Matthew 5 - Alyawarr Bible

Akngeyel renh-rnem arntarnt-areyel

¹ Jesus-el akngerrarl arek-penh, ra apwert irrwerl-warl alhek kwertengerl ikwerenh-rnem-akert.

² Ranem renh-rnem akalty-anthek.

³ “Rernemarl ikwer-warl angkepirretyek arrkernelheyel, Akngeyel renh-rnem arntarnt-arem. Rernem Akngey-kenh-rnem ingkerrenh anem.

⁴ Rernemarl amperrngirreyel, Akngeyel renh-rnem arntarnt-arem, arternpilemel.

⁵ Rernem iterl-arelheyel rernemarl ahern-areny-rnem arwa aneyel, rernem ahern-areny ingkerrenhek atyetyart aneyenh.

⁶ Akngeyel ingwer-rnem arntarnt-arem arrpemarl, rernemarl ikwer arraty-angkwarr awelheyel, arratyirretyek ikwerenh-angkwarr. Akngeyel ikwer-rnem iwerr mpwarem, itnweng mwerr-angker anthemel.

⁷ Ingwer-rnem mwerrant-arey arntarnt-arerreyel, Akngeyel renh-rnem arntarnt-areyel ingkerrenh-anteyarl arrpemarl.

⁸ Arraty-angkwarr aneyel-rnem, Akngey ikwer-rnem inkwerelhem.

⁹ Aylperrepwenty atyetyart ilkwernem aheketyarl arrkngert angkeyel-rnem, Akngeyel renh-rnem alerey antweyel.

¹⁰ Rernem arraty-angkwarr alhetyek arrkernelheyel. Ingwer-rnemel renh-rnem irrwerneyelarl, Akngeyel renh-rnem arntarnt-arem arrpemarl.

¹¹ Arrantherr atyeng-angkwarr alhetyek arrkernelheyel-rnem, ingwer-rnemel arrenhantherr irrwerneyelarl, Akngeyel arrenhantherr arntarnt-areyel arrpemarl.

¹² Irrkngerney anaynta! Akngeyel ngenh atnyen-aynteman, apmer aknganenty-itwek. Awank-akerrarl ingwerel-rnem Akngey-kenh angkakert-rnem irrwernek-apeny, aleyarl aynteyel arrpem.”

Angka thalt-akert, angka lyenenty-akert

¹³ “Aker-warl thalt arrernem. Thalt-penh nthakenh apmwirrey-angenh, intengirrey-angenh, arleng-alenty mwerr ayntem. Thalt-weny aker anamerl intengirrem, ikweweny. Alakenh-anyem Akngey-kenh angka aynteyel. Akngey-kenh angkekety amentirrenty, rap aleth-antey apmwirreman, Akngey-kenh-angkwarr apentey-angenh. Ikwer-angkwarr akaltyirrenty, rernem arleng-alenty mwerr aneman.

¹⁴ Lyenentyel arrtyernem-apeny, iwerr aketh arem. Ahern-areny ingkerrenhel arrenhantherr aketh-antey arem arrpemarl, nthenh-angkwarr alheman. Warl-rnem apwert irrwerl-itwek artelhenharl. Ingwer-rnemel anaynt arem arleng-they. Ingwer-rnemel arrenhantherr anaynt arem arrpemarl, rernem arraty-angkwarr apenteyelan.

¹⁵ Lherrm ampenty, nthakenh ntwa tyampet-warl akwerney-angenh. Renh akethek-anem arrernetyek irrwerl-warl, ingkerrenhel anaynt aretyek.

¹⁶ Arrantherr arraty-angkwarr apententy, ingwer-rnemel arrenhantherr aketh arem arrpemarl, rernem Akngey-kenh-angkwarrant apentem arrpemarl, ikwer inkwerelhemel.”

Moses-kenh angkakert

¹⁷ “Angka Moses-kenh aynteyel, angka arrwekeleny angkakert-rnemel pip-warl ingkwernek aynteyel arrpemarl. Atyeng arrantherr iterreyel, ayeng angka ingwer-akert apetyentyek-athen, angka Moses-kenh arrwekelenyek iylpelirrentyek-athen. Angka nthakenh iparelhey-angenh. Ayengan apetyek atha Akngey-kenh angka irrkaty renhey-antey arrekantherr iletyek, angka Akngey-kenh arlperrtyiletyek, ywerreyek-atwety.

