1 PETER 1 - Ao Naga CL Bible - SQC Edition (BSI)

Okila

¹ Peter, Yisu Khristar tenyar ka nungi Tebu Tsüngremi shimteter tiazüktsüba aser Yisu Khrista dang tashi angadaktsütsü asoshi Tanelai meshitettsüba purtem,

² Ponta, Galatia, Kapadokia, Asia aser Bithunia nung prokshia aliba aenertem dangi taochi aser tesünep sang.

Taküm Teimla

³ Asen Kibuba Yisu Khrista, Tebu Tsüngrem sangang! Tatem anogo nungji jungkai adoktsü renemba tekümtet asoshi, nenok shir Tsüngrem ain agi tamang ajanga nüka lir,

⁴ Nenok atema kotak nung rizüngba mesamatetba, temerük aser rema moutetba senmang angutsü asoshi

⁵ pai pei yimlibilem tulu amato, tasü nungi Yisu khrista shia arudaktsüba agi, taküm teimla asoshi asenok tanaben sottsü.

⁶ Sama-a aotsü saka, koba hon mi agi atitanger, ibala hon dang nungi sentiba koba nenok tamang lir, iba tamang atitangba Yisu Khrista jungkai adokdang, tenüngsang aser sentsüwangshi aser tetushi ngutettsü,

⁷ aji asoshi tenüngdaktsü yari, tang kenpiga tatitang tapu aika nung shisa amsa-aka, nenoki nenok tekümtet nung kanga pelar.

⁸ Nenoki pa mangu, aji saka nenoki pa meimer; nenoki tang pa munguia, amanga mejembitetba tepela agi aser sentsüwangshi agi sünga nenoki pelar.

⁹ Nenok tamang tatembang oda nenok tanela tekümtet nenoki ngua lir.

Ainkartem Tamang

¹⁰ Iba tekümtet indang ainkartem shiri nenok asoshi atemzükba taochi indang shin, parnoki iba tekümtet arishi aser meranga bushi.

¹¹ Parnok dak aliba Khrista Tanelai Khrista asoshi timtemtsü jenti indang aser iba sülen sentsüwangshi jenti adoktsü indang chichia kuli agütsü. Aser aji kodang mesüra koda ataloktsü parnoki bushi.

¹² Koba otem kotak nungi yokba Tanela Temeshi agi shiri nenok dang osangtajung sayutsüngi, ibaji parnoki tang nenok dang sangoktsüogo; aser koba otem kotak tenyartemia reprangnü, ainkartemi pei asoshi masü, saka nenok asoshi item inyak ta parnok dangi jungkai adok.

Temeshi Taküm Alitsü Ajaba

¹³ Anungji nenok temulung nangri kanger, teshisadangba liang, aser Yisu Khrista jungkai adokdang nenok dangi kechi bener arutsü, idakji nenok teimla akang akanga yuang.

¹⁴ Nenok tashi angaba chirtem ama, nenok akhidang nenok kecha memetetba mapang nung jabujariba mesüka teinyak.

¹⁵ Saka Tsüngrem shibai nenok aja pa koma temeshi lir, nenoka jaklaliro ajak nung yamaji temeshi sang.

¹⁶ Kechiyong ya zülua lir, “Nenok temeshi liang, kechiaser ni temeshi lir.”

¹⁷ Aser shibai tejak maji-i nisung shia pei mapa yari o bendanger, pa dang nenoki Tebu ta ajar süra,

¹⁸ nenok tetsü-teboutem nungi benshia aruba amajok taküm yimsü nungi tesamatsüba oset, hon mesüra taribi agi nenok alizük masü,

¹⁹ saka tarak aser pungmen maket San Chanu senti zü, oda Khrista zü agi nenok alangzük, aji meteta nenoki tetsübu nung nenok aenersa amungba mapang süidakjang.

²⁰ Alima meyangludang atangji pa alemli nungi shimteta liasü, saka mapang tatembang nung nenok atema jungkai adok.

²¹ Pa ajanga tasü nungi pa shia arudaktsüba aser pa nem sentsüwangshi agütsüba Tsüngrem dak amangertem nenok lir. Anungji nenok tamang aser teimla Tsüngrem dak liang.

²² Nenoki ochi nung tashi angaba agi anemsü medeni adianui adianu meimtsü atema nenok tanela temerük kümdaktsü nung nenoki adianu o adianu na temulung bendanga aser temulung temerük agi meimtepang.

²³ Kechiyong tesamatsü metsü nungi masü, saka mesamatetba metsü Tsüngrem O koba taküm aser teti munga aliba o lir iba jagi nenok tanaben aso.

²⁴ “Kechiyong shi ajak ai ama lir, aser pa sentsüwangshi ajak ai naro ama lir. Ai akonger aser naro tsüker,

²⁵ saka Kibuba O teti tatem makai alir.” Aser kechi osangtajung nenok dang sayutsüngi aji iba O lir.