AMOS 8 - Ao Naga CL Bible - SQC Edition (BSI)

Süngjang Tamen Molok Ka

¹ Kibuba Tsüngremi kü dang yamai sayu aser ajiang, mei süngjang molok ka.

² Aser pai ashi, “Amos nai kechi angur?” Ni ashi, “Mei süngjang molok ka.” Idangji Kibubai kü dang ashi, “Kü nübur Israel asoshi tatembang aruogo, ni joko parnok anasa mesüitsü.

³ Iba anogo nung tekülemdak ki nung kentenbaji asatepba ola akümtsü,” ta Kibuba Tsüngremi ashir, tasü mang jenti alitsü, tesem aisü nung parnok ola madoki merepshitsü.

Israel Asoshi Tammang

⁴ Ya angang, Oh nenok mokokmeiner dak ajemshirtem, aser linük nung sensaker kangshirtem.

⁵ Nenoki ashir ita tasen aser amungnü kodang süia aotsü, anungji onoki tsük aser wheat ayoktsü. Onoki efa tajemba aser shekel tuluba kümdakja, tiyazü seret agi külaka amshitsü.

⁶ Sensakerji taribi yong aser tsüngsem jura ka yong mokokmeiner alitsü aser wheat tap ayoktsü.

⁷ Yakob maong agi Kibubai azüngashi, “Atangji ni parnok mapa ka danga kodanga mamatsü.”

⁸ Iba asoshi ali-i matententsü, aser yangji aliba nisung shiai mang mayimtsü no? Hau, ya ajak jagi Nile ama atutsü; aser aji Ijip nung Nile ama tzü wanga atutsü aser tanaben aremtsü.

Temerenshi, Tammang Aser Mangyimba

⁹ Aser iba anogo nung, anjong tenari dang anüji ludaktsütsü aser anüngdang ni alima manga kümdaktsütsü ta Kibuba Tsüngremi ashir.

¹⁰ Aser nenok benjongbentsü agi mangyimba kümdaktsütsü, aser nenok ken ajak mangyim ken kümdaktsütsü; aser nenok teperem nung ni anem sü kangdaktsütsü, nisung shia lemtsü kümdaktsütsü, aser jabaso ka dang aliba asoshi mang ayimba ama, aser iba tatembangji taku anogo ama ni kümdaktsütsü.

Tsüngrem O Wara

¹¹ Ajiang, linük nung aya wara ka, chi makaba mesüra tzü agi tzüraba wara ka masü, saka Tsüngrem O mangashiba wara ka ni yoktsü anogotem arudar, ta Kibuba Tsüngremi ashir.

¹² Aser parnok tzüyim nungi tzüyim tashi, aser anüdoklentip nungi oda anüdoklen tashi nemzütsü; Tsüngrem O bushitsü parnok oli-aruli ta asümteptsü, saka aji mangutsü.

¹³ Iba anogo nung tobur tajung aiürtem aser asangurtem tetsüraba agi lulatsü.

¹⁴ Shirnoki Samaria temenen agi azüngashir, aser ashir, “Oh Dan, ne tsüngrem taküm ali nungji, aser Beersheba yimsü mesamai ali nungji oda parnok laotsü, aser tanaben kodanga meshishitsü.”