Matthew 27 - Alyawarr Bible

Pilate-el Jesus renh ayernemel arrkerneyel

¹ Ingwepenh Atyetyart tyaty-areny-rnem-then, atyetyart apmer-areny-rnem-then, rernem akarrirrek angkerretyek, Jesus renh atwetyek.

² Rernem-anem renh arertnemel, Atyetyart Pilate-warl atnwenhek.

Judas ilweyel

³ Judas-el kel ahelengkw-rnem-warl Jesus renh ahayiwek. Ranem ywarn iterrek amperrngirremel. Rap angkepirrek tyaty-areny atyetyart ilkwernem-warl, Jew-rnem-kenh atyetyart-rnem-warl alhek-anem. Ra ngkwelty-rnem atyetyart tyaty-areny-rnem angkep antheynetyek-arrpantey.

⁴ Ranem angkek nyerrirremel, “Ayeng-anem Akngey-angkwarr apmwelhilek, artwa mwerr innga atha ahayiwek ahelengkw-rnem-warl. Artwa alyelk ra apmwel-areth mpwarey-angenh.” Rernem renh ilek, “Ntwap renh ahayiwek anwekantherr-warl. Anantherr arlarl.”

⁵ Judas ran ngkwelty-rnem tyaty ilkwa kwen-warl iwek-penh, ranem ament ipmek aynterrarrewelhek.

⁶ Tyaty-areny atyetyart ilkwernemel ngkwelty renh akwetyemel, angkerrenh, “Artwa atwetyekarl anthekarl. Nthakenh ngkwelty nhenh angkep akwerney-angenh tyaty-warl.”

⁷ Rernem angkerrek-anem, apmer aterterr renh ingwer-itwek payemeletyek. Rernem iterrenh, awenng angernetyek, alethang arrewaly akwernetyek. Artwa ahern-penh mpwarey-angker anyent ra apmer tharlemilek ikwer-rnem.

⁸ Alakenh-they aley rernem “Apmer Arrkngangketyarr” itneweyel-antey.

⁹ Jeremiah-kenh pip alakenh arraty innganem aynteyel, rarl arrwekel ilenh-angkwarr-antey: “Ngkwelty 30-el payemeletyek, man rernem Israel-kenh artwa anyentek payemeletyek.

¹⁰ Rernem aterterr renh-anem payemelek, atnthepenh arnwarney-angker-kenh, Akngeyel renh-rnem ilanthek-angkwarr-antey.”

Pilate-el Jesus renh ayerneyel

¹¹ Rernem Jesus renh atnwenhek Atyetyart Pilate ikwer-warl. Pilate-el Jesus renh ayernek, “Nganang Atyetyart ilkwa Jew-rnem-kenh, ngay?” “Ya, alakenh nga angkeyel.” Jesus-el renh tyernek.

¹² Tyaty-areny atyetyart ilkwel-rnem Jesus renh ayntarrp-ilek, ra irrtywerremel ilelhenty-arrpantey. Jesus akater-anem rtnenh, tyerney-angenh.

¹³ Pilate-el Jesus renh ayernek arrpemarl, “Ngenharl rernem ayntarrp-ileyel, nthakenh ngan angkem?”

¹⁴ Jesus akater-anem rtnenh, tyerney-angenh. Atyetyart ra ikwer apatek-anem, rarl akater-anem rtnenhek.

Pilate-el Jesus renh ipmelheyel, Barabbas renh tyayl-they tyarleweyel

¹⁵ Aherrety arrpanenhel, amern tyenkerr arlkwenh apmelerr-angkwarr, Pilate-el artwa anyent tyayl-they tyarlewenh.

¹⁶ Artwa Barabbas artwa apmwa innga tyayl-itwek anenh.

¹⁷ Rernem ingkerrenh akarrirrek, Pilate-el renh-rnem ayernek, “Angwenh athan tyarlewem tyayl-theyan? Barabbas apek? Jesus apek, rernem renh itneweyel Christ, Akngeyelarl arrwekel ilek, renh thwenetyek ahern nhenh-warl ingkerrenh itethiletyek.”

¹⁸ Pilate-arl akalty, atyetyart-rnem Jesus-kety arlkarirrenh.

¹⁹ Pilate-el renh tyatyemilenh-angkwarr-antey, Pilate-kenh anewikwel angka thwenek ikwer-warl, “Artwa alyelk yanh ipmay! Ayeng artwa yanhek ilkelhey-angenh, renh atwetyek, altyerr apmwa atha arek-penh.”

²⁰ Tyaty-areny atyetyart ingwer-rnem-then rernem renh-rnem ingkerrenh ilek, “Arrantherr Pilate ilenherr-arey, ra artwa Barabbas tyayl-they tyarlewetyek, Jesus-ant atwetyek.”

²¹ Pilate-el renh-rnem ayernek arrpemarl, “Artwa nthenh-apeny atha tyarleweman?” Rernem arlkek, “Barabbas renhant tyarlewa!”

