DANIEL 11 - Ao Naga CL Bible - SQC Edition (BSI)

¹ Aser nibo, Media nunger Darius mezüngbuba küm nung, pa nungittsü aser tashi itdaktsütsü ni noktak.

Ijip Aser Siria Chuba Yimli

² Tang ni ne dang ochibaji sayutsü. “Ajiang, Persia nung ano chuba asem adoktsü, aser pezübubaji parnok ajak dang nungi takaba asütsü; aser kodang pa rongsen ajanga tashi ita kümdir, pai Grik chuba yimli anema ajak ajungmesotsü.

³ Aser chuba tulu ka adoktsü, aser yimsüsüba tulu nung pei sünütsü asütsü.

⁴ Aser kodang pa adokdir, pa yimli raksatsü, aser anüng mopung pezüsülen lemsadoktsü; saka aji pei chirnur keti maotsü, mesüra pai yimsüsüa aliba tashiji ano malitsü; kechiyong pa yimliji rakzükadoktsü aser item nemji masü, tangar nem agüjadoktsü.

⁵ “Idangji anüolentip chuba tashi ita alitsü, saka tir rongnung ka pa dang nungi tashi taitba alitsü, aser pa dang nungi pa yimsüsüba tuluba asütsü.

⁶ Küm ishika lir külen parnok ka küma lungjemtsü; aser anüolentip chubar jala, anüdoklentip chuba dangi yimjung yanglui arutsü, saka la tepen tashi kecha makai alitsü, mesüra pa aser par nungi jakzükba tashi talangka malitsü; saka la medemertem aser lar jabaso aser la kinungpu bendanga agütsütsü.

⁷ “Saka la tera nungi lapi ka pa menden nungi adoktsü, pa temeranger telokti anema arutsü, aser anüdoklentip mitsai aitsü, aser parnok den raratsü aser akoktsü,

⁸ Ano parnok tsüngremtem, parnok temuluba süngyanglutem, aser parnok taribi aser hon marok-ausutem, Ijip limai parnok pai bener aotsü aser küm ishikabo pai anüdoklentip chuba den merarai alitsü.

⁹ Ajiser pa anüolentip yimli-i arutsü aser pai pei limai shilangtsü.

¹⁰ “Saka par jabasotemi raratsü, aser tzümetsüng ama ajanga süitsü, aser pai meyipa oda mitsa tonga raratsü.

¹¹ Aser anüolentip chubai, tetsübutsü ka ain adoka, apusoa aotsü aser anüdoklentip chuba den raratsü; aser pai temeranger telok tulu renemtsü, saka teloktiji pa ket nung agüjadoktsü.

¹² Aser kodang telokji kokdir pa mulung ulua akümtsü, aser pai meyirijangsa meyirijang laodaktsütsü, saka pai takok mangutsü.

¹³ Aser anüdoklentip chubai tanabena mezüng dang nungi temeranger telok tuluba anitentsü, aser küm ishika lir, osettsüset jenti den temeranger telok tulu pa anema apusotsü.

¹⁴ “Item anogo nungji anüolentip chuba anema aika apusotsü, aser mangdangji ataloktsü asoshi nenok pei nübur rongnung tesashi nisungtem adoktsü, saka parnok laotsü.

¹⁵ Idangji anüdoklentip chuba arutsü, aser ali ajungketa yanglutsü, aser jungjunga noktanga aliba yimti ka agitsü. Aser anüolentip temeranger teloki pa anema menokdaktettsü; parnok teshimtet temeranger teloki noktaktsü tashi malitsü.

¹⁶ Saka yimmaker jagi pa anema shinga meli-i, pa sünütsüsa inyaktsü; aser sentsüwangshi lima nung noktaktsü, aser ajakji pa ket nung alitsü.

¹⁷ Idangji pa yimli tashi ajak agi anüolentip chuba den yimjung yanglutsü, pa tejak ashitsü. Aser pa nem tetsürtem jala, pa raksadaktsütsü agütsütsü; saka aji tamakok angutsü, mesüra pa asoshi tajangzük masütsü.

¹⁸ Iba sülen pai tzüküm lima leni pai tejak meyiptsü, aser aika agitsü, saka tir kati pai ngasangatembaji anendaktsütsü, hau, pa ngasangatemji pa nem sa meyiptsütsü.

¹⁹ Idangji pei lima mitsa len pa tejak ashitsü, saka pa metsüdaker alangtsü, aser joko mangutsü.

Siria Chuba Temenen

²⁰ “Pa menden nung ka adoktsü, pai alimelen sarur ka yimli sentsüwangshi asoshi yoktsü; saka anogo ishika tsüngda nung pa anüka raksatsü, ain adokba mesüra tongbang nung masü.

²¹ Aser pa menden nung tsüngken metsübuba nisung ka adoktsü, shiba nem yimli tetushi parnoki magütsü, saka mekümdangi alidang pa arutsü, aser o tanang agi yimli angutsü.

²² Pa tsüngdang temeranger telok oker aotsü, aser raksatsü, aser tezüngzükba chuba chir dena raksatsütsü.

²³ Aser pa den yimjung yangluli nungi pai külakkübonga inyaktsü. Kechiyong pai nisung ishika ajanga, tashi ita akümtsü.

