1 TIMOTI 1 - Ao Naga CL Bible - SQC Edition (BSI)

Salem O

¹ Asen Kümtetdakba Tsüngrem aser asen teimla Khrista Yisu ozüng agi, Paul Khrista Yisu tenyar ka,

² tamang nung kü chichiba techir Timoti dangi: Tebu Tsüngrem aser Khrista Yisu asen Kibuba nungi taochi, yimlibilem aser tesünep sang.

Tiyazü Tesayuba Anema Tekümdangtsü

³ Ni Makedoniai aodang ne dang ashiba ama ni na Efesa nung ata-a lidaktsünür; idakji nisung kari tesayuba balaka sayubaji anendakjang ta ni ne dang shinür.

⁴ Otsü-olem aser tatem makaba kidongren otsü kobai tamang nung Tsüngremer tesayuba melena rarabangsen-ang tali adokdaktsür; item nungji parnoki temulung magütsütsü mela-ang.

⁵ Saka iba ozüng nükjidongji temulungjang temerük, mulungsentsü tajung aser anemsü maliba tamang nungi adokba temeimji lir.

⁶ Karbo item nungi pila-a or, amajok o jembiba leni meyipa ogo.

⁷ Parnoki kechi jembir itemji mangateti yur, parnoki ozüng tesayurtem kümnür.

⁸ Saka ozüngji timi dang benshira, aji tajung lir ta onoki metet.

⁹ Saka ya bilemtettsüla, oda temeshipur asoshi ozüng meyanglu, saka ozüng mebenshirtem, mazüokbatem, Tsüngrem metsüburtem, temenenpur aser memeshiba aser yimsü atalartem, tebu tepsetertem, tetsü tepsetertem, nisung tepsetertem,

¹⁰ nüktapangtartem, teburi tebur den maksü benshirtem, nisung ayokertem tiyazü züngya züngkortem asoshi

¹¹ aser kü ket nung yutsüba, temoatsüba Tsüngrem sentsüwangshi osangtajung amato atangji sayuba anema tanga langka lira, ibala asoshi ozüng yanglu.

Tsüngrem Taochi Asoshi Tenüngsang Agütsüba

¹² Shibai kü nem taochi agütsü, oda Khrista Yisu asen Kibuba tenüng asanger. Kechiyong pai ni temulung lemtetba ta züngshi aser pa tenzükba mapa asoshi shimtet.

¹³ Ni tamasabo Tsüngrem atalar ka, rishikangshir ka aser teraksatsür ka liaka, saka pai kü dang yimlibilem sayu, kechiaser ni aji mamangba nung memeteti inyaka liasü.

¹⁴ Khrista Yisu nung aliba tamang aser temeim aser Kibuba taochi kü madak tali moshia züindaktsü.

¹⁵ Menenpurtem kümzüktsü asoshi Khrista Yisu alimai aru; iba o tamangtsü aser ajaki agizüktsü tetemsü. Aser menenpurtem rongnung ajak dang ni tongtiba lir.

¹⁶ Aser shirnok teti tatem maka taküm asoshi pa dak amangtsü, parnok dang tatishitsü asoshi, Yisu Khrista pei talangka aremzükba, ajak kü dak tongtiba ama, jungkai adoka sayutsü, aji asoshi ni yimlibilem angu.

¹⁷ Tang teti tatem makaba Chuba, tamasüba, mungutetba aser Tsüngrem ka dang, pa dang tetushi aser sentsüwangshi teti tatem maka sang. Amen.

¹⁸ Kü chir Timoti, nai tamang aser mulungsentsü tajung yua, tongbang tajung raratsü asoshi, akhidang ne indang shin otem amato ni ne nem iba ozüng nungloka yutsür.

¹⁹ Karbo iba tamang aser mulungsentsü tajung nungi pila nung parnok tamang rong raksaogo.

²⁰ Parnok rongnung Humenia aser Alexander; parnoki Tsüngrem tatalaba mejembitsü sayutsü asoshi, parnokji ni Satan nem bendanga agütsüogo.