Matthew 7 - Alyawarr Bible

Ingwer-rnem akngakey-angenh

¹ “Arrantherr ingwer-rnem tyatyemiley-angenh, akngakey-angenh. Arrantherr renh-rnem apmwa antwey-angenh, Akngeyel ngenh arrpemarl ilekerr.

² Nga mwerr-arrpantey ilelhenty, ngap irrtywerreyelarl. Alakenh Akngeyel ngenh akngakeyenh mwerr-rnem-they.

³ Artwa anyent annga arwerl-akert nthakenh arey-angenh. Mwerr-arrpantey irrtywerremel ilelheyel. Ra artwa ingwer annga ahern-angketyarr ileyel, ‘Annga ahern-akert irrarlkelha ntwa anaynt arey-alkenh!’

⁴ Nthakenh ingwerek alakenh angkey-angenh, ‘Atha ahern akely irrarlketyek annga ngkweng-itwel.’ Arrangkw! Ra apek arrkay arem, annga arwerl ilkwakert.

⁵ Rarl alakenh angkem, rap irrtywerremarl. Ra arwerl anngethey-tangkwel tyerrelhem, mwerr-anem arey-kety. Rap ahern akely irrarlkem annga ingwer-itwek-anem.”

Anayntileyel: Jesus-el angka ilenh, rernem iterretyek, tnakelhey-angenh. Artwa Moses-kenh-rnem rernem mwerr-arrpantey ilelhenh, ingwer-rnem apmwekety angkepiletyek-arrpantey ikwer-rnem-kenh-angkwarrant apenterl-ayntetyek.

⁶ “Nhanyem angka Akngey-kenh impen. Rant angkepiley-angker. Ahern-arenyelant-amperl nthakenh angkepiley-angenh. Apwert mwerr-angker impen, nthakenh pikepik anthey-angenh. Aker mwerr-angker arengk apmwa nthakenh anthey-angenh. Akngey-kenh angka impen arrpemarl apwert mwerr-angker impen-apeny.”

Anayntileyel: Akngey-kenh angka impen, apwert mwerr-angker-apeny, aker impen mwerr-angker-apeny. Alakenh atnwenth pikepik anthey-angenh-apeny, arengk apmwa anthey-angenh-apeny, alakenh anwantherr Angka Akngey-kenh atnyenem, ingwer-angkwarrarl iterreyel-rnem anthey-angenh.

^7-8 “Ntwa Akngey ayernenty, ranap ngenh anthemarl. Ntwa renh ayernenty, ranap ngkweng lwewarrernemarl. Ran iwerr ngkweng mpwareyel, ntwa ikwerenh-angkwarr apentetyek. Inngarlap ran! Akngey ranap ngkweng mpwaremarl, ngap aylpenhem-anem.

⁹ Alerengkwel ngenh amernek apek ayernem. Ntwa apwert ikwer anthey-angenh, arrangkw! Ntwa amernant anthem arlkwetyekan.

¹⁰ Alerengkwel ngenh aker irrpengek apek ayernem. Ntwa rtnwem ahelengkw ikwer anthey-angenharl, arrangkw! Ntwa aker irrpengant anthetyek arlkwetyekan.

¹¹ Arrantherran apmwamwam aneyel, arrantherrap iterl-areyelarl, ilek-ilek mwerr-angker anthayntetyekan ampernemek. Akngey irrwerl-arenyan arrantherr-apeny-wenyarl, ilek-ilek anthey-angker. Ra mwerr-angkerarl arrekantherr anthem, arrantherr renh ayernentyan. Rant iterl-areyel.

¹² Anwantherr ilkelheyel ingwer-rnemel anwenhantherr mwerr-angkwarr arntarnt-aretyek. Alakenh anwantherr mwerr-angkwarr renh-rnem-tangkwel arntarnt-aretyek. Akngey-kenh angka arrwekeleny aynteyel, Moses-kenh-angkwarr angkakert ingwer-rnem-angkwarr-then.”

