang tenzüktsü aser tashi angatsü.

²⁸ Ibai tatembang. Ni, Danielbo, kanga shisa bulu, aser kü sentsü bakla-a melenshi; saka ni kechisarenaji kü mulung nung ayu.