Марк 8 - Јаҥы Кереес

Тӧрт муҥ кижини тойдырганы

¹ Ол кӱндерде кӧп улус јуулган. Олордыҥ јиир немези јок болордо, Иисус ӱренчиктерин кычырып алып, айтты:

² – Бу улуска ичим ачыйт. Ӱч кӱнге чыгара Мениле кожо јӱрген улустыҥ ооско салар немези јок.

³ Олорды ажандырбай јандырып ийзем, јолдо уйадай берер. Олордыҥ кезиги ыраактаҥ келген ине.

⁴ – Мында, аалга јерде, олорды азырайтан калашты кайдаҥ алар? – деп, ӱренчиктери каруу јандырдылар.

⁵ Иисус олордоҥ: «Слерде канча кире калаш бар?» – деп сураарда, јети дештилер.

⁶ Ол улусты јерге кыйын отурзын дейле, јети калашты алып, алкыш јетирди, сындырала, ӱлезин деп, ӱренчиктерине берди. Олор улуска ӱледи.

⁷ Олордо база эмеш балык болгон. Ол алкайла, онызын да ӱлезин деди.

⁸ Олор јиди, тойды. Арткан-калганын јети каламага јууп алдылар.

⁹ Јигени дезе тӧрт муҥ кире кижи болгон. Иисус олорды јандырып ийди.

¹⁰ Бу ла тарый ӱренчиктериле кожо кемеге отурып, Далмануфа деп јерге келди.

¹¹ Фарисейлер келип, Иисусла сӧс блаажа бердилер. Оны ченеп, теҥеридеҥ билди кӧргӱссин деп, некеп турдылар.

¹² Ол улу тынып, айтты: – Бу ӱйе билди кӧргӱс деп, не некейт болбогой? Чынын айдадым слерге: бу ӱйеге билди берилбес.

¹³ Оноҥ олорды таштап, катап кемеге отурала, ол јанына кечти.

Ачыткы керегинде

¹⁴ Ӱренчиктер калаш аларын ундып койгондор. Кемеде јӱк ле бир болчок калаш болгон.

¹⁵ Иисус дезе јакып, айтты: – Фарисейлердиҥ ле Иродтыҥ ачыткызынаҥ чеберленигер.

¹⁶ Ӱренчиктер бойы ортодо: «Бисте калаш јогын айдып туру» – деп табыштылар.

¹⁷ Иисус онызын билип, айтты: – Бисте калаш јок деп, нени таап туругар? Эмдиге оҥдобос, аайлабас кайттыгар? Јӱректеригер эмдиге јетире таш бойынча ба?

¹⁸ Кӧстӱ бойыгар кӧрбӧй туругар ба? Кулакту бойыгар укпай туругар ба? Санаагарга кирбейт пе?

¹⁹ Беш муҥ кижиге беш калаш сындырып береримде, јигенниҥ арткан-калганын канча каламага толо јууп алган эдигер? Олор: – Он эки – дедилер.

²⁰ – Јетӱни тӧрт муҥ кижиге јетиреримде, јигенниҥ арткан-калганын канча каламага јууп алган эдигер? – деерде, «јети» – дедилер.

²¹ Айдарда, Иисус олорго айтты: – Эмдиге јетире аайлабас кайттыгар?

Сокорды јасканы

²² Вифсаидага келдилер. Иисуска сокор кижини экелип, ого кол тийгиссин деп сурадылар.

²³ Ол сокорды јединип, јурттыҥ тыштына чыгарды. Кӧзине тӱкӱрип, ого колын салып, – Неме кӧрӱп туруҥ ба? – деди.

²⁴ Онызы кӧрӧлӧ, айтты: – Ӧдӱп бараткан улус агаш ошкош кӧрӱнет.

²⁵ Иисус оныҥ кӧзине колын катап салып, кӧрзин деп јакарды. Байагы кижи лаптап кӧрӱп, јазылды, ончозын јап-јарт кӧрӧ берди.

²⁶ Иисус оны јандырып, «Јуртка кирбе, јуртта кемге де айтпа» – деди.

Иисус кем?

²⁷ Иисус ӱренчиктериле кожо Филипп Кесариязы дейтен јердиҥ јурттарына барды. Јолой олордоҥ сурады: – Улус Мени кем дежет?

²⁸ Олор айттылар: – Сени Крестеечи Иоанн дежет, кезиктери Илия, кезиктери јарлыкчылардыҥ бирӱзи дежет.

²⁹ Ол сурады: – Слер Мени кем дейдигер? – Сен – Христос – деп, Петр каруу јандырды.

³⁰ – Мен керегинде кемге де айтпагар – деп, Иисус олорго јакарды.

³¹ Оноҥ олорды ӱредип баштады: Кижи Уулы кӧп кыйналар, јаандар, улу абыстар ла бичикчилер Оны јектеп койор учурлу, Оны ӧлтӱргилеп койор, је ӱчинчи кӱнде Ол тирилер учурлу.

³² Ол мыны ачыгынча айдып јӱрген. Петр дезе, Оны кедери кычырып алала, Ого удура сӧс айдып баштады.

³³ Је Ол ӱренчиктери јаар кайра кӧрӧлӧ, Петрды каарып, ого айтты: – Менеҥ кеде тайыл, сатана! Сен Кудайдыйын эмес, кижинийин сананып јадыҥ.

³⁴ Улусты Бойыныҥ ӱренчиктериле кожо кычырып алып, олорго айтты: – Мениле кожо болойын дегенигер, бойынаҥ бойы мойноп, бойыныҥ керӱ агажын алганча, Мени ээчий барзын.

³⁵ Јӱрӱмин аргадайын дегени, онызын јылыйтар. Меге ле Сӱӱнчилӱ Јарга болуп јӱрӱмин јылыйтканы дезе, онызын аргадап алар.

³⁶ Јер-телекейде не бар ончозын табала, је јӱрӱмин јылыйтса, кижиге кандый туза?

³⁷ Эмезе кижи бойыныҥ јӱрӱми учун ордына нени берер?

³⁸ Бу кинчектӱ, чайдам ӱйе алдында кем Менеҥ, Мениҥ айткан сӧзимнеҥ уйалар болзо, Кижи Уулы да Адазыныҥ магын алганча, агару ангелдериле кожо келгежин, ол кижидеҥ уйалар.