Genesis 18 - Alyawarr Bible

Abraham-el artwa irrpety arntarnt-areyel

¹ Akngey aremirrek Abraham ikwer apmer Mamre-itwek, arwerl arnenty ikwer-itwek. Arlta ampep ikwerel Abram kalikw ikwerenh arriwel anenh.

² Ra arek artwa irrpety rtney-alhenty aketh-itwek.

³ Ra ikwer-rnem-warl anterrek, renh-rnem rlwatetyek. Ra ahern-warl-athek kwenirrek, angkemel, “Anper alhey-angenh, lywenty-itwek ltyerrenherr-arey!

⁴ Kwaty atha arrekantherr iney-akenh ingka ahern-penh lhewelhetyek, arrantherr lywel ltyerretyek.

⁵ Amern-then atha arrekantherr iney-akenh alethel arrantherr alpetyek.” “Ya, kel mwerr,” rernem angkek.

⁶ Abraham wak-warl aylpenhek, Sarah-arl anenh-warl, renh ilek, “Amern arlety irrpety inay, amern rtamp ampernetyek.”

⁷ Ra aker mwerr innga rlwanek, anter-akngerr akely. Abraham-kenh warrkenhel pwelek irrwey akely atwerliwek aker artwa irrpety ikwer-rnemek.

⁸ Abraham-el aker-then milk-then anthek, artwa irrpety renh-rnem. Abraham lywel anenh, rernem amern arlkwenh-kety.

⁹ Rernem ayernek, “Anew ngkwenh Sarah-alew?” Abraham ra angkek, “Kalikw kwenel.”

^10-11 Artwa alethang angkek, “Aherrety anyent-penh ayeng apey-alpeyenh Sarah ampa akely atnyeneyenh. Sarah-el-tangkwel ampa atnyeneyenh arrwekel-antey ayeng apey-alpey-alenty.”

¹² Sarah-el angka awek-penh, irrpelthirremel. Sarah atherrek, “Nthakenh atha ampa atnyenem ampwelam-athen, aylanth atherr-antey ampwa, nthakenh ampa atnyenem.”

¹³ INGKARTel Abraham ilek, “Nthakenhek Sarah angkek atherremel-anem, atyeng irrpelthirreyel? Ayengan INGKARTarl, ampa innga atha anthey-angker!

¹⁴ Aherrety anyent-penh ayeng apey-alpeyenh aherrety ingwer ikwerel-antey. Sarah-el ampa atnyeneyenh arrwekel-antey ayeng apey-alpey-alenty.”

¹⁵ Sarah ra aterirrek, irrtywerremel ilelhek, “Ayeng atherrey-angenh arrangkw.” Artwa alethang ra ilek, “Inngarlap nga atherrek.”

Abraham-el Akngey renh ayerneyel, ra apmer Sodom atwey-angenh menty aretyek

¹⁶ Artwa alethang irrpety rernem apmer Sodom-warl alpek. Abraham ikwer-rnem-angkwarr antelherl-alhek, artengewemel iwerr iylparrernetyek ikwer-rnemek.

¹⁷ INGKART iterrenh, “Abraham atha iley-angenh apmer Sodom-arl atha atwem.

¹⁸ Ikwerenh-rnem akngerrirreyenh apmer arrpanenh-warl arlperrtyirreyenh.

¹⁹ Atha Abraham renh arntarnt-arek, ra ikwerenh-rnem akalty-antheyek atyeng-angkwarr, rernem arraty anetyek. Ikwer-penh atha renh-rnem arntarnt-arem, atharl renh-rnem ilek-angkwarr.”

²⁰ INGKARTel Abraham renh ilek, “Atha awek tern atherrarl artwa apmwangkwarr aneyel. Atha angka ilkwa awek.

²¹ Ayeng alhem, atha renh-rnem aretyek, nthek-angkwarr rernem aneyel, innga apek, arrangkw apek.”

²² Artwa alethang ratherr anperl-alhek, apmer Sodom ikwer-warl-anem, Abraham INGKART-itwelarl anenh.

²³ Abraham-el INGKART renh ayernek, “Artwa apmwernem ntwa atwenty, artwa mwerr-rnem ntwa atwem arrpemarl? Arlernem-alew?

²⁴ Tern yanh alerl atnyenenty artwa mwerr-rnem 50-akert?

²⁵ Ntwa mwanty arntarnt-aretyek. Ngan INGKART arraty innga, arlernem-then arntarnt-aretyek, tyatyemiley-angenh renh-rnem.”

²⁶ INGKART angkek, “Atha apek artwa mwerr-rnem 50 arentyel, atha apmer Sodom renh ywerrelhilemel atwey-angenh.”

²⁷ Abraham angkek, “Ayengan ahern-arenyarl. Nthakenharl artwa 45 mwerr-rnem arentyan? Ntwa tern ilkwa yanh ywerrelhilemel atwetyek?”

²⁸ INGKART angkek, “Atha apek artwa mwerr-rnem 45 arentyel, atha apmer Sodom renh ywerrelhilemel atwey-angenh.”

²⁹ “Artwa mwerr-rnem 40-alew?” Abraham-el renh ayernek. “Kel menty atwey-angenh.” INGKART angkek, “Atha tern ilkwa ywerrelhilemel atwey-angenh.”

³⁰ Abraham angkek, “Nga atyeng ahelirrey-angenh, INGKARTay. Nthakenharl artwa 30 mwerr-rnem arentyan? Ntwa tern ilkwa ywerrelhilemel atwetyek?” INGKART angkek, “Atha apek artwa mwerr-rnem 30 arentyel, atha apmer Sodom renh ywerrelhilemel atwey-angenh.”

³¹ Abraham angkek, “Ayengan arrangkw. Artwa 20 mwerr-rnem-alew?” INGKART angkek, “Atha apmer renh ywerrelhilemel atwey-angenh.”

³² Abraham angkek, “Nga atyeng ahelirrey-angenh INGKARTay, artwa mwerr-rnem 10-alew?” “Kel, menty atwey-angenh,” INGKART angkek. “Atha tern ilkwa ywerrelhilemel atwey-angenh.”

³³ Abraham angkekarl-penh INGKART alpek-anem. Kel Abraham apmer-warl alpek.