²² Pilate-el renh-rnem ayernek arrpemarl, “Nthakenh atha Jesus renh ilem? Rernem renh Christ antweyel Akngeyelarl thwenek?” Rernem arlkek artewentyel, “Renh arwerl iylpeyl-atherr-warl atanthenherr-arey, renh atwetyek!”

²³ Pilate-el renh-rnem ayernek, “Ilekek atwetyek? Ran arlarl.” Rernem artewentyel innga arlkek, “Renh arwerl iylpeyl-atherr-warl atanthenherr-arey, renh atwetyek!”

²⁴ Atyetyart Pilate ra arek, ingkerrenh ahelirrenhant-anem. Kwatyel iltyatherr lhewelhek, anngetherr ikwer-rnem-itwek, “Arrantherrant ilkelheyel renh atwetyek. Ayeng arlarl!”

²⁵ Rernem renh ilek, “Kel menty anwenhantherr ayntarrp-ilem ingkerrenhel, renh ipmek atwenty-penh, ingkern-penh-rnem-then ayntarrp-ilem arrpemarl.”

²⁶ Pilate-el Barabbas renh tyarlewek, tyayl kwen-they. Pilate-el ahelengkw-rnem ilek, rernem Jesus renh whip-el atwayntetyek arwerl iylpeyl-atherr-warl atanthetyek.

Rernem Jesus renh arrkentelhilemel ileyel

²⁷ Ahelengkwel-rnem Jesus renh atnwenhek warl ilkwa rlterrk-warl, warl Atyetyart ilkwa Rome-areny-kenh-warl. Ahelengkw ingwer-rnem ikwer-rnem-warl akarrirrek.

²⁸ Rernem arnkwa lhelek, ikwer-they, kwet arlpenty rnter-rnter-warl-anem renh akwernek.

²⁹ Rernem mwekart-apeny mpwarek, arreylp-angketyarr atyetyartek-arrpantey, Jesus akapwert-warl arrernemel, arwerl iltya arraty-warl arrernemel. Rernem renh arrkentelhilemel ilek kwenirremel, “Nganap Atyetyart ilkwa Jew-rnem-kenh.”

³⁰ Rernem apelh ikwer-warl iwek, akapwert-anem renh arwerlel atwemel.

³¹ Rernem irrpelthirremel kwanthenh-penh, rernem kwet lhelek, arnkwa ikwerenh-warl-anem akwernemel. Rernem renh atnwenhek, rernem renh atanthetyek, arwerl iylpeyl-atherr-warl.

Ahelengkw-rnemel Jesus arwerl iylpeyl-atherr-warl atantheyel

³² Artwa anyent, itnan Simon apmer Cyrene-areny. Ahelengkw-rnemel arwerl iylpeyl-atherr-anem arrernek Simon ikwer-warl, ra arwerl renh aylpwer-akngeyn-ayntetyek. Simon-el arwerl iylpeyl-atherr iytarr-akngeynenh.

³³ Ahelengkw-rnemel Jesus renh apwert ilkwewarl atnwenhek, apwert itnan Golgotha, apwert ngkwern akarnng-apeny.

³⁴ Ahelengkw-rnemel arwerl mwerr-angker alperr-penh ngkwarl wayn-warl thelek, Jesus renh anthemel, ra irrwampenty awelhekerr, renh arlelpiletyek, renh atanthenty arwerl iylpeyl-atherrek. Rap arrkernek-anem. Jesus-el ngkwarl menty arek, antywey-angenh.

³⁵ Ahelengkwel-rnem arnkwa ikwerenh lhelek, ahern-warl iwemel. Rernem Jesus renh arwerl iylpeyl-atherr-warl atanthek. Ahelengkwel-rnem arrkenirrek arnkwa Jesus-kenhek, antengiletyek.

³⁶ Kel rernem renh arenh-anem, arrernelhemel.

³⁷ Ahelengkw-rnemel pip arrernek arwerl iylpeyl-atherr-warl angka ikwer-rnem-kenh-akert, “Nhanyem Atyetyart Jew-rnem-kenh.”

Anayntileyel: Ahelengkw-rnemel pip ingkwernek, ra akengenty angkenty-arrpantey. Irrtywerremel renh tyatyemilek, ra angkenty-arrpantey. Angka arrwekeleny Rome-kenh apmelerr ayntenh-angkwarr, pip alakenh arrernetyek.

³⁸ Artwa apmwatherr rernem arrernek Jesus-angkwarr ilwetyek. Artwa apmwatherr rernem rnkernek, akwerrant-atherr, Jesus ampepekilemel.

³⁹ Akngerr angkepelarreng alhenh, Jesus ikwer irrpelthirrerl-anemel,

⁴⁰ Rernem arlkek, “Weth ntwa anwernenhantherr ilek, ntwarl tyaty ilkwa Jew-rnem-kenh atakenty-penhel, ntwa tyaty ilkwa ingwer-anemarl artetyek akwel. Ngan arlertek ilkwakert akwel. Nga ament-anem itethelhila! Atwarra arwerl iylpeyl-atherr-they!”