Iwerr atherr-akert

¹³ “Iwerr akely alpeyel Ingkart-kenh-angkwarr, nga arraty-angkwarr apentetyekan. Akngerr alpeyel iwerr ilkwangkwarr, apmwel-aretharl alheyel-rnem. Akngeyel renh-rnem ywerrelhileyenh.

¹⁴ Irrpetyap alheyel Ingkart-kenh-angkwarran. Rernem iteth intem-antey aneyenh.”

Arwerl amern-akert

¹⁵ “Mwantyel arntarnt-arelhetyek mwerranty arraty apentetyek artwa apmwernem-kety. Rernem irrtywerremel angkakert mwerr-arrpantey ilelheyel-kety, yep-yep-rnem anik mwerr aneyel-apeny. Artwa apmwernem ahelirreyel arengk artnwerel ahelirrem-apeny tnhwerremel. Rernem apmwangkwarr akalty-antheyel, ngenh apmwewarlilekerr.

¹⁶ Apmwarlap ran, arwerl arleny-apenyarl. Arwerl arleny-penh nthekwern amern iney-angenh. Apmwa nthekwern akey-angenh, amern arnwekety akey-angenh arwerl arleny-penh apmwarl. Amern akatyerr akey-angenh arwerl arntek-arntek-penh apmwarl.”

Anayntileyel: Apmwangkwarr akwerrpel akalty-antheyel-rnem arwerl arleny-rnem-apeny. Angka mwerr akalty-anthey-angenh akwerrpel-rnem, amern apmwamwam-apeny.

¹⁷ Jesus-el angka ingwer-anem ikwer-rnem ilenh. “Arwerl ingweran amern mwerr-akertarl, arwerl apmwarenyan amern mentyarl.

¹⁸ Arwerl arleny-penh nthekwern amern akey-angenh. Amernek ywarn nthweyel.

¹⁹ Arwerl arlenyan apmwarl, rwewarl iwem arwerl renh.

²⁰ Angkakert irrtywerrey-angker-rnem rernem arwerl arleny-apeny.

²¹ Apmwel-areth aneyel-rneman rernem arlkeyenh, ‘Ay, Ingkartay.’ Rernemap Akngey-kenh-warl aylpey-angenh. Arraty-angkwarr apenteyel-rnemant, Akngey ikwerenh-rnem aneyenh.

²² Arlta ingkernel ingwer-rnem arlkeyenh, ‘Ay, Ingkartay. Anwantherr angka ngkwenh ilerl-apenh arrpemarl, anwantherr arrenty-rnem irrentek, itna ngkwenh itnewemel, ilek-ilek mpwarek, rlterrk ngkwenh-akertel.’

²³ Athan renh-rnem ileyenh, ‘Alpenherr-arey atyengety, athan arrenhantherr iterl-arey-angenharl.’ ”

Warl atherr-akert

²⁴ “Rernem apek angka atyenh awek-penh, rernem arraty-angkwarr apenteyel rlterrk-anem, artwa warl apwert irrwerl rlterrk-itwek artek-apeny.

²⁵ Kwaty-anem rntwey-alhek, atnyerr ilkwanem alhek. Warl atakelhey-angenh arrangkw, ra anyentel-antey apwert rlterrk ikwerel cement-apeny-itwek artelhenh.

²⁶ Artwa ingwerel angka atyenh arwa iylpelant awek atyeng awelhey-angenh. Ra anamerl ywerreyenh warl apmwamwam anamerl ywerrek-apeny.

²⁷ Kwaty ilkwa rntwey-alhek. Atnyerr alhek, awerel rlterrk pwey-alhek, warl apmwamwam renh-anem atakenhek, kel. Warl rlterrk intem-antey aneyenh, warl apmwamwam arrangkwarl, angath-antey atakelheyel. Artwa akalty intem-antey aneyel, Akngey-kenh. Artwa arwengk angath-antey ywerreyenh, warl apmwamwaman angath-antey ywerremel atakelhek-apeny.”

^28-29 Jesus rarl angka ilenh-penh, ingkerrenh-anem apatek, rarl renh-rnem rlterrk innga akalty-anthek Akngey-kenh-angkwarr, artwa Jew-kenh akalty-anthey-angker-rnemel rlterrkel akalty-anthey-angenh.