Colossians 1 - Alyawarr Bible

¹ Atha Paul thwenew, Ingkartel ayenh arrernew angkakert Christ Jesus-wenh. Timothy-el-then, Ingkart-wenh-angkwarr apenteyel arrpemarl.

² Timothy aylanth pip nhenh thwenem arrewantherr-warl, Colossae tawenel aneyel-rnem-warl, iylpareth awelheyel-rnem-warl. Akngey anewantherrenh Ingkartel arrenhantherrenh mwantyel arntarnt-arem, arrantherr mwerrant-arey anaynteyew.

³ Anantherr arrewantherr aleth-antey ayerneyel Ingkart Jesus Christ. Ingkartew anantherr inkwerelheyel, aynikw ikwerenhew.

⁴ Anantherr kel awew arrantherrarl Jesus Christ nakeyel, arrantherr Ingkart-areny ingkerrenh arntarnt-areyel. Alakenh-anyem anantherr Ingkartew angkem inkwerelhemel.

⁵ Arrantherr Ingkart nakeyel, rarl arrwekel ilew, arrantherr iteth intem-antey anaynteyew. Arrantherr angka mwerr-angker Ingkart-wenh awenh.

⁶ Angka mwerr-angker Ingkart-wenh arlpimperreyel apmer arrpanenh-warl. Rernem apmer arrpanenhew akalty-antheyel. Rernem nakew inkwerelhemel. Alakenh-anyem arrantherr angka akwerrpel awenh arrpemarl, <> wenh.

⁷ Artwa Epaprahas-el arrenhantherrenh akalty-anthenh alakenh, <> wenh. Ra Ingkart Jesus-angkwarr warrkerrenh, anantherr warrkerreyel-apeny.

⁸ Ranem arrenhantherrenh akalty-anthenh, Ingkart-wenh Inwengel arrenhantherrenh akalty-anthenh arrpemarl, ingwer-rnem-itwew mwerrant-arey anaynteyew. Alakenh-they anantherr angka awek-anem, arrewantherr-penh.

^9-10 Alakenh-anyem anantherr Ingkart renh-anem ayernew. Anantherr aleth-antey ikwer angkeyel, arrantherr Ingkart-wenh-angkwarr arraty apenteyew, rarl iterreyel-angkwarr, Inweng Mwerr-angkerel arrenhantherrenh akalty-antheyew, arrantherr arraty iterreyew. Inweng-angkwarr akaltyerreyn-aynteyew aleth-antey, ingwer-rnem arntarnt-araynteyew mwerr-angkwarr. Arrantherr artwentyel innga akaltyerreyew angka ikwerenhew.

¹¹ Ingkartel arrenhantherrenh rlterrkam-rlterrkeleyenh. Ingwerentyel arrenhantherrenh apmwewarlelewerr, arrantherr inkwerelhemel aleth apent-aynteyew ikwerenh-angkwarrant mwerr-angkwarr-ayteng.

¹² Anantherr-anem Akngeyew inkwerelheyew, rarl angka arrwekel arrernew, arrantherr apmer alker-itwew aney-alpeyew.

¹³ Ran anenhantherrenh apmwewety rakew, rantey arrpemarl alerikw ikwerenh arrernew, Atyetyart anewantherrenh aneyew, anantherr ikwerenh-rnem anaynteyew.

¹⁴ Ingkart-wenh alerikw ranem anewantherr katy ilwew, apmwa anewantherr-wety iweyew, anantherr iteth intem-antey anaynteyew.

Alerikw ahern-areny ingkerrenhew aneyew

¹⁵ Anantherr nthakenh Akngey irrwerl-areny arey-angenh. Alerikw ikwerenh atyetyart apmer arrpanenhew. Alerikw retangkwel arrwekel anenh ahern-wenyankel. Alerikw ikwerenh ingkerrenhew anaynterrew-anem, Ingkart anyent rey-antey.

