AMOS 9 - Ao Naga CL Bible - SQC Edition (BSI)

Mangdang Pungububa: Tekülemdak Laoba

¹ Ni tenladak sabang anasa Kibuba noktaka angu, aser pai ashi, “Sanenji anokshitsüsa tongshibang nung zükang. Aser parnok ajak kolak nung anüka raksadakjang; aser parnok tanüngbaji ni nok agi tepsettsü. Parnok kata jena maotsü, aser shinga mejentettsü.

² Asüyim tonga parnoki tua iaka, yangji kü tekai parnok agitsü, aser parnoki anüngi tuaka, yang nungjagi ni parnok anir alutsü.

³ Aser parnoki Karmel talak nung atsükaka ni bushitsü, aser yang nungjagi parnok bener adoktsü, aser parnok kü nükdang nungi tzüyim punglang nung atsüka liaka, yang nungjagi ni per dang melatsü, aser pai parnok dak mechitsü.

⁴ Aser parnok tsükchir jakdang tepuokdaki oaka, yang nungjagi ni nok dang melatsü, aser aji agi parnok tepsettsü; aser ni parnok madak tajung asoshi masü tamajung asoshi kü tenük yoktsü.”

⁵ Kechiyong Kibuba Temeranger Tsüngrem, pai alinük nung kongshira yimsa-a aor, aser yangji alir ajaki mang ayimtsü; aser aji Nile ama atutsü, aser Ijip nung Nile ama arema alutsü,

⁶ anüng nung taktang yanglur ali nung anüngtsüng amendaker yanglubaji pa lir; tzüyim jatener alijak nung meküploktsübaji pa, pa tenüng Kibuba lir.

Temenenpur Merenshitsü

⁷ “Oh Israel chirtem, kü madang nenok Ethiopia nunger ama masü no?” ta Kibubai ashir. Ijip lima nungi ni Israel, ano Kaftor nungi Filistia nunger aser Kir nungi Siria nunger manitet no?

⁸ Ajiang Kibuba Tsüngrem tenük temenen yimli madak lir. Aser aji ni ali ajak nungi samatsütsü, saka Yakob kidongbo meshimeshia ni mesamatsütsü,” ta Kibubai ashir.

⁹ “Kechiyong angang, ni melatsü, aser waitsü nung jang aiba ama ni Israel kidong kin ajak rongnung aitsü, aji saka tsükjang tilatibajia ali nung metsüktsü.

¹⁰ Kü nübur temenen pur ajak shirnoki, tamajungi asenok memeneptsü mesüra menoktangtsü ta ashir, parnok nok agi asütsü.”

Dawid Yimli Yanglushitsü

¹¹ Iba anogo nung Dawid tekülemdak süki laoa aliba ni mesotsü, aser iba teraksa atepteptsü; aser pa teraksa ni mesotsütsü aser akhidang aliba ama ni aji yanglutsü.

¹² Oda parnoki Edom tanüngba, aser kü tenüng agi ajaba kin ajak agitsü asoshi, ta iba inyakba Kibubai ashir.

¹³ Ajiang alu alari alurur asoshi, aser tsükmenatzü aneteri metsü proker meneptsü anogotem arudagi ta Kibubai ashir, aser tenemtemi yi tanang jenzüka yoktsü aser tenem ajak aji agi yimbangtsü.

¹⁴ Aser ni kü nübur Israel tepuoker tanaben anir arutsü, aser parnoki teraksa yimtitem yanglutsü, aser item nung alitsü; aser parnoki tsükmenatzü lu ayimtsü aser iba yi ajemtsü, ano parnoki atsüki yanglutsü, aser item süngjang achitsü.

¹⁵ Aser ni parnok pei lima nung tema yutsütsü, aser ni parnok nem agütsüba parnok lima nungi joko parnok atsüteta bener maotsü, ta Kibuba Tsüngremi ashir.