²⁴ Mekümdangi alidang province takatiba madaki pa arutsü, aser pa tsüraburtemi mesüra tebu nungertemi meinyakba pai inyaktsü; parnok rongnung pai temakzükba oset aser osettsüset prokshitsü, aser mitsatem anema tamajung tasa asatsü saka mapang tatsüka asoshi dang alitsü.

²⁵ Aser anüolentip chuba anema temeranger telok tulu agi pa tashi aser tasü aittsü, aser anüolentip chubai tongbang nung temeranger telok kanga tulu agi raratsü; saka pai majettsü, kechiyong pa anema tamajung tasa asatsü.

²⁶ Hau, shirnoki pa den chiyungtsü tajung achir parnoki pa ludaktsütsü, aser par temeranger telok oker aotsü aser jenti laoa tepsettsü.

²⁷ Aser item chuba anaprong mulung tekirak alitsü, aser langbang ka nung parnoki tiyazü jembiteptsü, saka aji kecha makümtsü; kechiyong tatembangji mapang tatong nung alitsü.

²⁸ Idangji pai pei limai rongsen tulu den shilangtsü, saka pa mulungjang temeshi tezüngzüktepba anema alitsü, aser pai pei sünütsü asütsü aser pei limai shilangtsü.

²⁹ “Mapang tatong nung pa meyipa arutsü, aser anüolentipi arutsü, saka tanbo mezüng amato masütsü.

³⁰ Kechiyong Kittim rongtem pa anema arutsü, anungji pa tsübua atsüngzüktsü, aser temeshi tezüngzüktepba anema ain adoktsü, aser pa sünütsü asütsü, pai oda meyipa oadoktsü aser temeshi tezüngzüktepba sentokadoker den ka akümtsü.

³¹ Aser pa nungi temeranger adoka parnoki temeshidak, aser mitsa-a menentsütsü, aser maneni tarongba tenla bener oadoktsü. Aser teraksatsüba tesempatsü parnoki ayutsü.

³² Aser tezüngzüktepba anema tamajung inyakertem pai o tanang agi mesüzüktsü, saka shirnoki Tsüngrem metet parnoki akanga noktaktsü aser junga inyaktsü.

³³ Nübur rongnung shirnok shisa taka lir, parnoki jenti dang sayutsü; saka nok aser milak agi tepseta, tepuokba nung aser rakzükraktema anogo aika parnok laotsü.

³⁴ Kodang parnok laodir, parnoki teyari tera angutsü; saka aikati parnok sasa o tanang jembia semloktsü.

³⁵ Aser shisa akar rongnung karbo laotsü, aser tatem mapang tashi parnok mesünga kümdaktsütsü asoshi, aser meshitettsü aser merüktettsü asoshi, parnok laotsü; kechiaser aji atemzükba mapang ano matong.

³⁶ “Aser chubai pai mulungba ama inyaktsü, aser pai pei sasa ulutsü; tsüngrem ajak madak pei sasa merentsü, aser tsüngremtem madak Tsüngrem anema tesüngmangtsü jembitsü, aser teraksaba mesünem tashi pa azükarutsü, kechiyong renema akabaji ataloktsüla.

³⁷ Pai tsürabur tsüngremtem, mesüra tetsürtemi meimba tsüngremtem kecha mesükshitsü; kecha tsüngrema pai metsübutsü, kechiyong ajak madak pai pei sasa merentsü.

³⁸ Saka item melen pai mitsa tsüngrem tushitsü, aser tsüngrem shiba dang pa tsüraburtemi memetet, pa hon, taribi, senti lung, aser sempet tajung agi tushitsü.

³⁹ Ajak dang tashi taitba mitsatemji bendanger tsüngrem teyari ajanga pai amaktsü; aser shirnoki iba tsüngrem agizükdir parnok pai tushitsü aser kaa kümdaktsütsü. Pai aika madak parnok yimsüsür kümdakja, parnok nem sempet asoshi ali lema agütsütsü.”

⁴⁰ Mapang tatembang nung anüolentip chubai pa dak atsüngtsü, aser anüdoklentip chubai pa anema Tsüngrem mopung ka ama, talungtsütem, aser kor temerangertem aser rong jenti den arutsü, aser pai linük ajanga tzümetsüng ama süitsü.

⁴¹ Pai ano sentsüwangshi limai aitsü, aser meyirijangsa meyirijang laotsü; saka itemi pa ket nung kümzüktsü. Edom, Moab, aser Ammon chir rongnung tongtibatem.

⁴² Ano pai linüktem madak pa teka songtoktsü, aser Ijip lima mejenbutsü.

⁴³ Saka Ijip lima hon, taribi aser senti osettem terizüngba ajak madak pa kibur alitsü. Aser Libia nunger aser Ethiopia nunger pa sülen jajatsü.

⁴⁴ Saka anüdoklen aser anüdoklentip osangtem agi pa aoksatsü; aser ain tulu adoka samatsütsü aser meshimeshia jenti makdoktsü asoshi pa aotsü.

⁴⁵ Aser pai pa chuba süki tzüyim aser sentsüwangshi temeshi tenem tsüngda nung yanglutsü; aji saka pa pei tatembang atongtsü, aser shingaia pa meyaritsü.