¹⁸ Arraty innga atha arrenhantherr ileyel. Angka Akngey-kenh ywerrey-angenh, ahern-then alker-then ywerrey-alenty.

¹⁹ Angka Moses-kenh arrwekeleny-kety amentirrenty, ingwer-rnem apmwel-aretharl akalty-anthenty, arrantherr apmwelhileyel Akngey-kenh-angkwarr. Angka Akngey-kenh arraty apententy, ingwer-rnem arraty akalty-anthenty, arrantherr Akngey-angkwarr mwerrarl aneyenh.

²⁰ Pharisee-kenh-rnem, artwa ilkwa Moses-kenh-rnem rernem apmwangkwarr apenteyel. Arrantherr arraty-angkwarr apenterl-ayntetyek. Arrangkwelan, angka Pharisee-kenh Moses-kenh apententy, arrantherr Akngey-kenh apmer-warl aylpey-angenh.”

Ahel iltenty-akert

²¹ “Moses-kenh angka arrwekeleny angka alakenh ayntenh, ‘Ra ingwer ipmek atwenty, renh angkep atweyenh arrpemarl.’

²² Athan arrenhantherr ileyel, ‘Ingwerentyel apek iltenty, arlta ingkernel Akngeyel renh ayerneyenh arrpemarl. Arrantherr ingwer-rnem apmwa antwenty, rwa aknganenty arrwekel ikwer mpwelheyel arlta ingkernel.’

^23-24 Ngethen ingwerenty-then ahel mpwelanth ilterrekarl-penh, nga ikwer-warl alhetyek-tangkwel, sorry antwelhetyek, tyaty-warl aylpey-angenh, Akngey renh tyenkerr anthey-alenty. Ahenp-antey alhey-angenh. Ikwer-penh-anem ntwa Akngey renh tyenkerr anthey-alpem-anem, mwerrant-atherr anetyek. Alakenh-anyem Akngey-angkwarran mwerrant-arey anetyek.

²⁵ Arrkent arwa ilterrey-angenh. Angketangkwel arratyilerrey mwerr-angkwarr, ra ngenh court-warl akngekerr, court-arenyel ngenh tyayl-warl akwernekerr.

²⁶ Fine ilkwa ntwa payemeley-angenh, nthakenh nga tyerrelhey-angenh.”

Anew inetyek

²⁷ “Akngey-kenh angka alakenh aynteyel: ‘Ingwer-kenh anewikw nthakenh ikngwey-angenh.’

²⁸ Athan arrenhantherr arraty ileyel, angka awerr innga. Nga arelh ingwerek ahenty anenty ikngwetyek-arrpantey, ngap apmwangkwarr iterreyelan.

²⁹ Ntwa apek apmwangkwarr mpwareyel anngel. Ntwa apek annga atherr-akert apmwangkwarr mpwareyel-kety, mwerr ntwa annga anyent tyerrelhemel iwetyek, ngap Akngey-kenh apmer-warl aylpeman, annga anyent-akert.

³⁰ Ntwa apek apmwangkwarr mpwareyel itepel. Ntwa apek itep atherr-akert apmwangkwarr mpwareyel-kety, mwerr ntwa itep anyent akelhem iwemer, mwerr-angkwarr Akngey-kenh apmer-warl aylpetyek.”

Anayntileyel: Anwantherr arwa akelhey-angenh, impen-antey. Alakenh-anyem angka anayntileyel, Ingkart ra impen inngarl, anngethen iltyethen-angkwarran. Kel Jesus-el arwa renh-rnem ilek, rernem iterretyek, rernem apmwelhilekerr. Ratherr iwerretyek

³¹ “Angka arrwekeleny alakenh aynteyel: ‘Mwerr arelh ikwerenh iwem. Artwa pip-warl itna inkwernelhemel, arelh ikwerenh pip renh anthemel, arelh ra pip renh aremel, artwa renh iwey-alentyan.’

