2 PETER 1 - Ao Naga CL Bible - SQC Edition (BSI)

Okila

¹ Simon Peter, Yisu Khrista lar aser tenyar ka nungi, Kümtetdakba Yisu Khrista aser asen Tsüngrem temeshiba nung onok tamang den kasasa tamang akabapur dangi:

² Tsüngrem aser Yisu, asen Kibuba metetba shisatsü nung nenok dangi taochi aser tesünep talubosa sang.

Tsüngremi Ajaba Aser Shimtetba

³ Kechiyong shibai pei sentsüwangshi aser tabensaba dangi asenok aja, pa metetba shisatsü ajanga Tsüngrem ain agi taküm aser temeshiba aser kechisarena asenok nem agütsüogo.

⁴ Aser azüabung nungi adokba teraksatem koba alima nung lir, nenok Tsüngrem jakla lemsatepertem kümtettsüsa, pai asenok nem senti aser kanga tulu tenangzükbatem agütsü.

⁵ Hau, aji asoshia nenoki akokba tashi kanga meranga nenok tamang nungji tajungba, aser tajungba nung temetetba,

⁶ aser temetetba nung pei sasa azüokba, pei sasa azüokba nung talangka aremzükba, talangka aremzükba nung temeshiba,

⁷ temeshiba nung adianu temeimtep, aser adianu temeimtep nung temeim bendenlokang.

⁸ Kechiyong item ajak nenok den lir, aser moshidaktsüra, asen Kibuba Yisu Khrista metetba shisatsü nung nenok azümesen mesüra tejang matangba mekümdaktsüi sota yutsür.

⁹ Kechiyong shibasa item nung anünga ali, paji nükpok aser anasa aliba dang angur aser pei tejenba temenentem nungi meshitetbaji pai amadok.

¹⁰ Anungji adianutem, nenok pei ajaba aser shimtetba shitak metettsü kanga jangra-ang. Kechiyong nenoki ibaji inyakra, nenok kodanga memetsüdaktsü.

¹¹ Aji oda asen Kibuba aser Kümtetdakba Yisu Khristai teti tatem makaba yimli-i aitsüba nenok nem talubosa agütsütsü.

¹² Aji asünung nenoki item ajak metetaka, aser nenok akaba ochiba nung nenokji yangerteta liaka, itemji nenok nem bilemtetdaktsütsü ni teti jangra-a lir.

¹³ Kechiaser asen Kibuba Yisu Khristai koda kü nem metetdaktsü, yamaji kü ali temang ya agienadoktsü.

¹⁴ Aji meteta iba süki nung ni ali tashi nenok nem bilemtetdakja ajungmesotsü tim ta ni bilemer.

¹⁵ Saka ni pila-a or külen, mapang mashi-i ka nung nenoki item bilemtettsü asoshi ni tajungtiba inyaktsü meranger.

Khrista Sentsüwangshi Aser Shinba O

¹⁶ Kechiyong onoki asen Kibuba Yisu khrista ain aser pa tanaben aruba o nenok nem metetdaktsü; onoki tar-nunger otsütem sülen manidak. Saka pa tamarenba tenük agi anguba kulitem onok liasü.

¹⁷ Kechiaser kodang pai tebu Tsüngrem nungi sentsüwangshi aser tetushi agizük, aser tamarenba sentsüwangshi ola kati kuli agüja liasü, “Ibai kü meimba Jabaso shiba dak kü mulung achir.”

¹⁸ Aser kotak nungi aluba iba ola onoki angashi: kechiyong onok pa den temeshi tenem nungji liasü.

¹⁹ Aser shinba o shitak ta onoki tali jangja-a metet, anepdang sangwa maküm tashi aser nenok temulung nung sentsüprang petinu madok tashi, tammangdak tesangwa agütsüba ama iba o nung nenoki temulung agütsütsü junger.

²⁰ Kechiaser Laishiba shin o kecha pei juri o agi ratettsüba masü, aji tamasa metetang.

²¹ Kechiyong shin o kechasüdanga nisungi mulungba agi maru, saka Tanela Temeshi-i ajungshia nisungtemi Tsüngrem nungi jembi.