Juda 1 - Angami Naga CL (Re-edited) Bible (BSI)

Kelukeshü

¹ Juda, Jisu Khrista kituou, mu Jakob siezeu, Thupie kielieketa Ukepenuopfü u Puou khriepfüketa mu Jisu Khrista bu rüguose tuoketako ki shü ho.

² Ngukemezhie, noune mu kekhrieu bu nie ketshu chü baliecie.

Ketijü Kepethako

³ Kekhrieko, a nieko ki vierhe chüketa kelakelie dzeu le a teitsochü di thupie nieko ki shütuoü kesie ki, a bu mhapuo thupie nieko ki shü di nie hüpie thiedzü vapuochü khapie kemesako ki shükewa kepeleu la nie hie chü tuonucü pu morokesuo lete.

⁴ Kekreilamonyü ketho leya kemo huo gou u donu lerketa la, süko Ukepenuopfü kinu kepar ngukemezhieu bie kedipie kerüyo nu shüwate, tsiu süko u Niepuu mu u mhokezha puo rübei zokecüu Jisu Khrista phra mvüya, thiedzütho nu süko pejoketuo thupie tuote.

⁵ Nieko hau si bata zorei, Niepuu vapuochü Ijipt nunu puo themiako kelashü, derei kenuotsa pele moketako pekawaketa dze a se nie tarho lashü nyüya.

⁶ Mu thiedzü teigeidieliemia kro puo u thau se balie mota, sidi u kelhouchü keviu khawaketako, puoe süko khapie kechachie kezeiu khrükhro nu phapie ketsokecü teisozha kezhau pfhe bate.

⁷ Sütuoi, Sodom mu Gomora tsiu sükhieümhou nadiko u thuo u khapie pieüpiera mu lhenu zho kemo menguko nu shü, süla kechachie miu nu siazha ngukelie thakie puo chüshüta zo.

⁸ Sirei sümhie tou di u mhogei tuoiketuo themia hako rei u thuo u chü u phou bie perhu mu u mhokezha kechü rei rünyü mo, mu pesogei ketuo zapuzayie kechümia rei krenyü tuoya.

⁹ Derei Mikael teigeidielie kezhau thuo rei thiedzü Mosa mo-u dze terhuo kerüzhüu ze kemeü di keprüli kesie ki puo kre di puo pejoshü michie di sie, “Niepuu thuo n ruotuo,” sita

¹⁰ Derei themia hako mha dze sikemo-u rei krenyü tuoya, mu u thuo u nou nu si ütuo rei uko khunuo u pfhe u va siya kemoko tuoi mha süko nunu kataya.

¹¹ Süko we ce, chülietie! Kekreilamonyü ukoe Kain chau zete, mu u kepra le di Balam kekrüketau nu vote, mu Kora mha kebvü sie di kaketa nu lete.

¹² Hakoe nie kekhrie heko nu mha va perhucüko, ukoe michie mo di nie ze hieya, sidi u thuo u vachüya. Ukoe teikhrie bu hepfüketuo tseünyho kemo kimhou kro puo, therü ki puo si vüshüya kemo seibo, kesia sie rei siakecü, puo mieko shüloukewa kro puo zo;

¹³ Uko ngae dzü rüpfhü tuoi meluo tuoya zo; uko kezei kesoutho nu kechachie khapie bawaketuo rühou ketuo themvüko zo.

¹⁴ Siro süko dze rei Adam geinu lhou kepar phou thenieu, Inok siedzedie pu di sie, “Harie, Niepuu puo kemesako nyie ker ze voryie;

¹⁵ sidi themia pete ketsotuo, mu pele kemo mhatho chükewa pete, tsiu pele kemo kephoumako puo gei die kere pukewa kheko kejo thashü kietuo,” si.

¹⁶ Themia hakoe panyapara mu u vie se u nei tseilie kemomia; uko die u zhazie pu khuboupfü, u mevi puo la mha kese dieko pu tuoya.

Tarhokeshü

¹⁷ Derei a khrieko, nieko we thiedzü u Niepu Jisu Khrista apostelko pushüwaketako rükraliecie;

¹⁸ ukoe nie ki, “Puotei thelatsa themia ketho le kemo rüyo u thuo u medo chü tuoyakezha mha krenyü zokecü kro puo siertuo” ishü zocü la.

¹⁹ Themia hako mha pfüphroshüyakezha kro puo zo, chüüphou mengu bu uko shüta ketuou sie uko Ruopfüu ba mo.

²⁰ Derei a khrieko, nie kepele kemesatho geinu memie sieliecie; Kemesa Ruopfüu nunu kecha chülie;

²¹ nie ze kechachie kerhei nu voketuo u Niepuu Jisu Khrista ngukemezhieu pfhe keba ki ze nie thuo nie khapie Ukepenuopfü kekhrieu nu ba zolie.

²² Siro kenoudo kebako ngumezhielie.

²³ Mi nunu huomia mezalie di kelashülie; siro michie siei di kekreiko ngumezhielie, chüüphou mengu nunu u perhuwaketako pfheneiko zorei rütselie.

Jakeshü

²⁴ Cüsie, nieko phi mesüketuo nunu nieko rüguose tuolie keviu mu nie bu jota mo tsiu nie nei siei di nie pie zayie chü zokecü puo keba nu shülie keviu,

²⁵ u Niepu Jisu Khrista geinu puo rübei Ukepenuopfü zokecü u kelakelieu bu nnhiennhie nu rei, tsiedo rei mu kechachie rei zayie, kezha, kedi mu kekuou chüliecie. Amen.