⁴¹ Atyetyart ilkwa tyaty-areny-rnem-then atyetyart ingwer-rnem-then Moses-kenh-rnem-then, rernem ikwer irrpelthirrenh. Rernem arrkent ikwer angkerrenh,

⁴² “Ran artwa ingkerrenh arntety-penh itethiley-angker, ranem ament-anem itethelhiley! Ra ament itethelhilenty, anwantherr ingkerrenhelarlap iterl-areman, rap Atyetyart ilkwa Jew-rnem-kenharl aneman.

⁴³ Ra Akngey tnakeyel. Ra ilelhek, ra Akngey-kenh alerikw akwel. Akngeyelant renh itethilemer.”

⁴⁴ Artwa apmwa weth atherrel Jesus renh arrkentelhilenh arrpemarl.

Jesus ilweyel

⁴⁵ Ingkeny arlta ampepel ingwerrerl-alhek, atwerrpek-atwety.

⁴⁶ Jesus-el Akngey renh ayernek, “Akngey atyenh, Akngey atyenh, ilek-kety ntwa ayenh menty arek?”

⁴⁷ Ingwer-rnem Jesus-arrangarr rtnenherrenh. Rernem Jesus renh awenh, angkemel, “Jesus ra arlkeyel Elijah ikwer. Elijah Akngey-kenh angkakert arrwekeleny ran.”

⁴⁸ Artwa anyentel ngkwarl wayn-warl antywer renh apelyilek, Jesus renh arwerl arlpenty-they antywetyek.

⁴⁹ Ingwer-rnem angkerrenh, “Anwantherr mpwelhey Elijah ikwer-warl apetyetyek, renh arwerl iylpeyl-atherr-they tyarlewenty anwantherr aretyek.”

⁵⁰ Kel Jesus arlkek, ilwemel.

⁵¹ Rag arlpenty Jew-kenh tyaty ilkwitwek ilterrelhek, irrwerl-they, kwenek-atwety. Ahern akngenherl-akngenhelhilek. Apwert-rnem akelhemel ngkweltyirremel.

⁵² Awenng-rnem altywerirrek, arrewaly-rnem itethirrek, Ingkart-angkwarr apenteyel-rnemarl.

⁵³ Rernem awenng-they akemirrek. Ra itethirrek-penh, rernem Jerusalem-warl alhek. Rernem aremirrek, akngerr ingwer-rnemek,

⁵⁴ Atyetyart ahelengkw-rnem-kenh ahelengkw-rnem-then rernem arek. Rernem ahern akngelhenh-akngelhenhek awelhek. Rernem aterirrek angkerrenh, “Jesus ranap Akngey-kenh Alerikw inngarl ilenhey.”

⁵⁵ Arelh akngerr rernem akarrirrek apmer Galilee-they, renh arntarnt-aretyek, Jesus arwerl iylpeyl-atherrek ilwey-alenty. Rernem Galilee-they apetyek. Rernem arleng-they arntarnt-arelhenh.

⁵⁶ Mary Magdala-areny, Mary ingwer-then, James-then Joseph-then, ikwer-atherrenh amikw, ingwer, James-then John-kenh amikw, rernem ikwer-rnem-itwel rtnenh. James-then John-then Zebedee-kenh alerikw-atherr anenh.

Rernem Jesus renh awenng intey-warl akwerneyel

⁵⁷ Atwerrp, artwa man-angketyarr apetyek itnan Joseph, artwa mwerr Ingkart-areny apmer ingwer-areny itnan Arimathea.

⁵⁸ Joseph-el Pilate renh ayernek, arrewalyek. Pilate-el ingwer ilek, ra arrewaly renh arwerl iylpeyl-atherr-they atwarrelhiletyek, Joseph renh anthetyek.

⁵⁹ Arnkwa mwerrel-anem ataperrelek.

⁶⁰ Joseph-kenhel-rnem arrewaly renh intey awenng-warl akwernek. Intey awenng renh ilkwilek awank-akerr, arrewaly-anem intey-warl akwerney-alenty, apwert ilkwa arriw-itwek arrkngertiwemel. Kel ra alpek-anem.

⁶¹ Mary Magdala-areny-then, Mary ingwer-then ratherr intey akarelhilenh.

⁶² Ingwepenh arlta ltyerrey-angker ikwerel, tyaty-areny atyetyart ilkwernem-then artwa Pharisee-rnem-then Pilate-warl akarrirrek.

⁶³ Rernem ikwer angkek, “Jesus ra irrtywerremel ikwer-rnem ilelhenty-arrpantey, ingwa atherr-penh ipmepenh itethirremel apey-alpetyek-arrpantey.

⁶⁴ Artwernem irrpety thwenay, arriw ilenh akarerl-ayntetyek arlta irrpetyek-atwety, kwertengerl ikwerenh-rnemel ipma renh tyerremel akngekerr, ingwer-rnem-anem ilekerr, itethirrenty-arrpantey.”

⁶⁵ Pilate-el renh-rnem ilek, “Ahelengkw-rnem atnwenha, rernem awenng renh akarerl-ayntetyek.”

⁶⁶ Atyetyart rernem apwert renh mwantyel akentek rlterrk, ahelengkw renh-rnem-anem rnkernek, awenng renh akarerl-ayntetyek.