³² Athan arrenhantherr arraty ileyel, angka atyenh awerr. Arelh ra artwa ingwer-angkwarr antelhenty, kel alakenh mwerr iwemarl. Arrangkwarl, arelh ngkwenh ntwa iwenty apmwel-areth, Akngey-angkwarr apmwa aynteyel.”

Ingkart itnewemel irrtywerremel angkey-angenh

³³ “Arrwekeleny-kenh aynteyel arrpemarl, ‘Ingkart itnewemel irrtywerremel ilelhey-angenh, Ingkartel arem.’ Arraty ntwa angkayntetyek.

³⁴ Angka atyenhan awerr, atharl arrenhantherr ileyel. Alkenh itnewey-angenh, irrtywerremel ilelhey-angenh.

³⁵ Ahern itnewey-angenh arrpemarl, ikwerenh arrpemarl. Jerusalem itnewey-angenh arrpemarl, apmer ilkwa atyetyart impen ikwerenh arrpemarl.

³⁶ Irrtywerremel ilelhey-angenh, arratyant nga ilelhetyek.

³⁷ Yaw apek, arrangkw apek, alakenh arraty innga nga ilelhetyek. Ingwer-angkwarr nga ilelhenty, arrenty-kenh-angkwarrarl.”

Angkep atwey-angenh

³⁸ “Angka arrwekeleny aynteyel: ‘Ingwerentyel annga atwenty, ntwa renh annga angkep atweynetyek arrpemarl. Ingwerel ngenh arntek renh atwenty, renh arntek atwem arrpemarl.’

³⁹ Ayengan arrekantherr-warl angkem, ngenh apek arreyl anyent-ampeny atwenty, renh angkep atwey-angenh, aleth-antey atwerrerl-anekerr. Nga menty anthelhetyek ra ngenh arreyl ingwer-angkwarr-anemarl atwenty.

⁴⁰ Ingwerentyel kwet ngkwenhek ayernenty, ntwa kwet renh alhewer anthem arnkwa ingwer-then anthem. Akngey-kenh-angkwarr alakenh aynteyel.

⁴¹ Ingwerentyel ngenh ilanthenty, ikwer-angkwarr alhetyek, nga ikwer-angkwarr alha anper-antey, ikwer awelhemel. Angath-antey alhey-angenh.

⁴² Ingwerentyel ngenh amernek ayernenty angayakwel, ntwa renh amern anthetyekan. Ampwal ilek-ilek renh anthetyek arrpemarl.”

Ingwer-rnem arntarnt-aretyek, ikwer-rnem amperrngirretyek

^43-44 “Ingwer-rnemel ileyel, ikwer-rnem-kenh arntarnt-arayntetyek. Angka atyenhan awerr, atharl arrenhantherr ileyel, alakenh aynteyel, ingkerrenh arntarnt-arayntetyek alethang-rnem-then arntarnt-arayntetyek. Ingwerentyel ngenh irrwernenty, ntwa Akngey ayernetyekan ikwer, renh arntarnt-aretyek.

⁴⁵ Arrantherrap Akngey-kenh-rnem ingkerrenharl aneman, arrantherrap alakenh mwerrant-arey anetyek. Akngeyel ingkeny arrernek ingkerrenhek, apmwernemek-then mwerr-rnemek-then, ilek-ilek ra anthek, kwaty anthek, amern ingkerrenh lyapelhiletyek, aker-then anteril-ayntetyek atherrkeny.

⁴⁶ Ahern-areny-kenh alakenh aynteyel, ngkwenh-rnemant arntarnt-arayntetyek apmelerreny. Apmwamwam man kapmentek iney-angker-rnem rernem arntarnt-arayntetyek arrpemarl, apmelerreny. Akngey-kenh ingwer-angkwarr aynteyel, ingkerrenh arntarnt-arayntetyek. Alakenh Akngeyel anwenhantherr angkep antheman.

⁴⁷ Ingwer-rnem Akngey apentey-angenh-rnem rernem ikwer-rnemekant inkwerelheyel. Alakenh-apeny-weny anayntetyek mwerr-angkwarr.

⁴⁸ Arrantherr mwerr innga anayntetyek, Akngey irrwerl-areny aneyel-apeny.”