Матфей 10 - Јаҥы Кереес

Иисус он эки апостолды јарлыктадып ийгени

¹ Иисус он эки ӱренчигин кычырып алды, кара јелбистердиҥ бажын билип, чыгара сӱрзин деп, кандый ла ооруны, кандый ла јоболды јассын деп, олорго јаҥ берди.

² Он эки апостолдыҥ ады-јолы бу: баштапкызы Симон, оны база Петр дейтен, оныҥ карындажы Андрей, Зеведейдиҥ уулы Иаков, оныҥ карындажы Иоанн,

³ Филипп ле Варфоломей, Фома ла Матфей каланчы, Алфейдиҥ уулы Иаков ло Фаддей дейтен Леввей,

⁴ Симон Кананит ле Иуда Искариот, соҥында Иисусты садып ийери ол болгон.

⁵ Иисус бу он экӱни ийип, олорго јакарды: – Ӧскӧ калыктар јаар ууланган јолло барбагар, самарлар калазына кирбегер.

⁶ Эҥ озо Израиль калыкка – азып јӱрген койлорго барыгар.

⁷ Теҥери Каандыгы јууктап келди деп, базып, јарлап јӱрӱгер.

⁸ Оору-јоболдуларды јазыгар, ӧлгӧндӧрди тиргизигер, капкаш балулу улусты арутагар, шилемирлерди чыгара сӱрӱгер. Тегинге алганыгар, тегинге беригер.

⁹ Алтын да, кӱмӱш те алып јӱрбегер, курыгарда јес те акчалу јӱрбегер,

¹⁰ јолго баштык та, солып кийер кеп те, ӧдӱк те, тайак та албагар, нениҥ учун дезе иштеген кижи курсакту болор.

¹¹ Кандый бир калага эмезе јуртка кирзегер, ондо јарагадый кижи кем болгонын сурулап угала, ого тӱжӱгер; тӱшкен ӱйде барганча јӱрӱгер.

¹² Ӱйге кирзегер, оны уткып, «Бу ӱйдеги улуска амыр болзын!» – дегер.

¹³ Ӱйдеги улус јарамык болзо, амырыгар олорго једер; јарамык эмес болзо, амырыгар слерге бурылар.

¹⁴ Кем слерди јуутпаза, сӧзигерди укпаза, ол ӱйдеҥ эмезе ол каладаҥ чыгып барадып, будыгардаҥ тоозынды кактагар.

¹⁵ Чынын айдадым слерге: Јаргы болор кӱнде Содом ло Гоморра јерине, ол калага кӧрӧ, јеҥил болор.

Болотон истежӱлер

¹⁶ Бат, слерди бӧрӱлер ортодо јӱрер койлорды чылап ийип јадым. Јыландый ойгор болыгар, кӱӱледий чӱм јок болыгар.

¹⁷ Улустаҥ ајарынып јӱригер. Олор слерди јаргыга берер, синагогаларында камчылаар.

¹⁸ Слерди Мениҥ адым учун башчыларына, каандарына апарар. Олордыҥ ла ӧскӧ калыктардыҥ алдына Мен керегинде кереледип,

¹⁹ слерди олордыҥ колына берип ийзе, канайып айдар эмезе нени айдар деп санааркабагар. Айдар сӧс ол тушта слерге берилер.

²⁰ Слер бойыгардаҥ айдар эмезигер, Адагардыҥ Тыны ичигердеҥ айдар.

²¹ Карындаш карындажын, адазы уулын ӧлӱмге берер; балдары ада-энезине удура туруп чыгып, олорды ӧлтӱрер.

²² Мениҥ адым учун слерди ончо улус јаман кӧрӧр. Учына јетире чыдашканы дезе, аргадалар.

²³ Слерди бир калада истегежин, ӧскӧ калага качыгар. Чынын айдадым слерге: Израильдиҥ калаларын эбирип тӱгескелегерде, Кижи Уулы једип келер.

²⁴ Ӱренчик ӱредӱчизинеҥ бийик болбос, кул бийинеҥ бийик болбос.

²⁵ Ӱренчик ӱредӱчизиндий болзо, ол до болор, кул бийиндий болзо, ол до болор. Айылдыҥ ээзин веельзевул деп адаарда, айылдагы улусты оноҥ до јаман айдышпай кайтсын.

Кемнеҥ коркыйтан

²⁶ Анайдарда, улустаҥ коркыбагар. Ачылбай калар туйук неме јок, јарталбай калар јажыт јок.

²⁷ Караҥуйда айтканымды, јарык тужында айдыгар; кулакла укканыгарды, ӱйдиҥ јабынчызынаҥ јарлагар.

²⁸ Кижиниҥ эди-канын ӧлтӱрип, јулазын дезе ӧлтӱрип болбос улустаҥ коркыбагар. Кижиниҥ эди-канын да, јулазын да таамыда ӧлтӱрер аргалудаҥ коркыгар.

²⁹ Эки кучыйакты оок акчага садатан эмес пе? Је Адагардыҥ табы болбогончо, экӱниҥ бирӱзи де јерге келип тӱшпес.

³⁰ Слердиҥ дезе бажыгардыҥ кылы да ончозы тоололып калган.

³¹ Анайдарда, коркыбагар: слер кӧп кучыйактардаҥ артык.

³² Андый болгондо, кем Мени јарадып турганын улус алдына айтса, оны Мен де јарадып турганымды Теҥеридеги Адамныҥ алдына айдарым.

³³ Улус алдында Менеҥ јана тӱшкен кижидеҥ Мен де Теҥеридеги Адамныҥ алдында јана тӱжерим.

Јараштыру эмес, кылыш

³⁴ Мени јерге амыр экелерге келген деп сананбагар. Мен амыр эмес, кылыш туттырарга келгем.

³⁵ Уулын адазынаҥ, кызын энезинеҥ, келдин кайын энезинеҥ айрыырга келгем.

³⁶ Кижиге бойыныҥ айылдагы улузы ӧштӱ болор.

³⁷ Адазын эмезе энезин Менеҥ артык сӱӱгени, Меге јарабас. Уулын эмезе кызын Менеҥ артык сӱӱгени, Меге јарабас.

³⁸ Керӱ агажын алып Мениле кожо барбаганы, Меге јарабас.

³⁹ Јӱрӱмин чеберлегени, онызын јылыйтар, Мен учун јӱрӱмин јылыйтканы дезе, онызын чеберлеп алар.

⁴⁰ Слерди јуутканы, Мени јуутканы ол, Мени јуутканы дезе, Мени Ийгенди јуутканы болор.

⁴¹ Јарлыкчы деп, јарлыкчыны јуутканы, јарлыкчыныҥ кайралын алар. Акту деп, актуны јуутканы, актуныҥ кайралын алар.

⁴² Бу кичӱлердиҥ кажы бирӱзине, Мениҥ ӱренчигим деп, бир айак соок суу ичирген кижи, чынын айдадым слерге: кайрал јок артпас.