ANITET 40 - Ao Naga CL Bible - SQC Edition (BSI)

¹ Kibubai Mosa dang ashi,

² “Mezüngbuba ita mezüng anogo nung sentep süki tekülemdak nai yangluang,

³ aser Ozüng Süngdenji teyindangba sü jagi iba jakdang tongdangang.

⁴ Langbangji bener aitang aser idakji osettsüset ajak tatongi rizünga yuang. Milen atalokdakji bener aitang aser idakji osettsüset ajak tatongi rizünga yuang. Milen atalokdakji bener aita iba manung milenji tsüklokang.

⁵ Nai Hon agi yangluba liangmesen arongba sabangji Ozüng Süngden jakdang yuang, aser süki kiküm teyindangbaji yindangang.

⁶ Aser sentep süki, tekülemdak süki kishi jakdang nai tarongba tenladak yuang.

⁷ Sentep süki aser tenladak sabang tsüngda nung susa nung tzüji yuang.

⁸ Ibaji meketa kima ketdakjang aser kiküm tetongdangtsü yindanga yuang.”

⁹ “Temezütsü totzüji bener arua tekülemdak shia nung amshiba oset ajak dak aji mezüjang, aji agi tekülemdak aliba osettemji meshiteta kümdaktsütsü.

¹⁰ Iba sülen tarongba tenla sabang aser idakji aliba oset-tsüset ajak dak totzü mezüja meshitetang, aser itemji meshiteta kümdaktsütsü.

¹¹ Nai ano susa aser iba tamentakdakjia yamajisa meshitetang.”

¹² “Aron aser pa jabasotem sentep süki kiküm jagi anir arua parnok tzü jagi shitokjang.

¹³ Aron dak putir temeshi sobutsü sobujang, aser putir mapa nung pai ni tenzüktsü atema nai pa dak totzüji mezüja meshitetjang.

¹⁴ Nai par jabasotem anir arua parnok dak semoksü semokjang.

¹⁵ Aser parnoki putir mapa nung ni tenzüktsü atema ni parnok tebu dang inyakba ama, nai parnok dak totzü mezüjang; aser parnok totzü mezütsübaji parnok putu songtema parnok atema alitsü.”

¹⁶ Yamaji Mosai inyak: Kibubai pa dang melaba ama ajak pai inyak.

¹⁷ Küm tanabuba, mezüngbuba ita, mezüngbuba anogo nung tekülemdak sükiji meso.

¹⁸ Aser Mosai tesembangtsütemji amendaka yua, süngtsüktemji razüka, aser tarütangtsü yoka, tongshitem azünga tekülemdak süki yanglu.

¹⁹ Aser pai tekülemdak süki metenloka ayu, aser temalen iba manung temeyiba agi nembang, aji Kibubai Mosa dang ashiba amato liasü.

²⁰ Aser pai ozüngji bena arua Ozüng Süngden nung enoka ayu, aser Ozüng Süngden nung süngratemji rüoka ayu, aser temalen temeshi süngden manung, taochi mendenji ayu;

²¹ aser pai ozüng süngdenji tekülemdak süki-i bener aru, aser tetongdangtsü atema teyindangba ayu, aser ozüng süngdenji tongdanga ayu; aji Kibubai Mosa dang melaba amato liasü.

²² Tekülemdak süki anüdoklentip tsütsü sentep süki teyindangba sü temalen pai langbangji ayu,

²³ aser Kibubai melaba ama iba manung amtsükji tiptema ayu.

²⁴ Aser anüolentip tekülemdak süki tsütsü langbang tejaklenji, pai milendongji ayu.

²⁵ Kibubai melaba ama Kibuba madang pai milenji tsüklok.

²⁶ Pai hon agi yangluba tenladak sabangji süki teyindangba sü tejakdang ayu,

²⁷ aser Kibubai Mosa dang melaba ama teronem tanang asoshi liangmesen arong.

²⁸ Pai tekülemdak süki tetongdangtsü sü ayu,

²⁹ aser sentep süki nung tekülemdak süki kishi züng nung pai tarongba tenla aser chiyungtsü tenla agütsü; aji Kibubai Mosa dang melaba ama liasü.

³⁰ Sentep süki aser tenladak sabang tsüngda nungji pai susaji ayu, aser shitoktsü asoshi idakji tzü ayu.

³¹ Mosa, Aron aser pa jabasotemi idakji parnok teka aser tetsüng shitok.

³² Kibubai melaba ama kodangsa parnok süki jagi idir, aser tenladak sabang anasa arudir parnoki idakji shitok.

³³ Mosai tekülemdak süki aser sabang meketa kima yanglu aser kima kiküm tetongdangba ayu. Yamaji pai mapa ajak renem.

Sentep Süki Nung Mepet

³⁴ Idangji mepet agi sentep sükiji akhümbang, aser Kibuba sentsüwangshi agi tekülemdak sükiji asüng.

³⁵ Aser Mosai sentep süki jagi aitsü mokoki liasü, kechiaser iba manung mepet liasü, aser Kibuba sentsüwangshi agi tekülemdak süki sünga liasü.

³⁶ Aser kodangsa mepetji tekülemdak süki nungi ajungket, idangji Israel chirtemi parnok lenmang nung jajaba tepiyong tejakleni apusoa ao;

³⁷ saka mepetji majungketi lira, aji ajungketa matuba anogo tashi parnoki mapuso;

³⁸ kechiaser parnok lenmang nung jajaba tepiyong, Israel kidong ajaki ngua, tekülemdak süki manung anüngdang Kibuba mepet aser aonung mi liasü.