¹⁶ Rlterrk ikwerenhel ra irrwerl-areny-rnem-then ahern-areny-rnem-then arrpmernew. Aleyarl anantherr areyel-anem. Ikwer-angkwarr inweng-rnem-then ingkerrenh arrpmernew, nthakenh arey-angenh-rnem. Alerikw rlterrk ikwerenh-angkwarr ra ingkerrenh arrpmernew, atyetyart ingkerrenhew anaynteyew.

¹⁷ Alerikw ra kel anenh, ahern nhenh-wenyankel. Ingkartel ahern-areny-rnem-then arrpmerney-angenh-antey, rant anenhan. Alerikwel ingkerrenh-antey atnyeneyel, ahern-areny-rnem ingkerrenh atnyeneyew.

¹⁸ Christ-then Tyaty-areny-rnem anyent-antey, Jesus Christ akapwert-apeny atyetyart aneyel ingkerrenhew. Anyent arlka ikwerenh-apeny anem, inweng anyent-akert rey-antey ikwer-rnem warrkerreyel. Ingkartel renh-tangkwel ipmepenh akemelhelew, alerikw ra ingkerrenhew atyetyart aneyew.

¹⁹ Aray, Ingkartelant alerikw ikwerenh arrernew, ikwer-apeny anaynteyew Ingkart irrkaty-antey ikwer-apeny, anyent rey-antey.

²⁰ Alerikw ikwer-angkwarr alker-areny ahern-areny ingkerrenh ikwerenh-rnem ayerrpelew. Alerikw ikwerenh arwerl iylpeyl-atherrel ilwemel, ra mwerr-angkwarr mpwarew ingkerrenhew anantherr apenterl-aynteyew, mwerrant-arey anaynteyew, arternpel.

²¹ Arrantherr Ingkart-wety ament-warl alhenh. Arrantherr apmwangkwarr alhenh ament iterremel, Ingkart-wety arlkarrerrenh.

²² Alerikw-anem arwerl iylpeyl-atherrel ilwew, arrantherr Ingkart-wenh-angkwarr arraty aneyew. Ra ikwer-warl anyentelhelew, alyelk mwerr anaynteyew, Ingkartel arrenhantherrenh tyatyemeley-angenh.

²³ Arrantherr Ingkart-wenh-angkwarr aneyew, angka mwerr renh rlterrk nakemel. Arrantherr-anem angkew iylpelerrey-angenh, Ingkartel arrewantherr arrernew, arrantherr iteth intem-antey anaynteyew. Ingkartel ayenh rlwanew, angka mwerr-angker Ingkart-wenh ilerl-apaynteyew ahern-areny ingkerrenhew.

²⁴ Ayenh apek menty atwem mwerrarl. Christ Jesus arlka menty anthelhew. Ayeng arlka menty anthelhew arrpemarl tyaty-areny ingkerrenhew.

²⁵ Akngeyel ayenh arrernew, tyaty-areny-rnemew, warrkerreyew, angka ikwerenh ingkerrenhew akalty-antheyew, ingkerrenhew warrkerreyew.

²⁶ Arrwekel angka anyelk-tangkwel ayntenh, Aley angka anaynt-anem Ingkart-areny ingkerrenhew, rernem aketh-antey aweyneyel.

²⁷ Ingkart ilkelheyel arrantherr Jew-weny-rnem akalty aneyew, angka ikwerenhew, arrantherr apmer mwerr-angker-itwew aney-alpeyew, Christ-wenh-angkwarr.

²⁸ Rernem-anem Jesus Christ-warl anyenterremel, Jesus Christ nakeyenh. Anantherr renh-rnem akalty-anthem, rernem arraty-angkwarr apenterl-aynteyew, ingwer-rnemel renh-rnem ilpertelewerr.

²⁹ Christ-el ayenh rlterrkeleyel. Alakenh-anyem ayeng warrkerreyel, alhengkerr irrey-angenh. Atha ingwer-rnem akalty-anthaynteyew ipmelhey-angenh.